ନୂଆଦିଲ୍ଲୀ: ଦ୍ରୁତ ବିତରଣ ଷ୍ଟାର୍ଟଅପ୍ ଜେପ୍ଟୋର ସହ-ପ୍ରତିଷ୍ଠାତା କୈବଲ୍ୟ ଭୋରା ଏବଂ ଆଦିତ ପାଲିଚା, ଆଇଏଫ୍ଏଲ୍ ୱେଲଥ-ହୁରୁନ୍ ଇଣ୍ଡିଆ ରିଚ୍ ତାଲିକା ୨୦୨୨ ରେ ସ୍ଥାନ ପାଇବାକୁ ସର୍ବକନିଷ୍ଠ ଉଦ୍ୟୋଗୀ ହୋଇପାରିଛନ୍ତି। କୈବଲ୍ୟଙ୍କ ବୟସ ମାତ୍ର ୧୯ ବର୍ଷ। ହୁରୁନ୍ ତାଲିକାରେ କୈବଲ୍ୟ ୧୦୩୬ ତମ ସ୍ଥାନ ପାଇଛନ୍ତି, ଯାହାର ସମ୍ପତ୍ତିର ମୂଲ୍ୟ ୧ ହଜାରକୋଟି। ଏଥି ସହିତ ଆଦିତ୍ୟ ପାଲିଚା ୯୫୦ ତମ ସ୍ଥାନରେ ଅଛନ୍ତି ଏବଂ ତାଙ୍କର ମୋଟ ସମ୍ପତ୍ତି ହେଉଛି ୧ ହଜାର ୨୦୦ କୋଟି ଟଙ୍କା। ସେ ପୂର୍ବରୁ ଫୋର୍ବସ୍ ପତ୍ରିକାର ପ୍ରଭାବଶାଳୀ “୩୦ ଅଣ୍ଡର ୩୦ (ଏସିଆ ତାଲିକା)” ରେ ଇ-ବାଣିଜ୍ୟ ବର୍ଗରେ ସ୍ଥାନ ପାଇଥିଲେ।
ଉଭୟ ଯୁବ ଉଦ୍ୟୋଗୀ ମଧ୍ୟ ହୁରୁନ୍ ଇଣ୍ଡିଆ ଫ୍ୟୁଚର ୟୁନିକର୍ଣ୍ଣ ଇଣ୍ଡେକ୍ସ ୨୦୨୨ର ସର୍ବ କନିଷ୍ଠ ଷ୍ଟାର୍ଟ ଅପ୍ ପ୍ରତିଷ୍ଠାତା ଅଟନ୍ତି। ଭାରତର ଧନୀ ତାଲିକାରେ ଭୋରା ଏବଂ ପାଲିଚାଙ୍କ ଅନ୍ତର୍ଭୁକ୍ତ ହେବା ଦେଶରେ ଷ୍ଟାର୍ଟଅପ୍ ର ପ୍ରଭାବକୁ ସୂଚାଉଛି।
ହୁରୁନ୍ ଇଣ୍ଡିଆ ରିଚ୍ ଲିଷ୍ଟରେ ଉଲ୍ଲେଖ କରାଯାଇଛି, “ଏହି ତାଲିକାରେ ଜଣେ କିଶୋର ଡେବ୍ୟୁ କରିଛନ୍ତି! ଏହି ତାଲିକାରେ ସବୁଠାରୁ କନିଷ୍ଠ ୧୯ ବର୍ଷ ବୟସ୍କା କୈବଲ୍ୟ ଭୋରା, ଯିଏ ଜେପ୍ଟୋ ପ୍ରତିଷ୍ଠା କରିଥିଲେ।
ଭୋରା ଏବଂ ପାଲିଚା ଷ୍ଟାନଫୋର୍ଡ ୟୁନିଭରସିଟିର ଛାତ୍ର ଥିଲେ, ଯେଉଁମାନେ ପରେ ସେମାନଙ୍କ କମ୍ପ୍ୟୁଟର ସାଇନ୍ସ ପାଠ୍ୟକ୍ରମ ଛାଡି ଉଦ୍ୟୋଗୀ ହୋଇଥିଲେ। ମହାମାରୀ ସମୟରେ ଜରୁରୀ ଜିନିଷଗୁଡ଼ିକର ଶୀଘ୍ର ଏବଂ ଯୋଗାଯୋଗହୀନ ବିତରଣର ଚାହିଦା ପୂରଣ କରିବା ପାଇଁ ଦୁଇ ବନ୍ଧୁ ୨୦୨୧ ମସିହାରେ ଜେପ୍ଟୋ ଆରମ୍ଭ କରିଥିଲେ।
ପାଲିଚା ୧୭ ବର୍ଷ ବୟସରେ ନିଜର ଉଦ୍ୟୋଗୀ ଯାତ୍ରା ଆରମ୍ଭ କରିଥିଲେ, ଯେତେବେଳେ ସେ ୨୦୧୮ ରେ ଛାତ୍ରମାନଙ୍କ ପାଇଁ ଗୋପୁଲ୍ ନାମକ ଏକ କାରପୁଲ୍ ସେବା ପ୍ରତିଷ୍ଠା କରିଥିଲେ।