ବିଧାନସଭାରୁ ପ୍ରଭୁକଲ୍ୟାଣ ମହାପାତ୍ରଙ୍କ ରିପୋର୍ଟ
ଭୁବନେଶ୍ବର : ଓଡିଶା ପର୍ଯ୍ୟଟନର ବିକାଶ ପାଇଁ ରାଜ୍ୟ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ବିଧାନସଭାରେ ପ୍ରକାଶ କରିଛନ୍ତି । ବିଧାନସଭାରେ ଉତ୍ତର ରଖିବା ସମୟରେ ରାଜ୍ୟ ସରକାର ଗାନ୍ଧୀ ସର୍କିଟର ପ୍ରତିଷ୍ଠା ଉପରେ ସରକାର ବିଚାର କରୁଛନ୍ତି ବୋଲି ପର୍ଯ୍ୟଟନ ମନ୍ତ୍ରୀ କହିଛନ୍ତି । ଗାନ୍ଧିଜୀ ଓଡିଶାରେ ପରିଭ୍ରମଣ ଓ ରହିଥିବା ସ୍ଥାନଗୁଡିକୁ ସଞ୍ଜୋଗ କରି ଏକ ପର୍ଯ୍ୟଟନ ସର୍କିଟ୍ ପ୍ରତିଷ୍ଠା କରିବାକୁ ଯୋଜନା କରାଯାଉଛି ବୋଲି ମନ୍ତ୍ରୀ ପ୍ରକାଶ କରିଥିଲେ । ରାଜ୍ୟରେ 482 କିମି ପରିବ୍ୟାପ୍ତ ବେଳାଭୂମିର ବିଭିନ୍ନ ପ୍ରାନ୍ତରେ ଇକୋ ରିଟ୍ରିଟ୍ ପ୍ରତିଷ୍ଠା ପାଇଁ ସ୍ଥାନ ଚିହ୍ନଟ କରାଯାଇଛି । ବିଭିନ୍ନ କ୍ଲିୟରାନ୍ସ ନମିଳିବା କାରଣରୁ ଦୀର୍ଘବର୍ଷ ଧରି ପଡିରହିଥିବା ଶାମୁକା ପ୍ରକଳ୍ପ ପୁନର୍ବାର ଆରମ୍ଭ କରାଯାଇଛି । ବିଭାଗୀୟ ବଜେଟ ବରାଦ ଅର୍ଥ 100 ପ୍ରତିଶତରୁ ଅଧିକ ବୃଦ୍ଧି ପାଇଛି ଏବଂ ବେଳାଭୂମିର ବିକାଶ ଉପରେ ସର୍ବାଧିକ ଗୁରୁତ୍ବ ଦିଆଯାଇଛି ।
ସେହିପରି ହୁକିଟୋଲାରେ ପର୍ଯ୍ୟଟନର ବିକାଶ ପାଇଁ ଅନେକ ପଦକ୍ଷେପ ଗ୍ରହଣ କରାଯାଇଛି ବୋଲି ମନ୍ତ୍ରୀ ପ୍ରକାଶ କରିଛନ୍ତି । ଏ ସମ୍ପର୍କିତ ବିଭିନ୍ନ ପ୍ରଶ୍ନର ଉତ୍ତର ଦେଇ ମନ୍ତ୍ରୀ କହିଥିଲେ, ବ୍ରିଟିଶ୍ ଅମଳରୁ ରହିଥିବା ବିଭିନ୍ନ ଅଟ୍ଟାଳିକାର ପୁନରୁଦ୍ଧାର କରାଯାଇଛି । ପୁନରୁଦ୍ଧାର ନିମନ୍ତେ 1 କୋଟି 3 ଲକ୍ଷ ଟଙ୍କା ଖର୍ଚ୍ଚ କରାଯାଇଛି । ପର୍ଯ୍ୟଟଙ୍କ ସୁବିଧା ଲାଗି ଗୋଟିଏ ଓ୍ବାଚ୍ ଟାଓ୍ବାର ନିର୍ମାଣ କରାଯାଇଛି । ହୁକିଟୋଲାକୁ ଯିବା ପାଇଁ ଫ୍ଲୋଟିଙ୍ଗ ଜେଟି ସ୍ଥାପିତ ହୋଇଛି । ଜମ୍ବୁ ଠାରୁ ଘରୋଇ ବୋଟ ଚଳାଚଳ କରୁଛି ।
