ରଞ୍ଜିତ ପଣ୍ଡା
କୁଜଙ୍ଗ: କୁଜଙ୍ଗଥାନାରେ ଏବେ ଅଧିକାରୀ ସଙ୍କଟ ଦୈନନ୍ଦିନ କାର୍ଯ୍ୟ ନିର୍ବାହରେ ଘୋର ସଙ୍କଟ ସୃଷ୍ଟି କରିଥିବା ଜଣାପଡ଼ିଛି। ଜିଲ୍ଲାର ସବୁଠାରୁ ବ୍ୟସ୍ତବହୁଳ ଥାନା ହୋଇଥିବାବେଳେ ବାର୍ଷିକ ମାମଲା ସଂଖ୍ୟା ମଧ୍ୟ ଅନ୍ୟ ଥାନା ତୁଳନାରେ ବେଶ ଅଧିକ । ମାତ୍ର ଆବଶ୍ୟକୀୟ ଏସଆଇ ସଂଖ୍ୟା ସାତ ହୋଇଥିବା ସ୍ଥଳେ ମାତ୍ର ଜଣେ ଏସଆଇ କାର୍ଯ୍ୟକରୁଛନ୍ତି। ଏହିପରିସ୍ଥଳେ କୁଜଙ୍ଗ ଥାନାରେ ଅପରାଧ ତଥା ଆଇନ ଶୃଙ୍ଖଳା ନିୟନ୍ତ୍ରଣ କ୍ଷେତ୍ରରେ ଘୋର ସମସ୍ୟାର ସମ୍ମୁଖୀନ୍ନ ହେଉଥିବା ଜଣାପଡ଼ିଛି। ତୁରନ୍ତ ଆବଶ୍ୟକୀୟ ପୁଲିସ ଅଧିକାରୀଙ୍କୁ ନିଯୁକ୍ତି ପ୍ରଦାନ କରଯିବାକୁ ବିଭିନ୍ନ ମହଲରେ ଦାବୀ ପ୍ରକାଶ ପାଇଛି ।
ପ୍ରକାଶଯେ, ଜଗତସିଂହପୁର ଜିଲ୍ଲାରେ କୁଜଙ୍ଗ ଏକ ଗୁରୁତ୍ୱପୂର୍ଣ୍ଣ ଅଂଚଳ ଅଟେ। ପାରାଦୀପ ବନ୍ଦରର ମୁଖାଶଳା ହୋଇଥିବାରୁ ତଥା ଏହା ପାର୍ଶ୍ବରେ ଜାତୀୟ ଏବଂ ରାଜ୍ୟ ରାଜପଥ ରହିଥିବାରୁ ଏଠାରେ ଅନେକ ସମୟରେ ଗୁରୁତର ଆଇନ ଶୃଙ୍ଖଳା ପରିସ୍ଥିତି ଦେଖାଯାଇଥାଏ। କୁଜଙ୍ଗ ତଥା ଏରସମା ବ୍ଳକର ୧୯ଟି ପଂଚାୟତର ଆଇନ ଶୃଙ୍ଖଳା ନିୟନ୍ତ୍ରଣ କରିବାର ଦାୟିତ୍ୱ ଏହି ଥାନା ଉପରେ ରହିଛି । ଫଳରେ ଏଠାରେ ସବୁବେଳେ ନିଯୁକ୍ତ ଆରକ୍ଷୀ ନୀରିକ୍ଷକଙ୍କପାଇଁ ଏହା ସବୁବେଳେ ଆହ୍ୱାନ ସୃଷ୍ଟି କରିଥାଏ। ତେବେ ବିଶାଳ ଅଂଚଳ ତଥା ପାରାଦୀପ ଶିଳ୍ପାଂଚଳର ମୁଖଶାଳା ଦୃଷ୍ଟିରୁ ଏଠାରେ ୭ ଏସ୍ଆଇ ପଦବୀ ରହିଛି। କୌଣସି ସମୟରେ ମଧ୍ୟ ପୂର୍ଣ୍ଣମାତ୍ରାରେ ଏସଆଇ ଏଠାରେ କାର୍ଯ୍ୟ କରିବା ଦେଖାଯାଇନଥାଏ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଏବେ ଏଠାରେ ୭ଜଣ ଏସଆଇଙ୍କ ସ୍ଥାନରେ ଜଣେମାତ୍ର କାର୍ଯ୍ୟ କରୁଛନ୍ତି। ତଥ୍ୟରୁ ଜଣାପଡ଼େ ଏଠାରେ ବାର୍ଷିକ ୩ ଶହରୁ ଉର୍ଦ୍ଧ ମାମଲା ରୁଜୁ କରାଯାଇଥାଏ। ଫଳରେ ମାମଲାର ତଦ୍ଦନ୍ତ କରିବାରେ ଏସଆଇ ମାନଙ୍କର ଗରୁତ୍ୱପୂର୍ଣ୍ଣ ଭୂମିକା ରହିଥାଏ। ଯାହା ଏବେ ଏଠାରେ ଗୁରତର ସଙ୍କଟ ସୃଷ୍ଟି କରିଛି। ଫଳରେ ଅନେକ ସମୟରେ ଥାନା ଅଧିକାରୀଙ୍କ ଉପରେ କାର୍ଯ୍ୟ ଚାପ ରହୁଛି। କେବଳ ଆଇନ ଶୃଙ୍ଖଳା ନିୟନ୍ତ୍ରଣ ନୁହେଁ। ଏହା ବାହାରେ ମଧ୍ୟ ପୁଲିସକୁ ଅତିରିକ୍ତ ଭାବେ ଯାନବାହନ ନିୟନ୍ତ୍ରଣ, ତନଖି, ଚୋରା ନିଶାକାରବାରକ୍ଷେତ୍ରରେ ମଧ୍ୟ କାର୍ଯ୍ୟ କରିବାକୁ ପଡ଼ିଥାଏ। ଜିଲ୍ଲାର ଅନ୍ୟକିଛି ଥାନା ମାନଙ୍କରେ ବାର୍ଷିକ ସର୍ବନିମ୍ନ କେଶ ରୁଜୁ ହେଉଥିବାବେଳେ ସେଠାରେ ଆବଶ୍ୟକତା ଅନୁଯାୟୀ ଅଫିସର ମାନେ ରହିଛନ୍ତି। ମାତ୍ର କୁଜଙ୍ଗପରି ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ଥାନାରେ ଅଧିକାରୀ ମରୁଡ଼ି ଆଇନ ଶୃଙ୍ଖଳା ନିୟନ୍ତ୍ରଣରେ ଅସୁବିଧା ସୃଷ୍ଟି ହେଉଥିବା ଜଣାପଡ଼ିଛି। ତେବେ ଏହି ସମସ୍ୟା ସମ୍ପର୍କରେ ଥାନା ଅଧିକାରୀ ଦିଲ୍ଲୀପ କୁମାର ସାହୁଙ୍କୁ ପଚାରିବାରୁ ସେ ସମସ୍ୟାକୁ ସ୍ୱୀକାର କରିଥିବା ବେଳେ ଆବଶ୍ୟକୀୟ ସଙ୍ଖ୍ୟକ ଏସଆଇ ନଥିବାରୁ କାର୍ଯ୍ୟ ପରିଚାଳନା କରିବାରେ ଅନେକ ସମସ୍ୟା ସୃଷ୍ଟି ହେଉଥିବା ପ୍ରକାଶ କରିଛନ୍ତି।
