ଭୁବନେଶ୍ବର : କରୋନା ଚିକିତ୍ସା ନେଇ ରାଜ୍ୟ ସରକାରଙ୍କ ପ୍ରେସମିଟ୍ରେ ଏସ୍ସିବି ମେଡିସିନ ବିଭାଗ ମୁଖ୍ୟ ଡାକ୍ତର ଜୟନ୍ତ ପଣ୍ଡା ଫାଭିପିରାଭିର ମେଡିସିନ୍ ଖାଇବା ନେଇ ସବିଶେଷ ସୂଚନା ଦେଇଛନ୍ତି । ଡାକ୍ତର ଜୟନ୍ତ ପଣ୍ଡାଙ୍କ କହିବାନୁସାରେ ହୋମ୍ ଆଇସୋଲେସନରେ ରହୁଥିବା ଲୋକ ଖାଇପାରିବେ ଫାଭିପିରାଭିର। ରୋଗୀଙ୍କୁ ପ୍ରାଥମିକ ଅବସ୍ଥାରେ ଦେଲେ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସେ।
ହୋମ୍ ଆଇସୋଲେସନରେ ରହୁଥିବା ଲୋକଙ୍କୁ ଫାଭିପିରାଭିର ଦିଆଯାଉଛି। ଫାଭିପିରାଭିର ଭୂତାଣୁର ସଂଖ୍ୟା ଓ ଭୂତାଣୁର ପ୍ରଭାବ କମାଇ ଥାଏ। ରୋଗୀଙ୍କୁ ପ୍ରାଥମିକ ଅବସ୍ଥାରେ ଦେଲେ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିବାର ସମ୍ଭାବନା ରହିଥାଏ। ଠିକ ଭାବେ ସେବନ କଲେ ଜ୍ୱର, କାଶର ପ୍ରାଦୁର୍ଭାବ କମିଯାଇପାରିବ। ରୋଗୀଙ୍କୁ ପାଞ୍ଚ ଦିନ ପାଇଁ ଫାଭିପିରାଭିର ଦେବା ବ୍ୟବସ୍ଥା କରାଯାଇଛି। ଲକ୍ଷଣହୀନ ରୋଗୀଙ୍କୁ ଏହା ଦିଆଯାଏ ନାହିଁ, ଲକ୍ଷଣଯୁକ୍ତ ରୋଗୀଙ୍କୁ ଦିଆଯାଏ। ଗର୍ଭବତୀ ମହିଳା, କିଡ୍ନୀ ରୋଗୀ, ଛୋଟ ପିଲା ଫାଭିପିରାଭିର ଖାଇପାରିବେ ନାହିଁ। ରୋଗ ଚିହ୍ନଟ ହେବା ମାତ୍ରେ ପ୍ରଥମ ଦିନରୁ ଫାଭିପିରାଭିର ଦିଆଯାଇପାରିବ ବୋଲି ସୂଚନା ଦେଇଛନ୍ତି ଡାକ୍ତର ଜୟନ୍ତ ପଣ୍ଡା । କଟକ, ଭୁବନେଶ୍ୱର ଓ ପୁରୀରେ ଆକ୍ରାନ୍ତଙ୍କୁ ଯୋଗାଇ ଦିଆଯାଉଛି। ସେହିପରି ଏହି ଫାଭିପିରାଭିର ଖାଇବା ପରେ ପାର୍ଶ୍ବ ପ୍ରତିକ୍ରିୟା ଦେଖିଲେ ଏନେଇ ଡାକ୍ତରଙ୍କୁ ଜଣାଇବାକୁ କହିଛନ୍ତି ଡାକ୍ତର ପଣ୍ଡା । ଯଦି ଏହି ମେଡିସିନ୍ ଖାଇବା ପରେ ପତଳା ଝାଡ଼ା ହେଲେ, ପେଟ କାଟିଲେ କିମ୍ବା କିଡ୍ନୀ ବା ଲିଭର ଉପରେ ଚାପ ପଡିବା ପରି ଅନୁଭବ ହେଲେ ଡାକ୍ତରଙ୍କ ସହ ଯୋଗାଯୋଗ କରନ୍ତୁ ବୋଲି ସୂଚନା ଦେଇଛନ୍ତି ଡାକ୍ତର ପଣ୍ଡା । ବଟିକାକୁ ଚୋବାଇେବ ନାହିଁ କିମ୍ବା ଭାଙ୍ଗିବେ ନାହିଁ ତାକୁ ଢୋକି ଖାଇବେ ।
ଫାଭିପିରାଭିର୍ ଡୋଜ୍ ନେଇ ଡାକ୍ତର ସମ୍ପଦ ଦାସ ସୂଚନା ଦେଇ କହିଛନ୍ତି ଯେ, ଫାଭିପିରାଭିର ପ୍ରଥମ ଦିନ ସକାଳ 9 ଓ ରାତିରେ 9ଟି ବଟିକା ଖାଇବେ । ଦ୍ବିତୀୟଦିନରୁ ପଞ୍ଚମ ଦିନ ପର୍ଯ୍ୟନ୍ତ ସକାଳେ 4ଟି ଓ ରାତିରେ 4ଟି ବଟିକା ଖାଇବେ । ଫାଭିପିରାଭିର ବା କୌଣସି ଔଷଧ ଖାଇଲେ ମଦ୍ୟପାନ ନକରିବା ଉଚିତ । ଫାଭିପିରାଭିର ସହ ନିଜର ପୂର୍ବ ରୋଗ ପାଇଁ ଔଷଧ ବି ଖାଇପାରିବେ ବୋଲି ସୂଚନା ରହିଛି ।