ମୁମ୍ବାଇ: ଦେଶରେ କୃଷକ ଆନ୍ଦୋଳନ ତୀବ୍ର ରୂପ ନେବାରେ ଲାଗିଛି। ଯଦିବା ଏହି ଆନ୍ଦୋଳନକୁ ସମାପ୍ତ କରିବା ପାଇଁ କେନ୍ଦ୍ର ସରକାର ବହୁ ପ୍ରୟାସ କରୁଛି, ହେଲେ କୌଣସି ସଫଳ ମିଳୁନି। କୃଷକ ନେତାଙ୍କ ସହ କେନ୍ଦ୍ର ସରକାରର ପଞ୍ଚମ ପର୍ଯ୍ୟାୟ ଆଲୋଚନା ବିଫଳ ହୋଇଛି। ଆସନ୍ତା ୯ ତାରିଖରେ ପୁଣି ଷଷ୍ଠ ପର୍ଯ୍ୟାୟ ଆଲୋଚନା ହେବ। କିନ୍ତୁ କୃଷକ ନେତା ୮ ତାରିଖରେ ଭାରତ ବନ୍ଦ ଡାକରା ଦେଇଛନ୍ତି।
ଅନେକ ରାଜନୈତିକ ଦଳ ବନ୍ଦ ଡାକରାକୁ ସମର୍ଥନ ଜଣାଇଥିବା ବେଳେ ଶରଦ ପାଓ୍ଵାରଙ୍କ ଏନସିପି ଦଳ ମଧ୍ୟ ଏହାକୁ ସମର୍ଥନ କରିଛନ୍ତି। ଏନେଇ ଏନସିପି ଅଧ୍ୟକ୍ଷ ଶରଦ ପାଓ୍ଵାର କେନ୍ଦ୍ର ସରକାରକୁ ଚେତାବନୀ ଦେଇଛନ୍ତି। ସେ କହିଛନ୍ତି, ପଞ୍ଜାବ ଓ ହରିୟାଣାର କୃଷକ ଗହମ ଓ ଧାନର ମୁଖ୍ୟ ଉତ୍ପାଦକ ଅଟନ୍ତି ଏବଂ ବର୍ତ୍ତମାନ ସେମାନେ ଆନ୍ଦୋଳନ କରୁଛନ୍ତି। ଯଦି ଏହାର ଶୀଘ୍ର ସମାଧାନ କରାନଯାଏ ତେବେ ସମଗ୍ର ଦେଶର କୃଷକ ପଞ୍ଜାବ-ହରିୟାଣା କୃଷକଙ୍କ ସହିତ ଆନ୍ଦୋଳନରେ ସାମିଲ ହୋଇଯିବେ। ବିଧେୟକ ଗୃହୀତ ହେବା ସମୟରେ ମଧ୍ୟ ଆମେ ସରକାରଙ୍କୁ ନିବେଦନ କରିଥିଲୁ ଯେ, ଏହା ଉପରେ ପୁଙ୍ଖାନୁପୁଙ୍ଖ ବିଚାର କରି ପାରିତ କରାଯାଉ।
କୃଷି ଆଇନକୁ ନେଇ ସେ କହିଛନ୍ତି, ବିଧେୟକକୁ ଚୟନ କମିଟି ପାଖକୁ ପଠାଇବାର ଥିଲା ଏବଂ ଆଲୋଚନାର ଆବଶ୍ୟକତା ଥିଲା। ମାତ୍ର ଏମିତି ନକରି ବିଲ୍ ପାରିତ କରି ଦିଆଗଲା। ଏବେ ସରକାରଙ୍କୁ ଏହି ତରବରିଆ ନୀତି ମହଙ୍ଗା ପଡୁଛି।
ଏହା ପୂର୍ବରୁ ଟିଆରଏସ, କଂଗ୍ରେସ, ବାମପନ୍ଥୀ, ତୃଣମୂଳ କଂଗ୍ରେସ, ରାଷ୍ଟ୍ରୀୟ ଜନତା ଦଳ(ଆରଜେଡି), ରାଷ୍ଟ୍ରୀୟ ଲୋକଦଳ(ଆରଏଲଡି) ଏବଂ ଆମ୍ ଆଦମୀ ପାର୍ଟି ମଧ୍ୟ ଦେଶବ୍ୟାପୀ ଭାରତ ବନ୍ଦର ସମର୍ଥନ ଦେବାକୁ ନିଷ୍ପତ୍ତି ନେଇଛନ୍ତି।