ନୂଆଦିଲ୍ଲୀ: ଅମୃତସରରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଶ୍ରୀ ଗୁରୁ ରାମଦାସ ଜୀ ଅନ୍ତର୍ଜାତୀୟ ବିମାନବନ୍ଦରରେ ଉଡ଼ାଣ ସମୟ ପୂର୍ବରୁ ଏକ ସ୍କୁଟ ବିମାନ ଉଡ଼ିଯାଇଛି ଏବଂ ୩୫ ଜଣ ଯାତ୍ରୀ ବିମାନବନ୍ଦରରେ ରହିଯାଇଛନ୍ତି। ବର୍ତ୍ତମାନ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ ଅର୍ଥାତ୍ ଡିଜିସିଏ ଏହି ଘଟଣାର ସଜ୍ଞାନକୁ ନେଇଛି।
ଅମୃତସର ବିମାନ ବନ୍ଦରର ନିର୍ଦ୍ଦେଶକ ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, “ସ୍କୁଟ ଏୟାରଲାଇନ୍ସର ବିମାନ ସନ୍ଧ୍ୟା ୭ ଟା ପରେ ଅମୃତସରରୁ ସିଙ୍ଗାପୁର ଅଭିମୁଖେ ଯାତ୍ରା କରିବାର କାର୍ଯ୍ୟକ୍ରମ ଥିଲା, କିନ୍ତୁ ଏୟାରଲାଇନ୍ସ ଏହାକୁ ବୁଧବାର ଦିନ ୩ ରୁ ୪ ମଧ୍ୟରେ ସମୟ ନିର୍ଦ୍ଧାରାନ କରି ଇ-ମେଲ ମାଧ୍ୟମରେ ସମସ୍ତ ଯାତ୍ରୀଙ୍କୁ ସୂଚନା ଦେଇଥିଲା। କିନ୍ତୁ ୩୫ ଜଣଙ୍କ ଟିକେଟ ବୁକ୍ କରିଥିବା ଟ୍ରାଭେଲ ଏଜେଣ୍ଟ ସିଙ୍ଗାପୁରକୁ ବିମାନ ସମୟର ପରିବର୍ତ୍ତନ ବିଷୟରେ ଯାତ୍ରୀମାନଙ୍କୁ ସୂଚନା ଦେଇନଥିଲା।
ଏଥିସହିତ ସ୍କୁଟ ଏୟାରଲାଇନ୍ସର ଅଧିକାରୀମାନେ କହିଛନ୍ତି ଯେ, ସମସ୍ତ ଯାତ୍ରୀଙ୍କୁ ଇ-ମେଲ ପଠାଇ ବିମାନର ସମୟ ପୁନଃ ନିର୍ଦ୍ଧାରଣ ସମ୍ପର୍କରେ ସୂଚନା ଦିଆଯାଇଛି। ଏଭଳି ପରିସ୍ଥିତିରେ ଅନେକ ଲୋକ ନିର୍ଦ୍ଧାରିତ ସମୟରେ ବିମାନବନ୍ଦରରେ ପହଞ୍ଚି ଯାତ୍ରା ମଧ୍ୟ କରିଥିଲେ। ଆସି ନ ଥିବା ଯାତ୍ରୀଙ୍କ ନାମ ମଧ୍ୟ ବାରମ୍ବାର ଘୋଷଣା କରାଯାଇଥିଲା, କିନ୍ତୁ ଯାତ୍ରୀମାନେ ଅନୁପସ୍ଥିତି ଥିବାରୁ ବିମାନଟି ଉଡ଼ିଯାଇଥିଲା।