ନୂଆଦିଲ୍ଲୀ: ଡିସେମ୍ବର ୧ ତାରିଖରୁ ଅନେକ ଜିନିଷର ମୂଲ୍ୟରେ ପରିବର୍ତ୍ତନ ହେବାକୁ ଯାଉଛି, ତେଣୁ ଅନେକ ଜିନିଷ ମହଙ୍ଗା ହେବ। କିଛି ସାମ୍ପ୍ରତିକ ଅଫର୍ ମିଆଦ ପୂର୍ଣ୍ଣ ହେବ। ଡିସେମ୍ବର ୧ ତାରିଖରୁ କେଉଁ ଜିନିଷରେ ମୂଲ୍ୟର ପରିବର୍ତ୍ତନ ହେଉଛି, ଆସନ୍ତୁ ଜାଣିବା…
ଗ୍ୟାସ ସିଲିଣ୍ଡର ମୂଲ୍ୟ:
ସରକାରୀ ତୈଳ କମ୍ପାନୀଗୁଡିକ ପ୍ରତ୍ୟେକ ମାସର ପ୍ରଥମ ଦିନରେ ଏଲପିଜି ଗ୍ୟାସ୍ ସିଲିଣ୍ଡରର ମୂଲ୍ୟ ସମୀକ୍ଷା କରନ୍ତି। ଯାହା ପରେ ବାଣିଜ୍ୟିକ ଏବଂ ଘରୋଇ ଏଲପିଜି ସିଲିଣ୍ଡରର ନୂତନ ହାର ଏହି କମ୍ପାନୀଗୁଡିକ ଦ୍ଵାରା ପ୍ରତି ମାସର ୧ ତାରିଖରେ ପ୍ରଦାନ କରାଯାଇଥାଏ। ଏହି ସମୀକ୍ଷାରେ LPG ସିଲିଣ୍ଡରର ମୂଲ୍ୟ ବୃଦ୍ଧି ହେବ କି ନାହିଁ ତାହା ସ୍ଥିର ହୁଏ। କିନ୍ତୁ ଏଥର ବିଶ୍ୱାସ କରାଯାଏ ଯେ, ଏଲପିଜି ସିଲିଣ୍ଡର ମୂଲ୍ୟରେ କିଛି ହ୍ରାସ ହୋଇପାରେ।
ଘର ଋଣ ଅଫର:
ପାର୍ବଣ ଋତୁରେ ଅଧିକାଂଶ ବ୍ୟାଙ୍କ ବିଭିନ୍ନ ଘର ଋଣ ଅଫର ନେଇ ଆସିଥିଲେ। ଯାହାର ଲାଭ ବର୍ତ୍ତମାନ ଗ୍ରାହକ ଉଠାଇ ପାରିବେ। ଏଥିମଧ୍ୟରୁ ଶସ୍ତା ସୁଧ ହାର ଏବଂ ଜିରୋ ପ୍ରୋସେସିଂ ଫି ଭଳି ଅଫର ମଧ୍ୟ ଅନ୍ତର୍ଭୂକ୍ତ କରାଯାଇଛି। ତଥାପି, ଅଧିକାଂଶ ବ୍ୟାଙ୍କର ଅଫର ଡିସେମ୍ବର ୩୧ ତାରିଖ ୨୦୨୧ ରେ ଶେଷ ହେବ। କିନ୍ତୁ LIC ହାଉସିଂ ଫାଇନାନ୍ସର ଅଫର ନଭେମ୍ବର ୩୦ ତାରିଖରେ ସମାପ୍ତ ହୋଇଛି, ଯାହା କେବଳ ୬.୬୬ ପ୍ରତିଶତ ହାରରେ ଘର ଋଣ ଦେଉଥିଲା।
SBI କ୍ରେଡିଟ୍ କାର୍ଡ:
