ସୀତାରାମ ଅଗ୍ରଓ୍ବାଲ
ବାଣପୁର: ବାଣପୁର ଥାନାର ସବ ଇନ୍ସପେକ୍ଟର ଦିଗବିଜୟ ବିଶ୍ୱାଳଙ୍କ ବଦଳି ବାତିଲ ଦାବିରେ ଆଜି ବାଣପୁର ବ୍ଲକ ର ୧୫ ଗୋଟି ସ୍ୱୟଂ ସହାୟିକା ମହିଳା ଗୋଷ୍ଠୀର ସଭାପତି ଓ ସମ୍ପାଦିକା ଓ ସଭ୍ୟମାନେ ବାଣପୁର ଥାନା ପରିସରରେ ଧାରଣା ଦେବା ସହ ଖୋର୍ଦ୍ଧା ଜିଲ୍ଲା ଆରକ୍ଷୀ ଅଧିକ୍ଷିକଙ୍କ ଉଦେଶ୍ୟରେ ଏକ ଦାବିପତ୍ର ବାଣପୁର ଥାନାଧିକାରୀ ସଞ୍ଜୟ ପଟ୍ଟନାୟକଙ୍କୁ ପ୍ରଦାନ କରିଛନ୍ତି।
ପୂର୍ବରୁ ଏହି ମହିଳାମାନେ ଗତ ୫ ତାରିଖରେ ବାଲୁଗାଁ ଉପଖଣ୍ଡ ପୋଲିସ ଅଧିକାରୀ ସୁରେଶ କୁମାର ଦାସଙ୍କୁ ମଧ୍ୟ ଏନେଇ ଏକ ଦାବିପତ୍ର ପ୍ରଦାନ କରିଥିଲେ। ଥାନାଧିକାରୀ ଦାବିପତ୍ର ଗ୍ରହଣ କରି ଦୁଇ ଦିନ ସମୟ ମାଗିଛନ୍ତି ଓ ଜିଲ୍ଲା ଆରକ୍ଷୀ ଅଧିକ୍ଷିକଙ୍କୁ ଉକ୍ତ ଦାବିପତ୍ର ପ୍ରଦାନ କରି ତାଙ୍କୁ ଅବଗତ କରେଇବେ ବୋଲି ପ୍ରତିଶୃତି ମଧ୍ୟ ଦେଇଛନ୍ତି। ଯଦି ଦୁଇ ଦିନ ମଧ୍ୟରେ ଦିଗବିଜୟ ବିଶ୍ୱାଳଙ୍କ ବଦଳି ଅର୍ଡର ବାତିଲ ନହୁଏ ତେବେ ସ୍ବୟଂ ସହାୟକ ମହିଳା ଗୋଷ୍ଠୀର ମହିଳାଙ୍କ ସହ ଶହ ଶହ ମହିଳା ବାଣପୁର ଥାନା ଘେରାଉ କରିବେ ବୋଲି ଗଣମାଧ୍ୟମ ସମ୍ମୁଖରେ ମତ ପ୍ରକାଶ କରିଛନ୍ତି। ସେମାନଙ୍କ ଦାବି ପୂରଣ ନ ହେଲେ ସେମାନେ ଖୋର୍ଦ୍ଧା ଏସ୍ପି ଓ ମୁଖ୍ୟମନ୍ତ୍ରୀଙ୍କ ପାଖକୁ ଯିବାକୁ ପଛେଇବେ ନାହିଁ ବୋଲି ସୂଚନା ଦେଇଛନ୍ତି। ଜଣେ କର୍ତ୍ତବ୍ୟନିଷ୍ଠ ଦାୟିତ୍ବବାନ ପୋଲିସ କର୍ମୀଭାବେ ଶ୍ରୀ ବିଶ୍ବାଳ ଗରିବ ଲୋକମାନଙ୍କୁ ଉଚିତ୍ ନ୍ୟାୟ ପ୍ରଦାନ କରି ଆସୁଥିବାରୁ ଦଳ ମତ ନିର୍ବିଶେଷରେ ତାଙ୍କୁ ସମେସ୍ତ ସମର୍ଥନ କରିଛନ୍ତି। ବାଣପୁରରେ ପ୍ରଥମଥର ଭାବେ ଜଣେ କର୍ତ୍ତବ୍ୟରତ ପୋଲିସ୍ ଅଧିକାରୀଙ୍କ ସପକ୍ଷରେ ମହିଳାଙ୍କ ଅତୁଟ ସମର୍ଥନ ଦେଖିବାକୁ ମିଳିଛି।
ପୋଲିସ୍ ଅଧିକାରୀଙ୍କ ସପକ୍ଷରେ ଆନ୍ଦୋଳନ କରିଥିବା ଏହି ମହିଳା ଗୋଷ୍ଠୀର ନେତୃତ୍ବ ନେଇଥିଲେ ବାସନ୍ତୀ ମହାରଣା, ସୁକାନ୍ତି ପଲେଇ, କୁନିବାଳା ଭୁଜବଳ, ଲକ୍ଷ୍ମୀ ଖଟେଇ, ଜାନକୀ ବିଶୋଇ ଆଦି ମହିଳା ନେତ୍ରୀ। ମହିଳାଙ୍କ ସୁରକ୍ଷା ତଥା ଗ୍ରାମାଞ୍ଚଳରେ ଚାଲୁଥିବା ବେଆଇନ ମଦ ବିକ୍ରି ଉପରେ ଲଗାମ ଦେବାରେ ଶ୍ରୀବିଶ୍ବାଳଙ୍କ କାର୍ଯ୍ୟ ପ୍ରଶଂସନୀୟ ରହିଛି। ସମ୍ପ୍ରତି ବାଣପୁର ଅଞ୍ଚଳରେ ବହୁ ବେଆଇନ ମଦ କାରାବାର ଠପ୍ ହେବା ସହିତ ଘରୋଇ ହିଂସାରେ ମଧ୍ୟ କମ୍ ଆସିଥିବାର ଦେଖାଯାଇଛି। ଜଣେ କର୍ତ୍ତବ୍ୟନିଷ୍ଠ ପୋଲିସ ଅଧିକାରୀଙ୍କୁ ବଦଳି ନ କରିବା ପାଇଁ ମହିଳାମାନେ ଦାବି କରିଛନ୍ତି। ବାଣପୁର ଥାନା ଆଇଆଇସି ସଞ୍ଜୟ ପଟ୍ଟନାୟକ ଓ ସବ୍ ଇନ୍ସପେକ୍ଟର ଦିଗ୍ବିଜୟ ବିଶ୍ବାଳଙ୍କ କାର୍ଯ୍ୟକୁ ସେହି ଅଞ୍ଚଳରେ ସମେସ୍ତ ପ୍ରଶଂସା କରୁଥିବାବେଳେ ସବ୍ଇନ୍ସେପକ୍ଟରଙ୍କ ବଦଳି ବାତିଲ୍ କରିବାକୁ ଦାବି ଜଣାଇଛନ୍ତି ମହିଳା ଗୋଷ୍ଠୀ।
