ଭାରତରେ ଲୋକପାଳ ବିଲ୍ ପାଶ୍ ହେବାର ଦୀର୍ଘ ୬ବର୍ଷ ପରେ ଦେଶକୁ ଏହାର ପ୍ରଥମ ଲୋକପାଳ ମିଳିଛି। ପୂବର୍ତନ ସୁପ୍ରିମ୍କୋର୍ଟ ବିଚାରପତି ପିନାକୀ ଚନ୍ଦ୍ର ଘୋଷଙ୍କୁ ଦେଶର ପ୍ରଥମ ଲୋକପାଳ ହେବାର ସୁଯୋଗ ମିଳିଛି। ପୂର୍ବତନ ସଶସ୍ତ୍ର ସୀମାବଳ ମୁଖ୍ୟ ଅଚ୍ଚର୍ନା ରାମସୁନ୍ଦରମ୍, ପୂବର୍ତନ ମହାରାଷ୍ଟ୍ର ମୁଖ୍ୟ ସଚିବ ଦୀନେଶ କୁମାର ଜୈନ, ମହେନ୍ଦ୍ର ସିଂ ଏବଂ ଇନ୍ଦ୍ରଜିତ୍ ପ୍ରସାଦ ଗୌତମଙ୍କୁ ଏହି ଦଳରେ ଅଣନ୍ୟାୟିକ ସଦସ୍ୟ ଭାବରେ ମନୋନୀତ କରାଯାଇଛି। ସେହିପରି ଜଷ୍ଟିସ୍ ଦିଲିପ୍ ବି ଭୋସ୍ଲେ, ପ୍ରଦୀପ କୁମାର ମହାନ୍ତି, ଅଭିଳାଶା କୁମାରୀ ଏବଂ ଅଜୟ କୁମାର ତ୍ରୀପାଠୀଙ୍କୁ ନ୍ୟାୟିକ ସଦସ୍ୟ ଭାବରେ ଏହି ଦୁର୍ନୀତି ନିବାରଣ ବିଭାଗରେ ସାମିଲ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବାଧୀନ କମିଟିର ସୁପାରିଶକୁ ରାଷ୍ଟ୍ରପତି ରାମନାଥ କୋବିନ୍ଦ ମଞ୍ଜୁରୀ ପ୍ରଦାନ କରିବା ପରେ ସରକାରୀ ଭାବରେ ଏହି ନିଷ୍ପତ୍ତିକୁ ମଞ୍ଜୁରୀ ମିଳିଛି। ରାଜ୍ୟ ଗୋଷ୍ଠୀ କ୍ରୀଡା ଦୁର୍ନୀତି ଏବଂ କୋଲ୍ଗେଟ୍ ଦୁର୍ନୀତି ଏବଂ ୨ଜି ଦୁର୍ନୀତି ପରେ ଆନ୍ନା ହଜାରେଙ୍କ ଦ୍ବାରା ୨୦୧୩ରେ ଆରମ୍ଭ ହାେଇଥିବା ଆନ୍ଦୋଳନକୁ ଦୀର୍ଘ ୬ବର୍ଷ ପରେ ସଫଳତା ମିଳିଛି। ଦୀର୍ଘଦିନର ଆନ୍ଦୋଳନ ପରେ ଏହା ଥମି ଯାଇଥିଲେ ମଧ୍ୟ ସର୍ବୋଚ୍ଚ ନ୍ୟାୟାଳୟ ସରକାରଙ୍କ ଉପରେ ଚାପ ବଜାୟ ରଖିଥିଲେ ଏବଂ ପରିଶେଷରେ ଏହି ଦୁର୍ନୀତି ନିବାରଣ ବିଭାଗ ଦେଶକୁ ମିଳିଛି। ମୋଦିଙ୍କ ନେତୃତ୍ବାଧୀନ ଏହି କମିଟିରେ ସୁପ୍ରିମ୍କୋର୍ଟ ବିଚାରପତି ରଞ୍ଜନ ଗୋଗୋଇ, ଲୋକସଭା ବାଚସ୍ପତି ସୁମିତ୍ରା ମହାଜନ ଏବଂ ପ୍ରଖ୍ୟାତ ନ୍ୟାୟବିତ୍ ମୁକୁଲ୍ ରୋହତାଗୀ ସଦସ୍ୟ ରହିଥିଲେ। ୬୬ବର୍ଷୀୟ ଘୋଷ ମେ ୨୦୧୭ରେ ସର୍ବୋଚ୍ଚ ନ୍ୟାୟାଳୟର ବିଚାରପତି ଭାବରେ ଅବସର ଗ୍ରହଣ କରିବା ପରେ ଜୁନ୍ ୨୯ଠାରୁ ଜାତୀୟ ମାନବାଧିକାର କମିଶନର ସଦସ୍ୟ ରହି ଆସିଛନ୍ତି।