ରଞ୍ଜିତ ପଣ୍ଡା
କୁଜଙ୍ଗ: କୁଜଙ୍ଗ ବ୍ଳକ ଅନ୍ତର୍ଗତ ଜଳକ୍ଳିଷ୍ଟ ବିଶ୍ୱାଳୀ ପଂଚାୟତକୁ ଗ୍ରାମ୍ୟ ଜଳଯୋଗାଣ ଏବଂ ପରିମଳ ବିଭାଗ ପକ୍ଷରୁ ଯୋଗାଣ କରାଯାଉଥିବା ପାନୀୟ ଜଳରେ ବିଷାକ୍ତ ପୋକ ରହୁଥିବାବେଳେ ଟାଙ୍କିକୁ ସଠିକ୍ ଭାବେ ପରିଚ୍ଛନ୍ନ କରାଯାଉନଥିବା ନେଇ ସ୍ଥାନୀୟ ଜନସାଧାରଣ ଅଭିଯୋଗ କରିଛନ୍ତି। ଫଳରେ ଠିକାଦାର ଜରିଆରେ ଜଳ ଯୋଗାଣ କରୁଥିବା ଗ୍ରାମ୍ୟ ଜଳଯୋଗାଣ ଏବଂ ପରିମଳ ବିଭାଗ ଏହି କାର୍ଯ୍ୟର ତଦାରଖ ସଠିକ ଭାବେ କରୁନଥିବା ଅଭିଯୋଗ ହେଉଛି।
ପ୍ରକାଶଯେ ବିଶ୍ୱାଳୀ ବ୍ଳକ ଏକ ଜଳକ୍ଳିଷ୍ଟ ପଂଚାୟତ ଭାବେ ବେଶ ଜଣାଶୁଣା। ଏଠାରେ ଲକ୍ଷ ଲକ୍ଷ ଟଙ୍କା ବ୍ୟୟରେ ପାନୀୟ ଜଳ ଯୋଗାଣ ପ୍ରକଳ୍ପ ଅର୍ଦ୍ଧନିର୍ମିତ ହୋଇ ପଡ଼ିରହିଛି। ଫଳରେ ପଂଚାୟତର ବିଶ୍ୱାଳୀ, କୋଲଡ଼ିଆ, ନରେନ୍ଦ୍ରପୁର, ପୀତାମ୍ବରପୁର, କାଠଗଡ଼ା ଆଜି ଗ୍ରାମକୁ କୁଜଙ୍ଗସ୍ଥିତ ଗ୍ରାମ୍ୟ ପାନୀୟ ଯୋଗାଣ ଏବଂ ପରିମଳ ବିଭାଗ ପକ୍ଷରୁ ସେଠାରେ ଠିକାଦାର ନିଯୁକ୍ତି କରାଯାଇ ଜଳଯୋଗାଣ କରାଯାଉଛି। ତେବେ ଟ୍ରାକ୍ଟର ଯୋଗେ ପ୍ରଦାନ କରାଯାଉଥିବା ଏହି ପାନୀୟ ଜଳ ଆସୁଥିବା ଟାଙ୍କିକୁ ସଠିକଭାବେ ସଫା କରାଯାଉନାହିଁ। ଫଳରେ ଟାଙ୍କିରେ ଜୀବନ୍ତ ବିଷାକ୍ତ ପୋକ ରହିବା ସହିତ ଅନ୍ୟାନ୍ୟ ଆବର୍ଜନା ଭରି ରହୁଛି। ଫଳରେ ସ୍ଥାନୀୟ ଲୋକମାନେ ଏହାକୁ ପାନୀୟ ଜଳଭାବେ ବ୍ୟବହାର ନକରି ନର୍ଦ୍ଦମାରେ ଢାଳିଦେଉଛନ୍ତି।
ଜଳ ଯୋଗାଣ ପାଇଁ ବିଭାଗ ଠିକାଦାର ନିଯୁକ୍ତି କରିଛି। ଠିକାଦାରମାନେ ପାନୀୟ ଜଳଯୋଗାଣ କରୁଛନ୍ତି। ଏନେଇ ସରକାରଙ୍କ ପକ୍ଷରୁ ପରେ ଲକ୍ଷଲକ୍ଷ ଟଙ୍କା ଉଠାଇବେ। ମାତ୍ର ପ୍ରଦାନ କରୁଥିବା ପାଣିକୁ ଲୋକମାନେ ପାନୀୟ ଜଳ ଭାବେ ବ୍ୟବହାର କରିପାରୁ ନାହାନ୍ତି। ତେବେ ଏନେଇ ବିଭାଗୀୟ ଅଧିକାରୀ ଉଚିତ ପଦକ୍ଷପ ଗ୍ରହଣ କରିବାକୁ ପୂର୍ବତନ ପଂଚାୟତ ସମିତି ଅଧ୍ୟକ୍ଷ ତଥା ସ୍ଥାନୀୟ ସମାଜସେବୀ ପ୍ରଶାନ୍ତ କୁମାର ବେହେରା ଦାବୀ କରିଛନ୍ତି। ଏନେଇ ବିଭାଗୀୟ କନିଷ୍ଠ ଯନ୍ତ୍ରୀ ମାନସୀ ବେହେରାଙ୍କୁ ସେ ଏଡି ଅଭିଯୋଗର ତଦନ୍ତ କରି ଉଚିତ ପଦକ୍ଷେପ ଗ୍ରହଣ କରିବେ ବୋଲି ପ୍ରକାଶ କରିଛନ୍ତି।
