ମାଲାକାନାଗିରି ପୋଲିସ୍ କ୍ୟାଣ୍ଟିନ୍ରେ କାମ କରୁଥିବା ଜନୈକ ମହିଳାଙ୍କ ରହସ୍ୟଜନକ ମୃତ୍ୟୁ ଘଟଣାର ଉଚ୍ଚସ୍ତରୀୟ ନିରପେକ୍ଷ ତଦନ୍ତ ପାଇଁ ରାଜ୍ୟ ମାନାବାଧିକାରଙ୍କ ଦ୍ୱାରସ୍ଥ ହୋଇଛି କଂଗ୍ରେସ । ଆଜି ଅବସରପ୍ରାପ୍ତ ଡିଜି ତଥା ଅଖିଳ ଭାରତୀୟ କଂଗ୍ରେସ କମିଟି ଅନୁସୂଚିତ ଜନଜାତି ବିଭାଗର ଜାତୀୟ ଉପସଭାପତି ଶ୍ୟାମସୁନ୍ଦର ହାଂସଦାଙ୍କ ନେତୃତ୍ୱରେ ଏକ ୭ଜଣିଆ ପ୍ରତିନିଧି ଦଳ ରାଜ୍ୟ ମାନବାଧିକାର କମିଶନଙ୍କ ଅଧ୍ୟକ୍ଷ ଶ୍ରୀ ଜଷ୍ଟିସ୍ ବି.ପି ଦାସଙ୍କୁ ଭେଟି ଏହି ଘଟଣାର ନିରପେକ୍ଷ ଉଚ୍ଚସ୍ତରୀୟ ତଦନ୍ତ ସମେତ ଦୋଷୀଅଧିକାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଏବଂ ପରିବାରଙ୍କୁ କ୍ଷତିପୂରଣ ପାଇଁ ଏକ ସ୍ମାରକପତ୍ର ପ୍ରଦାନ କରିଛନ୍ତି । ପ୍ରକାଶଯୋଗ୍ୟ ଯେ ଗତ ୭ମଇ ୨୦୨୦ ରିଖ ଦିନ ପୋଲିସ୍ କ୍ୟାଣ୍ଟିନ୍ରେ କାମକରୁଥିବା ସଂପୃକ୍ତ ମହିଳା ମୁମୂର୍ଷ ଅବସ୍ଥାରେ ପଡିଥିବା ଅବସ୍ଥାରେ ତାଙ୍କ ସ୍ୱାମୀ ଦେଖିବାକୁ ପାଇଥିଲେ ।
ପତ୍ନୀଙ୍କ ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ସହ ସମ୍ବେଦନଶୀଳ ଅଙ୍ଗରେ ଗଭୀର କ୍ଷତ ହୋଇଥିବା ଦେଖି ଚୁରନ୍ତ ଚିକିତ୍ସାପାଇଁ ତାଙ୍କୁ ମାଲକାନଗିରି ଜିଲ୍ଲା ହସ୍ପିଟାଲରେ ଭର୍ତି କରିଥିଲେ । ୩ ଦିନର ଚିକିତ୍ସା ପରେ ମଧ୍ୟ ପୀଡିତାଙ୍କ ଚେତା ନଫେରିବାରୁ ୧୧ ତାରିଖ ସକାଳେ ତାଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ୍ କଲେଜକୁ ସ୍ଥାନାନ୍ତର କରାଯାଇଥିଲା । କିନ୍ତୁ କିଛି ସୁଫଳ ନ ମିଳିବାରୁ ରାତିରେ ତାଙ୍କୁ ବ୍ରହ୍ମପୁର ବଡମେଡିକାଲ୍କୁ ରେଫର୍ କରାଯାଇଥିଲା । ଆମ୍ବୁଲାନ୍ସରେ ନିଆଯାଉଥିବା ସମୟରେ ରାୟଗଡାଠାରେ ତାଙ୍କର ମୃତ୍ୟୁ ହୋଇଯାଇଥିଲା । ତାଙ୍କୁ ଗଣଦୁଷ୍କର୍ମ କରାଯାଇଥିବା ସ୍ୱାମୀ ଅଭିଯୋଗ କରିଥିଲେ ଏବଂ ଏନେଇ ୯ ତାରିଖରେ ମାଲକାନାଗିରି ଥାନାରେ ଏତଲା ମଧ୍ୟ ଦେଇଥିଲେ ।
ପ୍ରଦେଶ କଂଗ୍ରେସ ପକ୍ଷରୁ ମୁଖପାତ୍ର ତଥା ଆଇନଜୀବି ନିଶିକାନ୍ତ ମିଶ୍ରଙ୍କ ଦ୍ୱାରା ଦାଖଲ ପିଟିସନକୁ ଅତ୍ୟନ୍ତ ଗୁରୁତ୍ୱର ସହ ଶୁଣାଣି କରି ଆଜି ମାନ୍ୟବର ଜଷ୍ଟିସ ବି.ପି ଦାସ ଏବଂ ମାନ୍ୟବର ସଦସ୍ୟ ଅସିମ୍ ଅମିତାଭ ଦାସଙ୍କୁ ନେଇ ଗଠିତ ଖଣ୍ଡପୀଠ ରାଜ୍ୟ ସରକାରଙ୍କୁ କାରଣଦର୍ଶାଅ ନୋଟିସ ଜାରି କରିବା ସହିତ ଆସନ୍ତା ୭ ତାରିଖ ସୁଦ୍ଧା ତଦନ୍ତର ସ୍ଥିତି ସଂପର୍କରେ ସବିଶେଷ ବିବରଣୀ ଦାଖଲ କରିବାପାଇଁ କମିଶନ ନିର୍ଦ୍ଦେଶ ଦେଇଛନ୍ତି ।
ଏହି ପ୍ରତିନିଧି ଦଳରେ ଅନ୍ୟମାନଙ୍କ ମଧ୍ୟରେ ନିଶିକାନ୍ତ ମିଶ୍ର, ଜିନେଶ ଦାସ, ଶୁଭଶ୍ରୀ ପଣ୍ଡା, ଅମିତା ବିଶ୍ୱାଳ, କୈଳାସ ମୁଖି, ପ୍ରଦୀପ ମହାପାତ୍ର ପ୍ରମୁଖ ସାମିଲ ଥିଲେ ।