ନୂଆଦିଲ୍ଲୀ, ନିକଟରେ ରେଳୱେ ଚାକିରୀ ପାଇଁ ବାହାରିଥିବା ବିଜ୍ଞାପନ ଦେଖି ଆବେଦନ କରୁଛନ୍ତି। ହେଲେ ସାବଧାନ। କାରଣ ଏହି ସଂସ୍ଥା ଦ୍ବାରା ରେଳ ବିଭାଗ କୌଣସି ପଦପଦବୀରେ ନିଯୁକ୍ତି ପାଇଁ କ୍ଷମତା ଦେଇ ନାହିଁ। ଏପରି ସ୍ପଷ୍ଟିକରଣ ଦେଇଛି ରେଳ ବିଭାଗ। ଏହି ସଂସ୍ଥାର ବିଜ୍ଞାପନ ଲୋଭରେ ନ ପଡି କେହି ଆବେଦନ କରନ୍ତୁ ନାହିଁ କିମ୍ବା ଆବେନନ ଫି ଦାଖଲ କରନ୍ତୁ ନାହିଁ। ତାଗିଦ କରିଛି ରେଳ ବିଭାଗ।
ରେଳ ବିଭାଗ ତରଫରୁ ବାହାରିଥିବା ଏକ ବିଜ୍ଞପ୍ତିରେ ଦର୍ଶାଯାଇଛି ଯେ, ଗତ 8 ତାରିଖରେ ଦେଶର ପ୍ରମୁଖ ସଂବାଦପତ୍ରରେ ଏକ ନିଯୁକ୍ତି ବିଜ୍ଞାପନ ବାହାରିଛି। ଏହି ବିଜ୍ଞାପନ Avestran Infotech ସଂସ୍ଥା ବାହାର କରିଛି। ଏଥିରେ ଦର୍ଶାଯାଇଛି ଯେ, ରେଳ ବିଭାଗରେ 5285ଟି ଆଉଟସୋର୍ସିଂ ପଦବୀରେ ନିଯୁକ୍ତି ଦିଆଯିବ। ସେଥିପାଇଁ ଯୋଗ୍ୟ ପ୍ରାର୍ଥିମାନେ 750 ଟଙ୍କା ଫି ଦେଇ ଆବେଦନ କରିବେ।
ତେବେ ଏହି ବିଜ୍ଞାପନ ସଂପୂର୍ଣ୍ଣ ବେଆଇନି ବୋଲି ରେଳ ବିଭାଗ କହିଛି। ରେଳୱେର ଯାହା ନିଯୁକ୍ତି ହେବ ତାହା ରେଳୱେ ରିକ୍ୟୁରଟମେଣ୍ଟ ବୋର୍ଡ କିମ୍ବା ରେଳୱେ ରିକ୍ୟୁରଟମେଣ୍ଟ ସେଲ ଦ୍ବାରା କରାଯାଇଥାଏ। ବର୍ତ୍ତମାନ ସୁଦ୍ଧା ରେଳ ବିଭାଗ କୌଣସି ଘରୋଇ ସଂସ୍ଥାକୁ ନିଯୁକ୍ତି କରିବା ପାଇଁ କ୍ଷମତା ଦେଇ ନାହିଁ। ସେଥିପାଇଁ କେହି ଏହି ସଂସ୍ଥାର ବିଜ୍ଞାପନରେ ପ୍ରଲୋଭିତ ହୋଇ ଆବେଦନ ନ କରିବା ପାଇଁ ରେଳ ବିଭାଗ ତରଫରୁ କୁହାଯାଇଛି। ତେବେ ସଂସ୍ଥା ବିରୋଧରେ ରେଳ ବିଭାଗ ଦୃଢ କାର୍ଯ୍ୟାନୁଷ୍ଠାନ ନେବ ବୋଲି ବିଜ୍ଞପ୍ତିରେ ଦର୍ଶାଯାଇଛି।