ନୂଆଦିଲ୍ଲୀ: ୩ ଭାରତୀୟ ମହିଳା ଉଦ୍ୟୋଗୀଙ୍କ ନାମ ଫୋର୍ବସ୍ ଟପ୍ ୨୦ ଏସୀୟ ମହିଳା ଉଦ୍ୟୋଗୀ ତାଲିକାରେ ମଧ୍ୟ ଅନ୍ତର୍ଭୁକ୍ତ। ଏହି ତାଲିକାରେ ସେହି ମହିଳାମାନେ ଅନ୍ତର୍ଭୁକ୍ତ ଥିଲେ ଯେଉଁମାନେ କୋଭିଡ-୧୯ ମହାମାରୀ ଦ୍ଵାରା ସୃଷ୍ଟି ହୋଇଥିବା ଅନିଶ୍ଚିତତା ମଧ୍ୟରେ ସେମାନଙ୍କ ବ୍ୟବସାୟ ବଢାଇବାରେ ଉଲ୍ଲେଖନୀୟ ସଫଳତା ହାସଲ କରିଥିଲେ। ଫୋର୍ବସର ନଭେମ୍ବର ସଂଖ୍ୟାରେ ପ୍ରକାଶିତ ତାଲିକାରେ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ (SAIL) ର ଅଧ୍ୟକ୍ଷା ସୋମା ମଣ୍ଡଳ, ଏମକିୟୋର୍ ଫାର୍ମାର କାର୍ଯ୍ୟନିର୍ବାହୀ ନିର୍ଦ୍ଦେଶକ ନମିତା ଥାପର ଏବଂ ହୋନାସା କଞ୍ଜ୍ୟୁମରର ସହ-ପ୍ରତିଷ୍ଠାତା ଗଜଲ ଅଲଘଙ୍କ ନାମ ଅନ୍ତର୍ଭୂକ୍ତ କରାଯାଇଛି।
ଫୋର୍ବସ୍ ଏକ ବିବୃତ୍ତିରେ କହିଛି ଯେ, ଏହି ତାଲିକାରେ ଭାରତ, ଅଷ୍ଟ୍ରେଲିଆ, ଚୀନ୍, ଦକ୍ଷିଣ କୋରିଆ, ଇଣ୍ଡୋନେସିଆ, ଜାପାନ, ସିଙ୍ଗାପୁର, ତାଇୱାନ ଏବଂ ଥାଇଲ୍ୟାଣ୍ଡର ମହିଳା ଅଛନ୍ତି। ଏହି ତାଲିକାରେ ଥିବା ମହିଳାମାନେ ପରିବହନ, ରିଏଲ୍ ଇଷ୍ଟେଟ୍ ଏବଂ ନିର୍ମାଣ, ପ୍ରଯୁକ୍ତିବିଦ୍ୟା, ଔଷଧ ଏବଂ ଦ୍ରବ୍ୟ ଭଳି କ୍ଷେତ୍ରରେ ସକ୍ରିୟ ଅଛନ୍ତି। ଫୋର୍ବସ୍ କହିଛି ଯେ, ଏହି ମହିଳାମାନେ କୋଭିଡ-୧୯ ପରି କଠିନ ସମୟରେ ମଧ୍ୟ ସାହସ ହରାଇ ନାହାଁନ୍ତି ଏବଂ ବ୍ୟବସାୟକୁ ନୂତନ ଉଚ୍ଚତା ଦେଇଛନ୍ତି।
ସୋମା ମଣ୍ଡଳ:
ସୋମା ମଣ୍ଡଳ ଜାନୁଆରୀ ୧ ତାରିଖ ୨୦୨୧ରେ ଷ୍ଟିଲ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ (SAIL) ର ଚେୟାରମ୍ୟାନ୍ ଭାବରେ ଦାୟିତ୍ଵ ଗ୍ରହଣ କଲେ। ସେ ହେଉଛନ୍ତି ପ୍ରଥମ ମହିଳା ଯିଏକି ଏହି ପଦବୀରେ ରହିଛନ୍ତି। ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି, ରାଉରକେଲାରୁ ସୋମା ମଣ୍ଡଳ ଇଲେକ୍ଟ୍ରିକାଲ୍ ଇଞ୍ଜିନିୟରିଂରେ ୧୯୮୪ ସ୍ନାତକ ପରେ ସେ ନାଲ୍କୋର ନିର୍ଦ୍ଦେଶକ (ବାଣିଜ୍ୟିକ) ମଧ୍ୟ ହୋଇଥିଲେ।
ନମିତା ଥାପର:
ନମିତା ଥାପର ଏମକ୍ୟୁଅର ଫାର୍ମାସ୍ୟୁଟିକାଲ୍ସର ସିଇଓ ଅଟନ୍ତି। ସେ ମହାରାଷ୍ଟ୍ରର ପୁଣେରୁ ସ୍ନାତକ ହାସଲ କରିଥିଲେ। ସେ ICAI ରୁ ଚାର୍ଟାର୍ଡ ଆକାଉଣ୍ଟାଣ୍ଟୀରେ ଡିଗ୍ରୀ ହାସଲ କରିବା ପରେ ଆମେରିକା ଯାଇଥିଲେ। କିଛି ସମୟ ପରେ ସେ ଭାରତ ଆସି ଏଠାରେ ବ୍ୟବସାୟ ଆରମ୍ଭ କଲେ। ନମିତା ଥାପର କୋଟି କୋଟି ଟଙ୍କାର ମାଲିକ ଅଟନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ନମିତା ଥାପରଙ୍କ ସମ୍ପତ୍ତି ମୂଲ୍ୟ ପ୍ରାୟ ୬୦୦ କୋଟି ଟଙ୍କା।
ଗଜଲ ଅଲଘ:
ହରିୟାଣାର ଗୁରୁଗ୍ରାମରେ ଜନ୍ମ ହୋଇଥିବା ଗଜଲ ଅଲଘଙ୍କ ନାମ ମଧ୍ୟ ଫୋର୍ବସ୍ ତାଲିକାରେ ଅଛି। ଗଜଲ ଚଣ୍ଡିଗଡ଼ର ପଞ୍ଜାବ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର କରିଛନ୍ତି। ଗଜଲ NIIT ଲିମିଟେଡରେ ଦୁଇ ବର୍ଷ କର୍ପୋରେଟ ଟ୍ରେନର ଭାବରେ କାର୍ଯ୍ୟ କରିଥିଲେ। ୨୦୧୬ ମସିହାରେ, ଗଜଲ ତାଙ୍କ ସ୍ୱାମୀ ବରୁଣ ଅଲଘଙ୍କ ସହ ହନ୍ସା କଞ୍ଜ୍ୟୁମର ପ୍ରାଇଭେଟ ଲିମିଟେଡର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହା ଦ୍ରୁତତମ ବଢୁଥିବା FMCG ବ୍ରାଣ୍ଡ ମଧ୍ୟରୁ ଗୋଟିଏ।
