ଭୁବନେଶ୍ୱର: ପଟିଆସ୍ଥିତ ସୂର୍ଯ୍ୟବିହାରରେ ଏମୋ ମୋବିଲିଟି ପ୍ରାଇଭେଟ ଲିମିଟେଡ଼ର ଏମୋ ଇଲେକ୍ଟ୍ରି ବାଇକ ସୋ’ରୁମ୍ ଉଦ୍ଘାଟିତ ହୋଇଯାଇଛି। ଏହି କାର୍ଯ୍ୟକ୍ରମରେ ଖଣ୍ଡପଡ଼ା ବିଧାୟକ ତଥା ସମ୍ବାଦର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗଦେଇ ସୋ’ରୁମ୍କୁ ଉଦ୍ଘାଟନ କରି ଇଲେକ୍ଟ୍ରି ସ୍କୁଟର ଦେଖିବା ସହ ମଡ଼େଲ ଗୁଡ଼ିକ ବିଷୟରେ ପଚାରି ବୁଝିଥିଲେ।
ଅନ୍ୟତମ ଅତିଥି ଭାବେ ରେଢାଖୋଲ ବିଧାୟକ ରୋହିତ ପୂଜାରୀ, ଗୁପ୍ତା ପାୱାର ଲିମିଟେଡ଼ର ଅଧ୍ୟକ୍ଷ ମହେନ୍ଦ୍ର ଗୁପ୍ତା ପ୍ରମୁଖ ଯୋଗ ଦେଇଥିଲେ। ଇ-ସ୍କୁଟର ବ୍ୟବହାର ଦ୍ୱାରା ପରିବେଶ ପ୍ରଦୂଷଣ ଦୂର ହେବା ସହିତ ଏକ ସୁନ୍ଦର ଓ ସବୁଜ ପରିବେଶ ସୃଷ୍ଟି ହୋଇପାରିବ ବୋଲି ଅତିଥିମାନେ ମତବ୍ୟକ୍ତ କରିଥିଲେ।
ଉଦ୍ଘାଟନୀ ଅବସରରେ ସୋ’ରୁମ୍ ପକ୍ଷରୁ ୬ ପ୍ରକାରର ୫ଟି ମଡେଲ୍ ସ୍କୁଟର ଶୁଭାରମ୍ଭ କରାଯାଇଛି। ଏହି ଇ-ସ୍କୁଟର ଗୁଡ଼ିକରେ ଲିଥିୟମ ଆଇଅନ୍ ବ୍ୟାଟେରୀ ବ୍ୟବହାର ହୋଇଥିବା ବେଳେ ଏହାକୁ ଥରେ ଚାର୍ଜ କଲେ ୧୨୦ କିଲୋମିଟର ଯାଇପାରିବ ବୋଲି ସୋ’ରୁମ୍ ପକ୍ଷରୁ ସୂଚନା ଦିଆଯାଇଛି। ଏଥିସହିତ ଲିଡ୍ ଏସିଡ୍ ନିର୍ମିତ ଇ-ସ୍କୁଟର ୭୦-୮୦ କିଲୋମିଟର ଯାଇପାରିବ। ଇ-ସ୍କୁଟର ଗୁଡ଼ିକର ଏକ୍ସ ସୋ’ରୁମ୍ ମୂଲ୍ୟ ୬୦ ହଜାରରୁ ଆରମ୍ଭ ହୋଇ ୯୫ ହଜାର ଟଙ୍କା ପର୍ଯ୍ୟନ୍ତ ରହିଛି। ଏଥିରେ ରାଜ୍ୟ ସରକାରଙ୍କର ଇ-ସ୍କୁଟର ଉପରେ ଥିବା ୫ ହଜାର ଟଙ୍କା ପର୍ଯ୍ୟନ୍ତ ରିହାତି ସୁବିଧା ଗ୍ରାହକମାନେ ପାଇପାରିବେ ବୋଲି ସୋ’ରୁମ୍ ପକ୍ଷରୁ କୁହାଯାଇଥିଲା।
ଏହି ଉତ୍ସବରେ ପରିବେଶବିତ୍ ଏ.କେ. ଶାରଦା, ଏସ୍.କେ. ମିଶ୍ର, ଭୁବନେଶ୍ୱର କ୍ଲବ ସଦସ୍ୟ ଅଶୋକ ମିଶ୍ର, ସତିସ ଗର୍ଗ ପ୍ରମୁଖ ଉପସ୍ଥିତ ଥିଲେ।