ଭୁବନେଶ୍ବର: କରୋନା ସହ ଦୃଢ ମୁକାବିଲା କରିବାରେ ରାଜ୍ୟ ସରକାର ସବୁ ପ୍ରକାରର ପଦକ୍ଷେପ ନେଉଛନ୍ତି। କରୋନା ଆକ୍ରାନ୍ତଙ୍କୁ ଚିହ୍ନଟ କରିବା ପରେ ତାଙ୍କର କଣ୍ଟାକ୍ଟ ଟ୍ରେସିଂ କରିବା ଚିହ୍ନଟ ହୋଇଥିବା ସ୍ଥାନକୁ କଣ୍ଟେନମେଣ୍ଟ ଜୋନ୍ ଘୋଷଣା କରି ବ୍ୟାପକ ପଦକ୍ଷେପ ଗ୍ରହଣ କରୁଛନ୍ତି। ଏହି କ୍ରମରେ ରାଜ୍ୟ ସରକାର କରୋନା ଆକ୍ରାନ୍ତ ଯାତ୍ରା ବିବରଣୀର ସମ୍ପୂର୍ଣ୍ଣ ସୂଚନା ପ୍ରଦାନ କରୁଛନ୍ତି। ଯେପରିକି କରୋନା ଚେନ୍କୁ ଭାଙ୍ଗିବାରେ ଆମେ ସଫଳ ହୋଇପାରିବା। ଆଜି ରାଜ୍ୟ ସରକାର ଚିହ୍ନଟ ହୋଇଥିବା ପାଞ୍ଚ ଜଣ କରୋନା ଆକ୍ରାନ୍ତଙ୍କ ଯାତ୍ରା ବିବରଣୀ ପ୍ରଦାନ କରିଛନ୍ତି। ତେବେ ଏହି ଯାତ୍ରା ବିବରଣୀକୁ ନେଇ ଏବେ ପ୍ରଶ୍ନ ଉଠିଛି।
ମିଳିଥିବା ସୂଚନା ଅନୁସାରେ ଆଜି ରାଜ୍ୟ ସରକାର 57 ନମ୍ବର ଆକ୍ରାନ୍ତଙ୍କ ତଥ୍ୟ ପ୍ରଦାନ କରିଥିଲେ। କିନ୍ତୁ ଏବେ ତଥ୍ୟରେ ପରିବର୍ତ୍ତନ ହୋଇଛି। ସୂଚନା ଓ ଲୋକ ସମ୍ପର୍କ ବିଭାଗ ତଥ୍ୟ ପରିବର୍ତ୍ତନ କରାଯାଇଛି।
ପ୍ରଥମରୁ ଜାରି ହୋଇଥିବା ସୂଚନାରେ ଆକ୍ରାନ୍ତ ଜଣକ ହାଟ, ବଜାର ବୁଲିବା ସହିତ ଗଣେଶ ମଣ୍ଡପ, ପରିବା ଦୋକାନ, ରିଲାଏନ୍ସ ଫ୍ରେସ୍ ମଧ୍ୟ ଯାଇଥିଲେ ବୋଲି ସୂଚନା ଦିଆଯାଇଥିଲା।କିନ୍ତୁ କିଛି ସମୟ ପରେ ଅପଲୋଡ୍ ଡାଟାରେ ହାଟ ବଜାର ବୁଲିବା ତଥ୍ୟ ଗାଏବ ରହିଛି।
ସୂଚନାଯୋଗ୍ୟ, ବମିଖାଲର ତିନି ଆକ୍ରାନ୍ତ 57, 58 ଏବଂ 59 ରିଲାଏନ୍ସ ଫ୍ରେଶ୍ ଯାଇଥିଲେ। ମାର୍ଚ୍ଚ 22ରୁ ଏପ୍ରିଲ୍ 13 ପର୍ଯ୍ୟନ୍ତ ବେବିଲୋନ୍ ଆପାର୍ଟମେଣ୍ଟରେ ଅବସ୍ଥାନ କରିଥିଲେ। ଗଣେଷ ମଣ୍ଡପ ପରିବା ଦୋକାନ ଏବଂ ଓଭରବ୍ରିଜ୍ ନିକଟସ୍ଥ ରିଲାଏନ୍ସ ଫ୍ରେଶ୍ ଯାଇଥିବା ଜଣାପଡିଛି। ଏହି ତିନି ଆକ୍ରାନ୍ତ ଆକ୍ରାନ୍ତ ନମ୍ବର 7,8,22 ଏବଂ 39ଙ୍କ ସଂସ୍ପର୍ଶରେ ଆସିଥିଲେ।
57ନମ୍ବର ଆକ୍ରାନ୍ତ ଜଣକ କଣ୍ଟେନମେଣ୍ଟ ଅଞ୍ଚଳରୁ ଚିହ୍ନଟ ହୋଇଥିବାବେଳେ ତାଙ୍କର ଯାତ୍ରା ବିବରଣୀକୁ ଦେଖି ପ୍ରଶ୍ନ ଉଠିଥିଲା। ବିଭିନ୍ନ ମହଲରେ ପ୍ରଶ୍ନ ଉଠିବାରୁ ତଥ୍ୟ ବଦଳାଇଥିବାର ଆଲୋଚନା ହେଉଛି। ତେବେ ପ୍ରକୃତ ସତ୍ୟଟି କ’ଣ ତା’ ନେଇ ଏବେ ସନ୍ଦେହ ଉଠୁଛି। ପ୍ରଥମରୁ ଦିଆଯାଇଥିବା ତଥ୍ୟକୁ ଯଦି ଆମେ ଗ୍ରହଣ କରିବା ତେବେ ତାହା ସରକାରଙ୍କୁ ଦ୍ବନ୍ଦ୍ବରେ ପକାଉଥିବାବେଳେ ଦ୍ବିତୀୟ ତଥ୍ୟଟି ଆମମାନଙ୍କୁ ଦ୍ବନ୍ଦ୍ବରେ ପକାଉଛି। ଦେଶ ତଥା ରାଜ୍ୟର ସଂକଟ ସମୟରେ ସଠିକ୍ ତଥ୍ୟ ସହ ଉଚିତ୍ ପଦକ୍ଷେପ ନେବା ଆଜିର ସମୟରେ ବଡ ଆବଶ୍ୟକତା ହୋଇପଡିଛି।
