ଉତ୍ତରପ୍ରଦେଶ: ଭାରତରେ କରୋନା ଭାଇରସ୍ର ସଂକଟ ବଢିଚାଲିଥିବାବେଳେ ଏଥିରେ 5ଜଣଙ୍କର ମୃତ୍ୟୁ ଘଟିଛି । ଏଥିରେ ଜଣେ ବିଦେଶୀ ନାଗରିକ ରହିଛନ୍ତି । କରୋନାକୁ ରୋକିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ସବୁପ୍ରକାରର ଉଦ୍ୟମ ଜାରି ରଖିଛନ୍ତି । ବେଶ୍ ସତର୍କତା ଓ କଡା ପଦକ୍ଷେପ ଗ୍ରହଣ କରୁଛନ୍ତି । ଏହା ମଧ୍ୟରେ ସମାଜବାଦୀ ପାର୍ଟିର ଜଣେ ପୂର୍ବତନ ସାଂସଦଙ୍କ ଅଜବ ବୟାନ ଏବେ ଚର୍ଚ୍ଚାକୁ ଆସିଛି ।
ୟୁପିର ଆଜମଗଡର ପୂର୍ବତନ ସାଂସଦ ତଥା ସପା ର ନେତା ରମାକାନ୍ତ ଯାଦବ କହିଛନ୍ତି ଯେ, କରୋନା ଏକ ବାହାନା ଅଟେ । ଏହା ଜରିଆରେ ଏନ୍ଆରସି, ସିଏଏ ଓ ମହଙ୍ଗା ପରି ପ୍ରସଙ୍ଗକୁ ଏଡାଇ ଦିଆଯାଉଛି । ରମାକାନ୍ତ ଯାଦବ କହିଛନ୍ତି ଯେ, ଦୁନିଆରେ କରୋନା ହୋଇପାରେ, କିନ୍ତୁ ଭାରତରେ ଏହା ହେବ ନାହିଁ । କାରଣ ସେ କରୋନା ସଂକ୍ରମିତ ବ୍ୟକ୍ତିକୁ କୁଣ୍ଡାଇବା ପାଇଁ ପ୍ରସ୍ତୁତ ରହିଛନ୍ତି ।
ଅପରପକ୍ଷରେ କରୋନାକୁ ମୁକାବିଲା କରିବା ପାଇଁ ନରେନ୍ଦ୍ର ମୋଦି ଆସନ୍ତା 22 ତାରିଖରେ ଜନତା କର୍ଫ୍ୟୁ ପାଇଁ ଆହ୍ବାନ ଜଣାଇଛନ୍ତି । ଆସନ୍ତା କାଲି ସକାଳ 7ଟାରୁ ରାତ୍ର 9ଟା ପର୍ଯ୍ୟନ୍ତ ‘ଜନତା କର୍ଫ୍ୟୁ’ ପାଳନ କରିବା ପାଇଁ କହିଛନ୍ତି । ଭାରତରେ କରୋନା ଆକ୍ରାନ୍ତଙ୍କ ସଂଖ୍ୟା 270ରେ ପହଞ୍ଚିଲାଣି । (ଏଜେନ୍ସି)
