ଲୋକସଭା ନିର୍ବାଚନ ସହ ଜମ୍ମୁ-କାଶ୍ମୀରର ବିଧାନସଭା ନିର୍ବାଚନ ନ ହେବାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ନ୍ୟାସନାଲ୍ କନ୍ଫେରନ୍ସ ନେତା ଫାରୁକ୍ ଅବଦୁଲ୍ଲା । ଫାରୁକ୍ କେନ୍ଦ୍ର ସରକାରଙ୍କୁ ସିଧା ଟାର୍ଗେଟ୍ କରି କହିଛନ୍ତି ଯେ, ଏହା ହେଉଛି ମୋଦି ସରକାରଙ୍କ ବିଫଳତା, ଯେଉଁଥିପାଇଁ କାଶ୍ମୀରର ଅବସ୍ଥା ଏହିପରି ରହିଛି । ଯେତେବେଳେ ସବୁ ଦଳ ରାଜ୍ୟରେ ଲୋକସଭା ନିର୍ବାଚନ ସହ ବିଧାନସଭା ନିର୍ବାଚନ ହେଉ ବୋଲି ଚାହୁଁଛନ୍ତି ସେତେବେଳେ ଏହା କ’ଣ ପାଇଁ କରାଯାଉନାହିଁ । ଯଦି ଲୋକସଭା ନିର୍ବାଚନ ପାଇଁ କାଶ୍ମୀର ସ୍ଥିତି ଅନୁକୂଳ ରହିଛି, ତେବେ ବିଧାନସଭା ପାଇଁ କାହିଁକି ନୁହେଁ, ବୋଲି ଫାରୁକ୍ ପ୍ରଶ୍ନ କରିଛନ୍ତି । ସ୍ଥାନୀୟ ପଞ୍ଚାୟତ ନିର୍ବାଚନ ଶାନ୍ତିପୂର୍ଣ୍ଣ ସହିତ ହୋଇପାରିଲା, ଏଠାରେ ପର୍ଯ୍ୟାପ୍ତ ପରିମାଣରେ ସୁରକ୍ଷା ବଳ ଅଛନ୍ତି, ତେବେ ବିଧାନସଭା ନିର୍ବାଚନ ନ ହେବା ନେଇ କ୍ଷୋଭ ପ୍ରକାଶ କରିଛନ୍ତି ଫାରୁକ୍। ସୂଚନାଯୋଗ୍ୟ, ଜମ୍ମୁ କାଶ୍ମୀରର ସମ୍ବେଦନଶୀଳ ସ୍ଥିତି ତଥା ବର୍ତ୍ତମାନ ଦେଖି ନିର୍ବାଚନ କମିଶନ ଜମ୍ମୁ କାଶ୍ମୀରରେ ବିଧାନସଭା ନିର୍ବାଚନ ହେବ ନାହିଁ ବୋଲି ଘୋଷଣା କରିଥିଲେ । ସେହିପରି ଭାରତ ପକ୍ଷରୁ କରାଯାଇ ବାଲାକୋଟ୍ ଏୟାର୍ଷ୍ଟ୍ରାଇକ୍କୁ ନେଇ ବିବାଦୀୟ ବୟାନ ଦେଇଛନ୍ତି ଫାରୁକ୍ । ନିର୍ବାଚନ ପାଇଁ ଏହି ଏୟାର୍ ଷ୍ଟ୍ରାଇକ୍ କରାଯାଇଥିଲା ବୋଲି ଫାରୁକ୍ କହିଛନ୍ତି । ଆମର ଗୋଟିଏ ଏୟାର କ୍ରାପ୍ଟ ନଷ୍ଟ ହେଲା କିନ୍ତୁ ଆମେ ଆମ ଉଇଙ୍ଗ୍ କମାଣ୍ଡରଙ୍କୁ ସୁରକ୍ଷିତ ଅବସ୍ଥାରେ ସ୍ବଦେଶରେ ଫେରିପାଇଲୁ ବୋଲି ସେ ସନ୍ତୋଷ ବ୍ୟକ୍ତ କରିଛନ୍ତି ।
airstrike only for vote bank politics, says farroq