ଭୁବନେଶ୍ବର: ଆସନ୍ତାକାଲି ମୁଖ୍ୟମନ୍ତ୍ରୀ ଅଧ୍ୟକ୍ଷତାରେ ବସିବ କ୍ୟାବିନେଟର ଜରୁରୀ ବୈଠକ। ବର୍ତ୍ତମାନ ପରିସ୍ଥିତିରେ ଏହି ବୈଠକ ବେଶ୍ ଗୁରୁତ୍ବପୂର୍ଣ୍ଣ ରହିଛି। ଏହି ବୈଠକରେ କଣ ଆଲୋଚନା ହେବ ସେ ସଂପର୍କରେ ବର୍ତ୍ତମାନ ସୁଦ୍ଧା କୌଣସି ଏଜେଣ୍ଡା ଦିଆଯାଇ ନାହିଁ। ହେଲେ ବିଶ୍ବସ୍ଥ ସୁତ୍ରର ଖବର ଅନୁସାରେ ରାଜ୍ୟ ସରକାରଙ୍କ କୋଭିଡ19 ମୁକାବିଲା ପାଇଁ ପର୍ଯ୍ୟାପ୍ତ ପାଣ୍ଠିର ଆବଶ୍ୟକତା ରହିଛି। ସେଥିପାଇଁ ବିଧାୟକ ପାଣ୍ଠିକୁ କୋଭିଡ19 ମୁକାବିଲା ପାଣ୍ଠିକୁ ପରିବର୍ତ୍ତନ କରିବେ। ଏହି ପରିବର୍ତ୍ତନ ପାଇଁ କ୍ୟାବିନେଟ ମଞ୍ଜୁରୀର ଆବଶ୍ୟକତା ଥିବାରୁ ରାଜ୍ୟ ସରକାର ଏପରି ଜରୁରୀ ବୈଠକ ଡାକିଛନ୍ତି।
ଗତକାଲି ବିରୋଧୀ ଦଳର ନେତା ପ୍ରଦୀପ୍ତ କୁମାର ନାୟକ ଏ ନେଇ ମୁଖ୍ୟମନ୍ତ୍ରୀଙ୍କୁ ଏକ ଚିଠି ଲେଖିଛନ୍ତି। ସେଥିରେ ସେ ଉଲ୍ଲେଖ କରିଛନ୍ତି ଯେ, ଏମଏଲଏ ଲ୍ୟାଡକୁ କରୋନା ମୁକାବିଲା ପାଇଁ ଖର୍ଚ୍ଚ କରାଯାଉ। ଏହା ପୂର୍ବରୁ କେନ୍ଦ୍ର ସରକାର ମଧ୍ୟ ଏମପି ଲ୍ୟାଡକୁ କରୋନା ମୁକାବିଲା ପାଇଁ ଖର୍ଚ୍ଚ କରାଯିବ ବୋଲି ନିଷ୍ପତି କରିଛନ୍ତି। କ୍ୟାବିନେଟ ବୈଠକରେ ଏହି ନିଷ୍ପତି ନିଆଯାଇଥିଲା।
ବର୍ତ୍ତମାନ ନୂଆ ନିଷ୍ପତି ଅନୁସାରେ ଓଡିଶାରେ ବିଧାୟକ ପାଣ୍ଠି ବା ଏମଏଲଏ ଲ୍ୟାଡ କୋଟିଏ ଟଙ୍କାରୁ ତିନି କୋଟିକୁ ବୃଦ୍ଧି କରାଯାଇଛି। ଯଦି ରାଜ୍ୟର 147 ଜଣ ବିଧାୟକଙ୍କ ଏହି ପାଣ୍ଠିକୁ କରୋନା ପାଣ୍ଠିକୁ ବଦଳାଯାଏ ତେବେ ମୋଟ 441 କୋଟି ଟଙ୍କା ଆସିବ। ଯଦି ଦୁଇ ବର୍ଷର ପାଣ୍ଠିକୁ ଏଥିରେ ବିନିଯୋଗ ପାଇଁ ନିଷ୍ପତି କରାଯାଏ ତେବେ ଏହା 882 କୋଟି ଟଙ୍କା ହେବ। ଏହି ଟଙ୍କା ରାଜ୍ୟରେ କରୋନା ମୁକାବିଲା ପାଇଁ ସରକାରଙ୍କୁ ଏକ ବଡ ସହଯୋଗ ହୋଇପାରିବ।
