କନ୍ଦର୍ପ ବେହେରା
ରେଢାଖୋଲ : ଗତକାଲି ରେଢାଖୋଲ ବଣିଆଁବନ୍ଧରେ ଭାଲୁ ମଣିଷ ଲଢେଇରେ ୨ ଜଣବ୍ୟକ୍ତିଙ୍କର ମୃତ୍ୟୁହୋଇଥିବା ବେଳେ ଜଣେ ଆହତ ହୋଇଥିବା ଖବର ହସ୍ତଗତ ହୋଇଥିଲା। ଦୁଇ ଜଣ ବ୍ୟକ୍ତି ଜୀବନ ବିକଳରେ ଗଛ ଉପରକୁ ଚଢି ଜୀବନକୁ ବଂଚାଇଦେଇଥିଲେ। ଆହତ ହୋଇଥିବା ବ୍ୟକ୍ତିଜଣଙ୍କ କୌଶଳ କ୍ରମେ ଗାଁକୁ ପଳାଇବାରେ ସକ୍ଷମ ହୋଇଥିଲେ। ରେଢାଖୋଲ ଅଂଚଳରେ ଏଇ ଘଟଣାଟି ଚାଂଚଲ୍ୟ ସୃଷ୍ଟି କରିଛି ।
ରେଢାଖୋଲ ଅଂଚଳ ହେଉଛି ଅରଣ୍ୟାଚ୍ଛାଦିତ୍ୟ ଅଂଚଳ। ରେଢାଖୋଲ ଅଂଚଳରେ ହାତୀ ମଣିଷ ମଧ୍ୟରେ ଲଢେଇ ଚାଲିଥିବା ବେଳେ ଏବେ ଭାଲୁ ମଣିଷ ଲଢେଇ ଚାଲିଛି। ଏଇ କିଛି ବର୍ଷ ହେଲା ରେଢାଖୋଲ ଉପଖଣ୍ଡରେ ହାତୀ ଆକ୍ରମଣରେ ବହୁ ଧନ ଜୀବନ ଗଲାଣି। ଏବେ ଭାଲୁ ଆକ୍ରମଣରେ ମଧ୍ୟ ଜୀବନ ହାରିବାକୁ ପଡିଛି ଦୁଇ ଜଣଙ୍କର। ଲୋକମାନଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି। ଗତକାଲି ବଡବାହାଳ ରେଞର ବଣିଆଁବନ୍ଧର ୫ ଜଣ ନିକଟସ୍ଥ ଟାଲ ଗ୍ରାମ ଜଙ୍ଗଲକୁ ମହୁ ସଂଗ୍ରହ ପାଇଁ ଯାଇଥିବା ବେଳେ ଏଇ ଅଭାବନୀୟ ଘଟଣା ଘଟିଥିଲା। ଭାଲୁ ଓ ୫ ଜଣ ଲୋକ ମଧ୍ୟରେ ହିଁ ଲଢେଇ ହୋଇଥିଲା। ଆଜି ଭାଲୁର ଶବ ବ୍ୟବଚ୍ଛେଦ କରାଯିବ ବୋଲି ବୋଲି ଜଣା ପଡିଛି। ରଜ ପର୍ବକୁ ଆଖି ଆଗରେ ରଖି ରେଢାଖୋଲ ଅଂଚଳର ଲୋକମାନେ ମହୁସଂଗ୍ରହ ପାଇଁ ଜଙ୍ଗଲ ଯାଇଥାନ୍ତି। ମହୁସଂଗ୍ରହ କରି ଘରକୁ ଆସି ସାହି ପଡିଶା ଓ ସଂପର୍କିୟମାନଙ୍କୁ ଦେଇଥାନ୍ତି। ରେଢାଖୋଲ ଅଂଚଳରେ ରଜସଂର୍କାନ୍ତି ଦିନ ମହୁଖାଇବା ପରଂପରା କେଉଁ ଆବାହାମାନ କାଳରୁ ରହି ଆସିଛି । ତେଣୁ ବଣୀଆଁବନ୍ଧ ଗ୍ରାମର ଲୋକମାନେ ଏହି ପରଂପରାକୁ ବଜାୟ ରଖିବା ପାଇଁ ମହୁ ସଂଗ୍ରହପାଇଁ ଜଙ୍ଗଲକୁ ଯାଇଥିଲେ। ହେଲେ ମହୁ ସଂଗ୍ରହ ବଦଳରେ ସେମାନେ ଭାଲୁ ହାବୁଡରେ ପଡି ୨ ଜଣ ମୃତ୍ୟୁବରଣ କଲେ । ଗାଆଁରେ ଶୋକର ଛାୟା ଖେଳିଯାଇଛି। ସରକାର ମୃତ ପରିବାରକୁ ଆର୍ଥିକ ସହଯୋଗ ପ୍ରଦାନ କରିବାକୁ ଦାବୀ କରିଛନ୍ତି ଗ୍ରାମବାସୀ।