ମୁମ୍ବଇ: ରିଲାଏନ୍ସ ଜିଓ ଏବଂ ଜିଏସଏମ୍ଏ ଦେଶବ୍ୟାପୀ ଏକ ବିସ୍ତାରିତ ଜିଏସଏମ୍ଏ କନେକ୍ଟେଡ ଓମେନ୍ କମିଟ୍ମେଣ୍ଟ ଇନିସିଏଟିଭ ଅଧୀନରେ ଏକ ମିଳିତ ପ୍ରୟାସ ସ୍ୱରୂପ ସେମାନଙ୍କର ଡିଜିଟାଲ କୁଶଳତା କାର୍ଯ୍ୟକ୍ରମ ପ୍ରଚଳନ ସମ୍ପର୍କରେ ଗର୍ବର ସହିତ ଘୋଷଣା କରିଛନ୍ତି। ଏହି କାର୍ଯ୍ୟକ୍ରମ ଗ୍ରାମୀଣ ମହିଳା ଏବଂ ଉପେକ୍ଷିତ / ନିମ୍ନ ଆୟକାରୀ ଗୋଷ୍ଠୀର ବ୍ୟକ୍ତିବିଶେଷଙ୍କୁ ଆବଶ୍ୟକତା ଭିତ୍ତିକ ତାଲିମ ଯୋଗାଇଦେଇ ସେମାନଙ୍କୁ ଡିଜିଟାଲ ସୁଯୋଗର ଅର୍ଥପୂର୍ଣ୍ଣ ଉପଯୋଗ କରିବା ଦିଗରେ ସହାୟତା ଯୋଗାଇଦେବା ଲକ୍ଷ୍ୟ ରଖିଛି।
ଜିଏସଏମ୍ଏର ମୋବାଇଲ ଲିଙ୍ଗଗତ ପାର୍ଥକ୍ୟ ରିପୋର୍ଟ ୨୦୨୨ ଅନୁଯାୟୀ ଭାରତରେ ମହିଳାମାନେ ପୁରୁଷଙ୍କ ଦ୍ୱାରା ମୋବାଇଲ ଇଣ୍ଟରନେଟ ବ୍ୟବହାର ତୁଳନାରେ ୪୧% କମ୍ ମୋବାଇଲ ଇଣ୍ଟରନେଟ ବ୍ୟବହାର କରୁଛନ୍ତି। ଭାରତରେ ମୋଟ ୩୩୦ ନିୟୁତ ମହିଳା ଏପର୍ଯ୍ୟନ୍ତ ମୋବାଇଲ ଇଣ୍ଟରନେଟ ବ୍ୟବହାର କରୁନାହାନ୍ତି, ଯେଉଁ ସଂଖ୍ୟା ପୁରୁଷଙ୍କ କ୍ଷେତ୍ରରେ ୨୪୮ ନିୟୁତ ରହିଛି। ସାକ୍ଷରତା ଏବଂ ଡିଜିଟାଲ କୁଶଳତାର ଅଭାବ ମୋବାଇଲ ଇଣ୍ଟରନେଟ ବ୍ୟବହାର କ୍ଷେତ୍ରରେ ଅନ୍ୟତମ ଶୀର୍ଷ ପ୍ରତିବନ୍ଧକ ହୋଇଥିବା ଜଣାଯାଇଛି।
ଏହି କାର୍ଯ୍ୟକ୍ରମର ଅଂଶସ୍ୱରୂପ ଜିଏସଏମ୍ଏ ଏବଂ ଜିଓ ଟିମ୍ଗୁଡିକ ପ୍ରଚଳିତ ଥିବା ଡିଜିଟାଲ କୁଶଳତା ତାରତମ୍ୟ ସମ୍ପର୍କରେ ଆକଳନ କରିବା ଏବଂ ଭାରତ ପାଇଁ ସ୍ୱତନ୍ତ୍ର ଭାବରେ ଉଦ୍ଦିଷ୍ଟ ଆବଶ୍ୟକତା ଭିତ୍ତିକ ଡିଜିଟାଲ କୁଶଳତା ତାଲିମ ଟୁଲ୍କିଟ୍ ବିକାଶ ଦିଗରେ ଏକତ୍ର କାର୍ଯ୍ୟ କରିଥିଲେ। ବ୍ୟାପକ କ୍ଷେତ୍ରସ୍ତରୀୟ ଗବେଷଣା ଏବଂ ବ୍ୟବହାରକାରୀଙ୍କ ସୂଚନା ଆଧାରରେ ଟୁଲ୍କିଟ୍ ଡିଜାଇନ କରାଯାଇଥିଲା। ଉତ୍ତର ପ୍ରଦେଶ ଓ ତାମିଲନାଡୁରୁ ୧୦୦୦ରୁ ଅଧିକ ଗ୍ରାମୀଣ ମହିଳା ଓ ପୁରୁଷ ଏଥିରେ ଅଂଶଗ୍ରହଣ କରିଥିଲେ ଏବଂ ପରୀକ୍ଷଣ ପର୍ଯ୍ୟାୟରେ ଡିଜିଟାଲ ତାଲିମ ଟୁଲ୍କିଟ୍କୁ ଅଧିକ ମାର୍ଜିତ କରିବା ନିମନ୍ତେ ଆବଶ୍ୟକ ଉପାଦାନ ଯୋଗାଇ ଦେଇଥିଲେ।
ଜାତୀୟସ୍ତରରେ ପ୍ରଚଳନ ପର୍ଯ୍ୟାୟ ସମ୍ପ୍ରତି ଆଗେଇଚାଲିଛି ଏବଂ ଏହି କାର୍ଯ୍ୟକ୍ରମ ୧୦ଟି ରାଜ୍ୟରେ କାର୍ଯ୍ୟକାରୀ କରାଯାଉଛି, ଯେଉଁଥିରେ ମହିଳା ଏବଂ ଉପେକ୍ଷିତ ବର୍ଗଙ୍କ ନିକଟରେ ପହଞ୍ଚିବା ଉପରେ ଗୁରୁତ୍ୱ ଦିଆଯାଉଛି। ରିଲାଏନ୍ସ ଫାଉଣ୍ଡେସନ ନିଜର ବିଶାଳ ନେଟୱର୍କ ଏବଂ ସ୍ୱୟଂ ସହାୟକ ଗୋଷ୍ଠୀଗୁଡିକ ଜରିଆରେ ବିଶେଷକରି ଗ୍ରାମାଞ୍ଚଳରେ ଏହି କାର୍ଯ୍ୟକ୍ରମର କାର୍ଯ୍ୟକାରିତାକୁ ସମର୍ଥନ ଯୋଗାଇଦେବ।
ଏହି ଅବସରରେ ପ୍ରକାଶ କରି ଶ୍ରୀମତୀ ଇଶା ଅମ୍ବାନି, ଡାଇରେକ୍ଟର, ରିଲାଏନ୍ସ ଜିଓ କହିଛନ୍ତି, “ମହିଳାଙ୍କୁ ସଶକ୍ତ କରିବା, ସେମାନଙ୍କୁ ଅଧିକ ସଂଯୁକ୍ତ ହେବା, ସ୍ୱାଧୀନ ଏବଂ ସୁରକ୍ଷିତ ରହିବାର ଅନୁଭୂତି ପ୍ରଦାନ କରିବା ଏବଂ ସେମାନଙ୍କୁ ସେମାନଙ୍କର ଦୈନନ୍ଦିନ ଜୀବନରେ ସହାୟକ ହେଉଥିବା ଗୁରୁତ୍ୱପୂର୍ଣ୍ଣ ସୂଚନା ପ୍ରାପ୍ତି ସୁଯୋଗ ଦେବାର କ୍ଷମତା ମୋବାଇଲ ପ୍ରଯୁକ୍ତିର ରହିଛି। ସମଗ୍ର ଭାରତରେ ମହିଳାମାନଙ୍କ ନିକଟରେ ଡିଜିଟାଲ କୁଶଳତା ତାଲିମ ପହଞ୍ଚାଇବା ନିମନ୍ତେ ଏହି କାର୍ଯ୍ୟକ୍ରମରେ ଜିଏସଏମ୍ଏ ସହିତ ସହଭାଗିତା କରିବା ନେଇ ଆମେ ଗର୍ବିତ ଏବଂ ଏହାର ସର୍ବାଙ୍ଗୀନ ସଫଳତା କାମନା କରୁଛୁ।”