ସୀତାରାମ ଅଗ୍ରଓ୍ବାଲ
ବାଣପୁର : ବାଣପୁର ସହରର ଐତିହ୍ୟସମ୍ପନ୍ନ ପଲଟଣ ପଡ଼ିଆରେ ରହିଥିବା ଛାୟାମଣ୍ଡପ ଏବେ ଜୁଆ ଆଡ୍ଡା ପାଲଟିଥିବାର ଅଭିଯୋଗ ହୋଇଛି। ବାଣପୁରର ଆତ୍ମା ରହିଥିବା ଏହି ପଲଟଣ ପଡ଼ିଆ ନିକଟରେ ରହିଛି ସରକାରୀ ଅଫିସ ତଥା ବିଚାରାଳୟ। ଏହି ପଡ଼ିଆଟି ବାଣପୁରର ଐତିହ୍ୟକୁ ବହନ କରୁଥିବାବେଳେ ଏହି ପଡ଼ିଆରେ ସରକାରୀ ତଥା ବେସରକାରୀ ବିଦ୍ୟାଳୟର ବାର୍ଷିକ ଉତ୍ସବ ତଥା ଅନେକ ମେଳା ମହୋତ୍ସବ ହୋଇଥାଏ। ନିକଟରେ ପାଇକ ମାନଙ୍କ ସ୍ମୃତି ଉଦ୍ଦେଶ୍ୟରେ ଏହି ପଡ଼ିଆରେ ଏକ ବିରାଟ ଆୟୋଜନ କରାଯାଇଥିଲା। ସେହିପରି ଏହି ମଣ୍ଡପ ନିକଟରେ ତହସିଲ କାର୍ଯ୍ୟାଳୟଠାରୁ ଆରମ୍ଭ କରି ବ୍ଲକ କାର୍ଯ୍ୟାଳୟ, ବିଦ୍ୟାଳୟ, ମନ୍ଦିର, ସବ୍ରେଜେଷ୍ଟ୍ରି ଅଫିସ୍ ଆଦି ରହିଛି। ଏପରିକି ଏହି ପଡ଼ିଆ ନିକଟରେ ବାଣପୁର ବିଚରାଳୟର ବିଚାରପତି ଅବସ୍ଥାନ ମଧ୍ୟ କରୁଛନ୍ତି। ସେହିପରି ତହସିଲଦାରଙ୍କ ବାସଭବନ ମଧ୍ୟ ଏହି ପଡିଆ ନିକଟରେ ଅବସ୍ଥିତ।
ଏହି ମଣ୍ଡପକୁ ଜୁଆଡିମାନେ ନିଜ ଆଡ୍ଡା କରିଥିବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ନିକଟରେ ବିଦ୍ୟାଳୟ ତଥା ଅନେକ ସରକାରୀ କାର୍ଯ୍ୟାଳୟ ଓ ମାର୍କେଟ୍ ରହିଥିବାବେଳେ ଜୁଆଡିମାନେ କିପରି ଏହାକୁ ନିଜର ଆଡ୍ଡାସ୍ଥଳୀରେ ପରିଣତ କଲେ ସେ ନେଇ ସନ୍ଦେହ ସୃଷ୍ଟି ହୋଇଛି। ନିକଟରେ ମାର୍କେଟ୍ ରହିଥିବାରୁ ଏଠାରେ ବହୁ ଲୋକଙ୍କ ସମାଗମ ହେଉଥିବାବେଳେ ବଜାର ଉପରେ ଜୁଆଡିମାନଙ୍କର ଏପରି ଏକ ମଣ୍ଡପରେ ଅସାମାଜିକ କାର୍ଯ୍ୟକୁ ନେଇ ସାଧାରଣରେ ବେଶ୍ ନିନ୍ଦା କରାଯାଇଛି। ନିକଟରେ ଏହି ମଣ୍ଡପରେ ପଞ୍ଚୁଦୋଳ ନିମେନ୍ତ ପ୍ରସ୍ତୁତି ବୈଠକ କରାଯାଇଥିବାବେଳେ ଏବେ ସେହି ଯାଗାରେ ଜୁଆଡିମାନେ ବସି ଜୁଆ ଖେଳୁଥିବାର ନଜର ଆସିଛି। ସର୍ବସାଧାରଣରେ ଦିନ ଦ୍ବିପ୍ରହରରେ ଏପରି ଅସାମାଜିକ କାର୍ଯ୍ୟକୁ ନେଇ ସାଧାରଣରେ ନିନ୍ଦା କରାଯାଇଛି। ଐତିହ୍ୟସମ୍ପନ୍ନ ଏହି ମଣ୍ଡପରେ ଜୁଆଡିମାନେ ଜୁଆ ଖେଳିବା ଏକ ନିନ୍ଦନୀୟ କାର୍ଯ୍ୟ। ଏହି ଜୁଆଡିଙ୍କ ନିକଟରୁ ଏହି ମଣ୍ଡପକୁ ସୁରକ୍ଷା ଦେବା ଦିଗରେ ପ୍ରଶାସନ କାର୍ଯ୍ୟାନୁଷ୍ଠାନ କରିବା ନେଇ ସାଧାରଣରେ ଦାବି ହୋଇଛି।
