ବ୍ରହ୍ମପୁର: ଦେଶରେ କୋଟି କୋଟି ଲୋକ କରୋନା ମହାମାରୀ ଯୋଗୁଁ ପ୍ରଭାବିତ ହୋଇଛନ୍ତି। ଦେଶରେ ଏହି ମହାମାରୀ ଯୋଗୁଁ ପାଖାପାଖି ୧ ଲକ୍ଷ ଲୋକ ମୃତ୍ୟୁବରଣ କରିଥିବାବେଳେ ଅନେକଙ୍କ ଜୀବିକା ମଧ୍ୟ ଚାଲିଗଲାଣି। ଏହି ସମୟରେ କରୋନା ମୃତ୍ୟୁ ଠାରୁ ଅଧିକ ବିପଦ ହୋଇ ଠିଆ ହୋଇଛି ବେରୋଜଗାର। ବର୍ତ୍ତମାନ ନିଜ ପରିବାର ମୁହଁରେ ମୁଠାଏ ଦାନା ଯୋଗାଇବା ପାଇଁ ଲୋକେ ଅସମର୍ଥ ହୋଇପଡିଛନ୍ତି। ଏହାସହିତ ଦେଶରେ କେତେ ଲୋକ ଆତ୍ମହତ୍ୟା କରୁଥିବା ଖବର ଶୁଣିବାକୁ ମିଳୁଛି।
ସେହିପରି ଏହି ସମୟରେ ନିଜ ପିଲାଙ୍କୁ ପାଠ ପଢାଇବା ପାଇଁ ଲୋକଙ୍କ ସାମ୍ନାରେ ଆଉ ଏକ ବଡ ସମସ୍ୟା ହୋଇ ଠିଆ ହୋଇଛି। କେତେକ ବେସରକାରୀ ସଂସ୍ଥା ଦ୍ବାରା ପରିଚାଳିତ ବିଦ୍ୟାଳୟମାନେ ଅଭିଭାବକ ମାନଙ୍କ ଉପରେ ବିଦ୍ୟାଳୟ ପରିସରରେ ଚାଲୁ ରହିଥିବା ଶ୍ରେଣୀ ସଦୃଶ ବାର୍ଷିକ ଦେୟ ପୈଠ କରିବା ପାଇଁ ଅହେତୁକ ଚାପ ପ୍ରୟୋଗ କରୁଛନ୍ତି।
ଉକ୍ତ ବିଦ୍ୟାଳୟମାନଙ୍କୁ ପରିଚାଳନା ନିମନ୍ତେ ଦେଶରେ କୈାଣସି ନିତିନିୟମ କିମ୍ବା ନିୟାମକ ଆୟୋଗ ପ୍ରତିଷ୍ଠା ହୋଇନାହିଁ। ତେଣୁ ଭାରତର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରାୟ ସମସ୍ତ ଅଭିଭାବକ ସଂଘକୁ ନେଇ ଗଠିତ ଭାରତ ଅଭିଭାବକ ସଂଘ ଦ୍ଵାରା ଆସନ୍ତା ୨୮ ସେପ୍ଟେମ୍ବର ୨୦୨୦ ତାରିଖ ଦିନ ବାସ୍ତବିକ ଭାରତ ବନ୍ଦ (Virtual Bharat Bandh) କରିବା ଡାକରା ଦେଇଛନ୍ତି। ଅଭିଭାବକମାନଙ୍କ କଲ୍ୟାଣ ଓ ସୁରକ୍ଷା ଦୃଷ୍ଟିକୋଣରୁ ଏହି ସଂଘ କେନ୍ଦ୍ର ସରକାରଙ୍କ ଶିକ୍ଷା ମନ୍ତ୍ରାଳୟ କିଛି ପ୍ରସ୍ତାବ ପ୍ରଦାନ କରିଛି। ସେହି ପ୍ରସ୍ତାବଗୁଡିକ ହେଉଛି (୧) ନୋ ସ୍କୁଲ ନୋ ଫିସ; (୨) ଅନଲାଇନ ଶ୍ରେଣୀ ପାଇଁ ଅନଲାଇନ ଫିସ; ଏବଂ (୩) ବିଦ୍ୟାଳୟ ନିୟାମକ ଆୟୋଗ ଗଠନ।
ତେବେ ଉକ୍ତ ବନ୍ଦ ଡାକରାକୁ ପିପୁଲ ଫର ଦି ପବ୍ଲିକ୍, ବ୍ରହ୍ମପୁର ତରଫରୁ ପୁର୍ଣ୍ଣ ସହଯୋଗ ପାଇଁ ଘୋଷଣା କରାଯାଇଛି। ସଂଗଠନର ସଭାପତି ଆଇନଜୀବୀ ଡଃ ସୁବ୍ରତ ସାହୁ, ସମ୍ପାଦକ ସତୀଶ୍ ପାଣିଗ୍ରାହୀ, କୋଷାଧ୍ୟକ୍ଷ କୁନାଲ ସାହୁ, ପେଟ୍ରନ ହେମାଙ୍ଗ ରାଉଳ, ସଦସ୍ୟା ଅଞ୍ଜଳି ମହାନ୍ତି, ଦିନେଶ ପଟନାୟକ, କପିଲ୍ ପାଢି, ଅସିତ ପଣ୍ଡା, ଡଃ ସୈ।ମେନ୍ଦ୍ର ସାହୁ ପ୍ରମୁଖ ଉପସ୍ଥିତ ରହି ବାସ୍ତବିକ ଭାରତ ବନ୍ଦ ଡାକରାକୁ ସମର୍ଥନ କରିବା ପାଇଁ ନିଷ୍ପତ୍ତି ନେଇଛନ୍ତି।
