କନ୍ଦର୍ପ ବେହେରା
ରେଢାଖୋଲ: ରେଢାଖୋଲରେ ଦୁଇ ଦିନରେ ୧୯ ଜଣ କରୋନା ପଜିଟିଭ୍ ଚିହ୍ନଟ ହେବା ପରେ ଅଂଚଳରେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟିହୋଇଛି। ଦିନକୁ ଦିନ ଅଂଚଳ ସଙ୍ଗୀନ ହୋଇ ପଡିଛି। ଜିଲ୍ଲାପାଳ ରେଢାଖୋଲ ଗସ୍ତରେ ଆସି ସମୀକ୍ଷା କରି ଫେରିଯାଇଛନ୍ତି।
ଗତକାଲି ଆଉ ୧୨ ଜଣ କରୋନା ପଜିଟିଭ୍ ଚିହ୍ନଟ ହୋଇଥିବା ଜଣା ପଡିଛି। ରେଢାଖୋଲରେ ଗୋଷ୍ଠି ସଂକ୍ରମଣର ଆଶଙ୍କା କରି ରେଢାଖୋଲ ସହରର କଇଥ ସାହି , ଗଣେଶ ନଗର , ନୂଆଁ ସାହି ଓ କୁହି ଗ୍ରାମକୁ କଂଟେନମେଂଟ୍ ଜୋନ୍ ଭାବରେ ଘୋଷଣା କରାଯାଇଛି। ସମ୍ବଲପୁର ଜିଲ୍ଲାପାଳ ସୁଭମ୍ ସାକସେନା ରେଢାଖୋଲ ଡାକ୍ତରଖାନା ବୁଲି ଅଧିକାରୀମାନଙ୍କୁ ଏହାର କଡାମୁକାବିଲା ପାଇଁ ନିର୍ଦ୍ଦେଶ ଦେଇଛନ୍ତି। ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି।
ଏହି ବୈଠକରେ ଜିଲ୍ଲାପାଳ ସମେତ ରେଢାଖୋଲ ସବ୍ଡିଭିଜନର ବିଭିନ୍ନ ପଦାଧିକାରୀ ଯୋଗଦେଇଥିଲେ। ଗତ୧୮ ତାରିଖରେ ରେଢାଖୋଲରେ ୫ଜଣ ପୁରୁଷ ଓ ୭ ଜଣ ମହିଳା କରୋନା ରୋଗୀ ଚିହ୍ନଟ ହୋଇଥିବା ଜଣାପଡିଛି। ସୂଚନା ଯୋଗ୍ୟ ଯେ- ଗତ ୧୭ ତାରିଖରେ ରେଢାଖୋଲ ଏନ୍ଏସିର ଜଣେ କର୍ମଚାରି କରୋନା ଆକ୍ରାନ୍ତ ହୋଇଥିବା ବେଳେ ରେଢାଖୋଲ ଡାକ୍ତରଖାନାର ୧୦୮ ର ଜଣେ କର୍ମଚାରୀ, ରେଢାଖୋଲର ଜଣେ ୧୨ ବର୍ଷର ବାଳକ , , ରେଢାଖୋଲର ଜଣେ ସ୍ଥାନୀୟ ବାସିନ୍ଦା ଥିବା ଜଣା ପଡିଥିଲା। ଠିକ୍ ସେଇ ପରି ରେଢାଖୋଲ ଡାକ୍ତରଖାନାରେ ଚିକିତ୍ସା ହେଉଥିବା ରେଢାଖୋଲ ବ୍ଲକ୍ ର ୨ ଜଣ ଥିବା ବେଳେ ନାକଟିଦେଉଳ ବ୍ଲକ ଡଇଁଚା ପଂଚାୟତର ଗୋପାଳପୁର ଜଣେ କରୋନା ରୋଗୀଥିବା ସରକାରୀ ସୂତ୍ରରୁ ଜଣାପଡିଥିଲା। ସେମାନଙ୍କୁ କୋଭିଡ୍ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା।
ରେଢାଖୋଲ ଅଂଚଳରେ ଦୁଇ ଦିନରେ ୧୯ ଜଣ କରୋନା ରୋଗୀ ଚିହ୍ନଟ ହେବା ପରେ ଅଂଚଳରେ ଗୋଷ୍ଠିସଂକ୍ରମଣର ଆଶଙ୍କା କରାଯାଇଛି। ଲୋକମାନେ ସଚେତନ ହେବାର ସମୟ ଆସିଛି। ଏବେଠୁ ରେଢାଖୋଲ ଅଂଚଳର ଲୋକମାନେ ସଚେତନ ନ ହେଲେ ଏହା ଗୋଷ୍ଠୀ ସଂକ୍ରମଣର ଆଶଙ୍କା ହେବାର ସଂଭାବନା ରହିଛି।