ଭାଗଲପୁର : ବିହାର ଜିଲ୍ଲା ଭାଗଲପୁରରେ ପୋଲିସ୍ ଜଣେ ସପ୍ଟଓ୍ବେୟାର ଇଞ୍ଜିନିୟରକୁ ପିଟି ପିଟି ହତ୍ୟାକରିଛି । ଚେକିଂ କରିବା ସମୟରେ ଏକ ଛୋଟିଆ ଭୁଲ୍ ପାଇଁ ସପ୍ଟଓ୍ବେୟାର ଇଞ୍ଜିନିୟରଙ୍କୁ ପୋଲିସ୍ ଥାର୍ଡ ଡିଗ୍ରୀ ଦେବା ସହ ଜେଲ୍ରେ ବନ୍ଦ ରଖିଥିଲା । ଯୁବକକୁ ଲଙ୍ଗଳା କରି ପିଟିଥିଲା ପୋଲିସ୍ । ପୋଲିସ୍ ମାଡ ଖାଇବା ପରେ ଯୁବକର ମୃତ୍ୟୁ ହୋଇଯାଇଛି । ଏହି ଘଟଣାରେ ଥାନାଅଧିକାରୀଙ୍କ ସମେତ 6 ପୋଲିସ୍କର୍ମୀଙ୍କଉପରେ ହତ୍ୟା ମାମଲା ଦାଏର ହୋଇଛି । ତେବେ ଅଭିଯୁକ୍ତ ପୋଲିସ୍ କର୍ମୀମାନେ ଫେରାର ରହିଛନ୍ତି । ଏହି ଘଟଣାକୁ ନେଇ ଜନ ଅସନ୍ତୋଷ ପରିଲକ୍ଷିତ ହୋଇଛି । ପୋଲିସ୍ର ଜୁଲମ୍ ପ୍ରତିବାଦରେ ଲୋକେ ଏନ୍ଏଚ୍ -31ରେ ଧାରଣା ଦେଇଥିଲେ । ଏହି ଅବସରରେ ପୋଲିସ୍ଓ ଜନତାଙ୍କ ମଧ୍ୟରେ ଧସ୍ତାଧସ୍ତି ମଧ୍ୟ ହୋଇଛି ।
ମିଳିଥିବା ସୂଚନା ଅନୁସାରେ ବିହପୁର ଥାନା ଅଞ୍ଚଳର ମଡବା ଗ୍ରାମର ଆଶୁତୋଷ ପାଠକ ଜଣେ ସପ୍ଟଓ୍ବେୟାର ଇଞ୍ଜିନିଅର । ଆଶୁତୋଷ ଦୁର୍ଗା ପୂଜା ପାଇ ଗ୍ରାମକୁ ଆସିଥିଲେ । ଶନିବାର ଦିନ ସନ୍ଧ୍ୟା ସମୟରେ ସେ ତାଙ୍କ ସ୍ତ୍ରୀଙ୍କ ସହ ବାଇକ୍ରେ ଯାଉଥିଲେ। ବିହପୁର ଥାନା ପୋଲିସ୍ ଦ୍ବାରା ନେଗାଛିଆ ଏନଏଚ୍ -31ରେ ମହନ୍ଥ ବାବା ସସ୍ଥାନ ନିକଟରେ ଚେକିଂ କରାଯାଉଥିଲା । ପୋଲିସ୍ ଚେକିଂ ପାଇଁ ଆଶୁତୋଷଙ୍କ ବାଇକକୁ ଅଟକାଇଥିଲା । କିନ୍ତୁ ବାଇକ୍ଟି ଟିକିଏ ଦୂର ଯାଇ ଅଟକିଥିଲା। ଏହି ଘଟଣାକୁ ନେଇ ବିହର ଥାନାଧିକାରୀ ରାଗି ଯାଇ ଗାଳିଦେବା ଆରମ୍ଭକରିଥିଲେ । ଏହାକୁ ଆଶୁତୋଷ ବିରୋଧ କରିବା ପରେ ସ୍ତ୍ରୀସାମ୍ନାରେ ଆଶୁତୋଷଙ୍କୁ ମାଡ ମାରିଥିଲେ ଥାନାଧିକାରୀ । ଏହାପରେ ଆଶୁତୋଷଙ୍କୁ ନେଇ ଥାନାରେ ବନ୍ଦ କରି ଦେଇଥିଲେ । ସେଠାରେ ତାଙ୍କୁ ଥାର୍ଡ ଡିଗ୍ରୀ ଦେଇଥିଲେ । ଆଶୁତୋଷଙ୍କ ଶଶୁର କଟିହାର ପୋଲିସ୍ରେ କାର୍ଯ୍ୟରତ ଥିବାବେଳେ ସେ ଏହି ସୂଚନା ପାଇଁ ଥାନାରେ ପହଞ୍ଚିଥିଲେ । ସେଠାରେ ଆଶୁତୋଷଙ୍କୁ ହସ୍ପିଟାଲ ନେଇଥିଲେ । ଚିକିତ୍ସାଧୀନ ଅବସ୍ଥାରେ ଆଶୁତୋଷଙ୍କର ମୃତ୍ୟୁ ହୋଇଥିଲା ।
ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଥିଲା । ଏହି ମାମଲାରେ ନବଗାଛିଆର ଏସ୍ପି ସ୍ବପ୍ନା ମିଶ୍ର ଯାଞ୍ଚ ଆଦେଶ ଦେଇଛନ୍ତି । ଅପରପକ୍ଷରେ ଥାନାଧିକାରୀ ରଂଜିତ କୁମାରଙ୍କସମେତ 6 ଜଣ ପୋଲିସ୍ କର୍ମୀଙ୍କ ଉପରେ ହତ୍ୟା ମାମଲା ଦାଏର କରାଯାଇଛି ।
ଆଶୁତୋଷଙ୍କ ପୋଷ୍ଟ ମର୍ଟମ୍ ରିପୋର୍ଟରେ ଗୁରୁତର ମାଡ ଖାଇ ମୃତ୍ୟୁ ହୋଇଥିବାର ଦର୍ଶାଯାଇଛି । ଏହି ଘଟଣାରେ ଅଭିଯୁକ୍ତ ପୋଲିସଙ୍କ ଗିରଫ ଦାବିକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା (ଏଜେନ୍ସି)