ଗାଙ୍ଗଟକ୍ : ସିକ୍କିମ୍ ସୀମାରେ ଭାରତ ଏବଂ ଚୀନ୍ ସୈନିକଙ୍କ ମଧ୍ୟରେ ଝଗଡା ଲାଗିଛି । ରବିବାର ଲାଗିଥିବା ଏହି ଝଗଡାରେ ଉଭୟ ପକ୍ଷର ପ୍ରାୟ 11 ଜଣ ଯବାନ ଆହତ ହୋଇଛନ୍ତି । ରବିବାର କୌଣସି କାରଣରୁ ଉଭୟ ପକ୍ଷଙ୍କ ମଧ୍ୟରେ ଝଗଡା ଲାଗିବା କାରଣରୁ 4 ଜଣ ଭାରତୀୟ ଯବାନ ଏବଂ 7 ଜଣ ଚୀନ୍ ଯବାନ ଆହତ ହୋଇଛନ୍ତି । ନାକୁ ଲା ନିୟନ୍ତ୍ରଣ ରେଖା ନିକଟରେ ଉଭୟ ପକ୍ଷର ବରିଷ୍ଠ ଅଧିକାରୀଙ୍କ ମଧ୍ୟରେ କଥା କଟାକଟି ହେବା ପରେ ଏହି ଝଗଡା ଆରମ୍ଭ ହୋଇଥିଲା । 5 ହଜାର ମିଟରର ଏହି ନିୟନ୍ତ୍ରଣ ରେଖାରେ ଉଭୟ ପକ୍ଷର ସେନା ପରସ୍ପର ସହିତ ଲଢେଇ କରିବା ସହିତ ହାତହାତି ଯାଏଁ କଥା ଯାଇଥିଲା । ପ୍ରାୟ 150ରୁ ଅଧିକ ସେନା ପରସ୍ପର ସହିତ ଲଢେଇ କରିଥିଲେ । ଉଲ୍ଳେଖଯୋଗ୍ୟ ଯେ, କିଛିଦିନ ପୂର୍ବରୁ ସ୍ଥଳସେନା ମୁଖ୍ୟ ଏମ୍ ଏମ୍ ନରାଓ୍ବଣେଙ୍କ ଗସ୍ତ ପରଠାରୁ ଉଭୟ ପକ୍ଷଙ୍କ ମଧ୍ୟରେ ବିବାଦ ଲାଗି ରହିଛି । ନରାଓ୍ବଣେ ସୁକ୍ନା, ବିନ୍ନାଗୁରୀ ଏବଂ ପାନାଗଡ ନିୟନ୍ତ୍ରଣ ରେଖା ଭ୍ରମଣ କରିଥିଲେ । 2017 ମସିହାରେ ମଧ୍ୟ ଉଭୟ ପକ୍ଷର ସେନା ପରସ୍ପରକୁ ପଥର ଫିଙ୍ଗି ଆକ୍ରମଣ କରିଥିଲେ ।
