ରମେଶ ମହାନ୍ତି
ଜଗତସିଂହପୁର: ଟୋପାଏ ବି ବର୍ଷା ନାହିଁ ହେଲେ ଘଡଘଡି ପଡି ଚାଲିଗଲା ଏକ ନିରୀହ ଜୀବନ । ତିର୍ତ୍ତୋଲ ବ୍ଲକ୍ ଅନ୍ତର୍ଗତ କନକପୁର ପଂଚାୟତ ସ୍ଥିତ ବଡସାରୋଳ ଗ୍ରାମର ଦିଜବର ଭୋଇ (୬୦) ସନ୍ଧ୍ୟା ୬ଟା ବେଳେ ନିଜ ଘର ଆଗରେ ଦୁଆର ମୁହଁରେ ବସିଥିଲେ। ଠୋପାଏ ବି ବର୍ଷା ନଥିଲା ହେଲେ ତାଙ୍କ ନିକଟରେ ଥିବା ଏକ ନଡିଆ ଗଛ ଉପରେ ହଠାତ୍ ପ୍ରଚଣ୍ଡ ଶବ୍ଦକରି ଏକ ଶୁଖିଲା ଘଡଘଡି ପଡିବାରୁ ନଡିଆ ଗଛଟି ହୁତୁହୁତୁ ହୋଇ ଜଳିବା ସହ ନଡିଆ ଗଛ ନିକଟରେ ବସିଥିବା ଦିଜବର ଭୋଇଙ୍କ ଦେହରେ ନିଆଁ ଲାଗିଯିବାରୁ ସେହିଠାରେ ସେ ଟଳିପଡିଥିଲେ । ଯଥାଶିଘ୍ର ତାଙ୍କୁ ଚିକିତ୍ସା ପାଇଁ ଆମ୍ବୁଲାନ୍ସରେ ଜଗତସିଂହପୁର ମୁଖ୍ୟ ଡାକ୍ତରଖାନାକୁ ନିଆଯାଇଥିଲା।ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଘଟଣା ସ୍ଥଳରେ ହିଁ ଦିଜବରଙ୍କ ମୃତ୍ୟୁ ହୋଇଯାଇଥିଲା ବୋଲି କୁହାଯାଉଛି।ଏଥିସହିତ ତିର୍ତ୍ତୋଲ ଦମକଳ ବାହିନୀର ୨ଟି ଗାଡି ଘଟଣା ସ୍ଥଳରେ ପହଁଚି ନଡିଆ ଗଛରେ ହୁତୁହୁତୁ ହୋଇ ଜଳୁଥିବା ନିଆଁକୁ ଆୟତ୍ତ କରିଥିଲେ। ଦିଜବରଙ୍କ ମୃତ ଶରୀର ଜଗତସିଂହପୁର ମୁଖ୍ୟ ଡାକ୍ତରଖାନାରେ ରଖାଯାଇଥିବା ବେଳେ ମଙ୍ଗଳବାର ଦିନ ତାଙ୍କର ଶବ ବ୍ୟବଚ୍ଛେଦ କରାଯିବ ବୋଲି ଜଣାପଡିଛି।
