ନୂଆଦିଲ୍ଲୀ : ଦେଶରେ ଜାରି ହୋଇଥିବା ଦ୍ବିତୀୟ ପର୍ଯ୍ୟାୟ ଲକ୍ ଡାଉନ୍ ମେ ତିନି ପର୍ଯ୍ୟନ୍ତ ଜାରି ରହିବ । ଏଥିପାଇଁ ସରକାଣଙ୍କ ତରଫରୁ ଗାଇଡ୍ ଲାଇନ୍ ଜାରି ହୋଇଛି । ନୂତନ ଗାଇଡ୍ ଲାଇନ୍ରେ କିଛି ସେବାକୁ କଟକଣାରୁ ମୁକ୍ତ କରାଯାଇଛି । ତେବେ ଆସନ୍ତୁ ଜାଣିବା ଲକ୍ ଡାଉନ୍ ସମୟରେ କଟକଣାରୁ କିଏ ସବୁ ବାଦ୍ ପଡିଛନ୍ତି ।
ସରକାରଙ୍କ ନିର୍ଦ୍ଦେଶ ଅନୁସାରେ ଏକ ସପ୍ତାହ ପର୍ଯ୍ୟନ୍ତ ଲକ୍ ଡାଉନ୍ ବେଶ୍ କଡାକଡି ଭାବେ ପାଳନ ହେବ । ଏପ୍ରିଲ୍ 20 ପରେ ଏହାର ମୂଲ୍ୟାଙ୍କନ କରାଯିବ । ଏହାର ସମୀକ୍ଷା ପରେ କିଛି କଟକଣାରୁ ବାଦ୍ ଦିଆଯିବ । ତେବେ ହଟସ୍ପଟ୍ ଅଞ୍ଚଳରେ ଏହି ସବୁ ରିହାତି ମିଳିବ ନାହିଁ।
ଲକ୍ ଡାଉନ୍ ସମୟରେ କୃଷିଜାତ ସମାଗ୍ରୀ, କୃଷି ଯନ୍ତ୍ରପାତି ମରାମତି ଦୋକାନ ଆଦି ଖୋଲା ରହିବ । ପେଟ୍ରୋଲ୍ ପମ୍ପ୍ ପାଖ ଏନ୍ଏଚ୍ରେ ମାଲ୍ବାହୀ ଗାଡି ମରାମତି ଦୋକାନ ଖୋଲିବ। ମତ୍ସ୍ୟ କାରବାର ସମ୍ବନ୍ଧୀୟ ସମସ୍ତ କାର୍ଯ୍ୟ ସ୍ବାଭାବିକ ରହିବ । ସେହିପରି ମନରେଗା କାର୍ଯ୍ୟ ଚାଲିବ, କିଛି ଶିଳ୍ପ ସହ ସହଜ ଜଡିତ କାର୍ଯ୍ୟ ଚାଲୁ ରହିବ ।
ସେହିପରି ଆଇଟି କମ୍ପାନୀଗୁଡିକ 50 ପ୍ରତିଶତ କର୍ମଚାରୀଙ୍କ ଦ୍ବାରା ଅଫିସ୍ ଖୋଲିପାରିବେ ।
ସେହିପରି ଗ୍ରାମାଞ୍ଚଳରେ ସଡକ ଓ କୋଠା ନିର୍ମାଣ ପାଇଁ ଅନୁମତି ମିଳିଛି । ଏତଦ୍ବ୍ୟତୀତ ମୋଟର ମେକାନିକ୍ ଓ ବଢେଇଙ୍କୁ ମଧ୍ୟ କାମ କରିବାକୁ ଅନୁମତି ମିଳିଛି ।
ଅତ୍ୟାବଶ୍ୟକ ସାମଗ୍ରୀ ଓ ମେଡ଼ିସିନ୍ର ଉତ୍ପାଦନ ଜାରି ରହିବ । ଅତ୍ୟାବଶ୍ୟକ ସାମଗ୍ରୀ ପରିବହନ ପାଇଁ ଅନୁମତି ମିଳିଛି । ଗ୍ରାମୀଣ ଅଞ୍ଚଳରେ ଶିଳ୍ପ କାର୍ଯ୍ୟ ଜାରି ରହିବ । କେବଲ ଟିଭି, ଡିଟିଏଚ୍, ଟେଲିଫୋନ୍ ସମେତ ଆବଶ୍ୟକ ସେବା ଜାରି ରହିବ ।
ସେହିପରି ଆବଶ୍ୟକୀୟ ସେବା ପାଇଁ ଅନୁମତି ମଧ୍ୟ ମିଳିଛି । ଆୟୁଷ ସମେତ ସମସ୍ତ ହସ୍ପିଟାଲ୍, କ୍ଲିନିକ୍ ଖୋଲା ରହିବ । ଏପିଏମସି ଦ୍ବାରା ପରିଚାଳିତ ସମସ୍ତ ମିଡିଆ. ପେଟ୍ରୋଲ୍ ପମ୍ପ୍ ଖୋଲା ରହିବ । କୋରିଅର୍ ସେବାକୁ ମଧ୍ୟ ଅନୁମତି ଦିଆଯାଇଛି ।
ଏହି ସମୟରେ ବିଦ୍ୟୁତ ସରବରାହ ଜାରି ରହିବ, ଶୀତଳ ଭଣ୍ଡାର କାର୍ଯ୍ୟକ୍ଷମ ହେବ ସେହିପରି ଘରୋଇ ସିକ୍ୟୁରିଟି ସେବା ଉପରେ ପ୍ରତିବନ୍ଧକ ଲଗାଯିବ ନାହିଁ । ସରକାରୀ ତଥ୍ୟ ପ୍ରଦାନ ତଥା କଲ୍ ସେଣ୍ଟର କଟକଣାରୁ ବାଦ୍ ରହିବ । ନୂତନ ଗାଇଡ୍ ଲାଇନ୍ ହିସାବରେ ଇ କମର୍ସ କମ୍ପାନୀକୁ ମଧ୍ୟ ଅନୁମତି ମିଳିଛି । ସେହିପରି ଲକ୍ ଡାଉନ୍ରେ ଫସି ରହିଥିବା ଲୋକଙ୍କ ପାଇଁ ହୋଟେଲ୍ ଓ ଲଜ୍ ଖୋଲିବାର ମଧ୍ୟ ସୂଚନା ରହିଛି ।
ସେହିପରି ସମ୍ପ୍ରତି ରବି ଫସଲ ଅମଳ କରିବାର ସମୟ । ଲକ୍ ଡାଉନ୍ ଯୋଗୁଁ ଫସଲ ଅମଳ କରିବା ପାଇଁ ଶ୍ରମିକ ମିଳୁନଥିବାରୁ ସରକାରଙ୍କ ନୂତନ ଗାଇଡ୍ ଲାଇନ୍ ଅନୁସାରେ କୃଷି କ୍ଷେତ୍ରକୁ କଟକଣାମୁକ୍ତ କରାଯାଇଛି । (ଏଜେନ୍ସି)