କୋଟଲା ଗ୍ରାଉଣ୍ଡରେ ଖେଳାଯାଇଥିବା ଅନ୍ତିମ ତଥା ନିର୍ଣ୍ଣାୟକ ଦିନିକିଆରେ ଭାରତୀୟ ଦଳ ଅଷ୍ଟ୍ରେଲିଆ ଠାରୁ ପରାସ୍ତ ହୋଇ ଶୃଙ୍ଖଳାକୁ ହାତ ଛଡା କରିଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭ୍ରମଣକାରୀ ଅଷ୍ଟ୍ରେଲିଆ ଦଳ ଧାର୍ଯ୍ୟ ୫୦ ଓଭରରେ ୯ ଉଇକେଟ ହରାଇ ୨୭୨ ରନ୍ କରିଥିଲା। ଏହି ମ୍ୟାଚରେ ଅଷ୍ଟ୍ରେଲିଆ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ଅଷ୍ଟ୍ରେଲିଆ ତରଫରୁ ଉସ୍ମାନ ଖ୍ବାଜା ୧୦୦ ଓ ପିଟର ହାଣ୍ଡସ୍କମ୍ବ ୫୨ ରନ୍ ସଂଗ୍ରହ କରିଥିଲେ। ଭାରତ ପକ୍ଷରୁ ଭୁବନେଶ୍ୱର କୁମାର ୩ଟି, ମହମ୍ମଦ ସାମି ଓ ରବୀନ୍ଦ୍ର ଜାଡେଜା ୨ଟି ଲେଖାଏ ୱିକେଟ ନେଇଥିଲେ। ଭାରତ ୨୭୩ ରନର ଲକ୍ଷ୍ୟକୁ ପୂରଣ କରିବାପାଇଁ ପଡିଆକୁ ଓହ୍ଲାଇଥିଲା। କିନ୍ତୁ ପ୍ରାରମ୍ଭିକ ଯୋଡି ଦଳୀୟ ଖାତାରେ ୧୫ରନ ଯୋଗକରି ପ୍ରଥମ ୱିକେଟ ଶିଖର ଧବନଙ୍କ ରୂପରେ ହରାଇଥିଲା। ଶିଖର କେବଳ ୧୫ବଲରେ ୨ଟି ଚୌକା ସହ ୧୨ରନ କରି ବିଶ୍ରାମ କକ୍ଷକୁ ଫେରିଥିଲେ। ତାପରେ ଅଧିନାୟକ ବିରାଟ କୋହଲି ଦଳର ବ୍ୟାଟିଂ ଭାର ସମ୍ଭାଳିବାକୁ ପଡିଆ ମଧ୍ୟକୁ ଆସିଥିଲେ। କିନ୍ତୁ କୋହଲି ଅଧିକ ସମୟ ପିଚରେ ରହି ରନ ସଂଗ୍ରହ କରିବାରେ ବିଫଳ ହୋଇଥିଲେ। ସେ ମାତ୍ର ୨୨ବଲରେ ୨୦ରନ ଦଳୀୟ ଖାତାରେ ଯୋଗକରି ଷ୍ଟୋଇନିସଙ୍କ ବଲରେ କ୍ୟାଚଆଉଟ ହୋଇ ପାବିଲିଅନକୁ ଫେରିଥିଲେ। ତାପରେ ଭାରତୀୟ ଦଳର ଗୋଟିଏ ପରେ ଗୋଟିଏ ୱିକେଟର ପତନ ଘଟିଥିଲା। ଦଳର ସମୁଦାୟ ସ୍କୋର ୧୩୨ରନ ଥିବାବେଳେ ୬ଟି ମୂଲ୍ୟବାନ ୱିକେଟର ପତନ ଘଟିସାରିଥିଲା। କେଦାର ଯାଦବ ଏବଂ ଭୁବନେଶ୍ବର କୁମାର କିଛି ସମୟ ପିଚରେ ଜମିରହି ଦଳୀୟ ସ୍କୋରକୁ ୨୨୩ ରନରେ ପହଞ୍ଚାଇ କ୍ରମାଗତ ଉଭୟ କ୍ୟାଚ ଆଉଟ ହୋଇ ଜିତିବାର ଆଶାକୁ ପୂରଣ କରିବାରେ ବିଫଳ ହୋଇଥିଲେ। କେଦାର ୫୭ବଲରେ ୪ଟି ଚୌକା ଏବଂ ଗୋଟିଏ ଛକ୍କା ସହାୟତାରେ ୪୪ ରନ, ଭୁବନେଶ୍ବର ୫୪ବଲରେ ୩ଟି ଚୌକା ଦୁଇଟି ଛକ୍କା ସହାୟତାରେ ୪୬ ରନ କରିଥିଲେ। ଏହିପରି ଭାବରେ ଦଳୀୟ ସ୍କୋର ନିର୍ଦ୍ଧାରିତ ଓଭରରେ ସମସ୍ତ ୱିକେଟ ହରାଇ କେବଳ ୨୩୭ରନ କରିବାରେ ସକ୍ଷମ ହୋଇଥିଲା। ଅଷ୍ଟ୍ରେଲିଆ ଦଳ ଏହି ମ୍ୟାଚ ୩୫ ରନରେ ଜିତି ଶୃଙ୍ଖଳାକୁ ୩-୨ରେ ହାସଲ କଲା। ଅଷ୍ଟ୍ରେଲିଆ ଦଳର ଉସମାନ ଖ୍ୱାଜା ମ୍ୟାନ ଅଫ ଦି ମ୍ୟାଚ ଏବଂ ପି.କୁମିନ୍ସ ମ୍ୟାନ ଅଫ ଦି ସିରିଜ ରୂପେ ପୁରଷ୍କୃତ ହୋଇଥିଲେ।