ଯଦି ଆପଣ SBI କ୍ରେଡିଟ୍ କାର୍ଡ ବ୍ୟବହାର କରନ୍ତି, ତେବେ ଡିସେମ୍ବର ୧ ତାରିଖରୁ SBI କ୍ରେଡିଟ୍ କାର୍ଡ ସହିତ EMI ରେ ସପିଂ ମହଙ୍ଗା ହେବ। ବର୍ତ୍ତମାନ କେବଳ ଏସବିଆଇ କାର୍ଡ ବ୍ୟବହାର ପାଇଁ ସୁଧ ଦେବାକୁ ପଡେ, କିନ୍ତୁ ଡିସେମ୍ବର ୧ ତାରିଖରୁ ଏସବିଆଇ କାର୍ଡ ଏବଂ ପେମେଣ୍ଟ ସର୍ଭିସେସ୍ ପ୍ରାଇଭେଟ ଲିମିଟେଡ୍ (SBICPSL) ଘୋଷଣା କରିଛି ଯେ, EMI କାରବାର ପାଇଁ ବର୍ତ୍ତମାନ କାର୍ଡଧାରୀଙ୍କୁ ୯୯ ଟଙ୍କା ପ୍ରୋସେସିଂ ଶୁଳ୍କ ଦେବାକୁ ପଡିବ। ଏହାସହ ଟ୍ୟାକ୍ସ ମଧ୍ୟ ଦେବାକୁ ପଡିବ।
ରିଲାଏନ୍ସ ଜିଓ ପ୍ରିପେଡ୍ ମୋବାଇଲ୍ ରିଚାର୍ଜ ଯୋଜନା ମହଙ୍ଗା:
ଭାରତ ଏୟାରଟେଲ ଏବଂ ଭୋଡାଫୋନ୍ ଆଇଡିଆ ପୂର୍ବରୁ ପ୍ରିପେଡ୍ ମୋବାଇଲ୍ ଶୁଳ୍କ ବୃଦ୍ଧି କରିସାରିଛନ୍ତି। ବର୍ତ୍ତମାନ ରିଲାଏନ୍ସ ଜିଓ ମଧ୍ୟ ପ୍ରିପେଡ୍ ମୋବାଇଲ୍ ଶୁଳ୍କ ବୃଦ୍ଧି କରିବାକୁ ନିଷ୍ପତ୍ତି ନେଇଛି। ଯାହା ଡିସେମ୍ବର ୧ ତାରିଖରୁ ଲାଗୁ ହେବ। ରିଲାଏନ୍ସ ଜିଓର ପ୍ରିପେଡ୍ ଗ୍ରାହକଙ୍କୁ ୮ ରୁ ୨୦ ପ୍ରତିଶତ ଅଧିକ ଟଙ୍କା ଦେବାକୁ ପଡିବ।
ଡିଆସିଲି ବକ୍ସ ମୂଲ୍ୟ ବୃଦ୍ଧି:
୧୪ ବର୍ଷ ପରେ ଡିଆସିଲି ବକ୍ସଗୁଡ଼ିକର ମୂଲ୍ୟ ବୃଦ୍ଧି ପାଇବ। ଗୋଟିଏ ମ୍ୟାଚ୍ ବକ୍ସର ମୂଲ୍ୟ ବର୍ତ୍ତମାନର ୧ ଟଙ୍କାରୁ ୨ ଟଙ୍କାକୁ ବୃଦ୍ଧି ପାଇବ। ବର୍ତ୍ତମାନ ୨ ଟଙ୍କାର ଏକ ଡିଆସିଲି ବକ୍ସରେ ୫୦ ଟି କାଠି ମିଳିବ। କଞ୍ଚାମାଲର ମୂଲ୍ୟ ହେତୁ ଡିଆସିଲି ମହଙ୍ଗା ହେଉଛି।
PNB ଗ୍ରାହକଙ୍କୁ ଝଟକା:
ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନବି) ଏହାର ସଞ୍ଚୟ ଆକାଉଣ୍ଟଧାରୀଙ୍କୁ ଏକ ବଡ଼ ଝଟକା ଦେଇଛି। ବାସ୍ତବରେ, ସଞ୍ଚୟ ଖାତାର ସୁଧ ହାର କମ କରାଯାଇଛି। ବର୍ତ୍ତମାନ ବାର୍ଷିକ ସୁଧ ହାର ୨.୯୦ ପ୍ରତିଶତରୁ ୨.୮୦ ପ୍ରତିଶତକୁ ଖସି ଆସିଛି। ଡିସେମ୍ବର ୧ ତାରିଖରୁ ନୂତନ ହାର ଲାଗୁ ହେବ।
