ଭୁବନେଶ୍ୱର: ଶିଳ୍ପ ବିଭାଗ ପକ୍ଷରୁ ଖାରବେଳ ଭବନ କାର୍ଯ୍ୟାଳୟରେ ଦୁର୍ନୀତି ନିବାରଣ ସପ୍ତାହ (୩୦ ଅକ୍ଟୋବରରୁ ୫ ନଭେମ୍ବର) ଅବସରରେ ଏକ ଶପଥ ପାଠ ସମାରୋହ ଆୟୋଜିତ ହୋଇଯାଇଛି । ବିଭାଗୀୟ ସ୍ୱତନ୍ତ୍ର ଶାସନ ସଚିବ ତଥା ଅର୍ଥ ପରାମର୍ଶଦାତା ଶ୍ରୀ ରାଜେନ୍ଦ୍ର ନାରାୟଣ ଜେନା ଅଧିକାରୀ ଓ କର୍ମଚାରୀମାନଙ୍କୁ ଶପଥ ପାଠ କରାଇଥିଲେ।
ଦୁର୍ନୀତିର ମୂଳପୋଛ କରିବା ଓ ଏହାକୁ ସମ୍ପୂର୍ଣ୍ଣ ବିରୋଧ କରିବା ଦିଗରେ ନିଜର କର୍ତ୍ତବ୍ୟ ସାଧନ କରିବା ଆବଶ୍ୟକ ବୋଲି ଶ୍ରୀ ଜେନା କହିଥିଲେ। ଏ ବର୍ଷର ଥିମ୍ ‘Say no to corruption and commit to the Nation’ ବୋଲି ଜଣାଇ ଶ୍ରୀ ଜେନା କହିଥିଲେ ଯେ ସାଧୁତା ଓ ସ୍ୱଚ୍ଛତା ମାଧ୍ୟମରେ ସରକାର ଏବଂ ସମାଜ ପାଇଁ ସେବାକୁ ପ୍ରାଧାନ୍ୟ ଦିଆଯିବା ଉଚିତ।
ଚରିତ୍ରବତ୍ତା ଜଣେ ମଣିଷର ଏକ ଗୁରୁତ୍ୱପୂର୍ଣ୍ଣ ସୁଗୁଣ ଅଟେ। ତେଣୁ ଦୁର୍ନୀତିକୁ ମୂଳପୋଛ କରିବାରେ ପ୍ରଥମେ ନିଜକୁ ଦୁର୍ନୀତିମୁକ୍ତ କରିବା ଉଚିତ। ଏହା ଦ୍ୱାରା ଦୁର୍ନୀତିମୁକ୍ତ ସମାଜ ଗଠନ ହୋଇପାରିବ। ନିଜେ ସଚେତନ ହେଲେ ସମାଜରେ ସଚେତନତା ସୃଷ୍ଟି କରାଯାଇପାରିବ ବୋଲି ଶ୍ରୀ ଜେନା ଏହି ଅବସରରେ ମତବ୍ୟକ୍ତ କରିଥିଲେ। ଅନ୍ୟମାନଙ୍କ ମଧ୍ୟରେ ଉପଶାସନ ସଚିବ ଶ୍ରୀ ଶୈଳେନ୍ଦ୍ର ନାରାୟଣ ନାୟକ ଏବଂ ଅନ୍ୟ ବରିଷ୍ଠ ଅଧିକାରୀ ଓ କର୍ମଚାରୀମାନେ ଉପସ୍ଥିତ ରହି ଶପଥ ପାଠ କରିଥିଲେ।
