ନୂଆଦିଲ୍ଲୀ: ପଶ୍ଚିମବଙ୍ଗ ନିର୍ବାଚନ ପରେ ହୋଇଥିବା ହିଂସା ଘଟଣାର ଏକ ନୂଆ ମୋଡ ନେଇଛି। ସୁପ୍ରିମକୋର୍ଟର ପ୍ରଧାନ ବିଚାରପତିଙ୍କୁ ଦୁଇ ହଜାରରୁ ଉର୍ଦ୍ଧ୍ଵ ମହିଳା ଆଇନଜୀବୀ ଏହି ହିଂସା ଘଟଣାର ଏସଆଇଟି ଗଠନ ପାଇଁ ନିବେଦନ କରିଛନ୍ତି। ଏହି ଘଟଣା ଉପରେ ପ୍ରଧାନ ବିଚାରପତି ନିଜେ ସଜ୍ଞାନକୁ ନେଇଛନ୍ତି ବୋଲି ମହିଳା ଆଇନଜୀବୀମାନେ କହିଛନ୍ତି।
ସମ୍ପୃକ୍ତ ଆଇନଜୀବୀମାନେ ଚିଠିରେ ଉଲ୍ଲେଖ କରିଛନ୍ତି ଯେ, ମହିଳା, ଶିଶୁ ଏବଂ ଦଳିତଙ୍କ ବିରୋଧରେ ମାନବାଧିକାର ସୁରକ୍ଷା ସୁନିଶ୍ଚିତ କରିବା ଉଚିତ। ନିର୍ବାଚନ ପରେ ହୋଇଥିବା ହିଂସା ଯୋଗୁଁ ଅନେକ ଲୋକ ପଡୋଶୀ ରାଜ୍ୟକୁ ପଳାୟନ କରିଛନ୍ତି। ଏହି ମାମଲାରେ ଏତାଲା ରୁଜ୍ଜୁ କରାଯାଇ ସ୍ଵତନ୍ତ୍ର ତଦନ୍ତ ଦଳ ଗଠନ କରାଯିବା ଆବଶ୍ୟକ। ହିଂସା ପରେ ଯେଉଁ ଲୋକ ପଳାୟନ କରିଛନ୍ତି, ସେମାନଙ୍କ ସୁରକ୍ଷା ପାଇଁ ପଶ୍ଚିମବଙ୍ଗ ସରକାରଙ୍କୁ ନିର୍ଦ୍ଦେଶ ଦିଆଯାଉ। ପଡୋଶୀ ରାଜ୍ୟରେ ଶରଣ ନେଇଥିବା ଲୋକଙ୍କ ତାଲିକା ପ୍ରସ୍ତୁତ କରାଯାଇ ସେମାନଙ୍କର ସୁରକ୍ଷା ନିଶ୍ଚିତ କରାଯାଉ।
ସୂଚନା ଅନୁଯାୟୀ, ଦେଶର ୨୮ ଟି ରାଜ୍ୟ ଏବଂ ୮ ଟି କେନ୍ଦ୍ର ଶାସିତ ଅଞ୍ଚଳ ପ୍ରଦେଶର ୨୦୯୩ ଜଣ ମହିଳା ଓକିଲ ପ୍ରଧାନ ବିଚାରପତିଙ୍କୁ ଚିଠି ଲେଖିଛନ୍ତି। ହିଂସାର ତଦନ୍ତ ପାଇଁ ଏସଆଇଟି ଗଠନ କରିବା ପାଇଁ ସେମାନେ ଦାବି କରିଛନ୍ତି। ଏଥିପାଇଁ ସୁପ୍ରିମକୋର୍ଟର ଜଣେ ଅବସରପ୍ରାପ୍ତ ବିଚାରପତିଙ୍କ ତତ୍ବାବଧାନରେ ଏସଆଇଟି ଗଠନ କରାଯାଉ ବୋଲି ସେମାନେ ଦାବି କରିଛନ୍ତି। ଯେଉଁଥିରେ ନିରପକ୍ଷ ତଦନ୍ତ ହୋଇପାରିବ ଏବଂ ପୀଡିତ ପରିବାରକୁ ତୁରନ୍ତ ନ୍ୟାୟ ମିଳିପାରିବ। ଏତତ ବ୍ୟତୀତ ଏନଆଇଏକୁ ଏହାର ତଦନ୍ତ ଦାୟିତ୍ଵ ଦିଆଯାଉ, ଯ’ଦ୍ୱାରା ଦେଶର ସଂସ୍କୃତି ଏବଂ ଏକତା ଉପରେ ଦେଶବିରୋଧୀ ଆକ୍ରମଣକୁ ଛାନଭିନ କରିପାରିବ।
ଉଲ୍ଲେଖ ଯୋଗ୍ୟ ଯେ, ଗତ ସପ୍ତାହରେ ଏହି ମାମଲା ଭଳି ଏକ ଅଭିଯୋଗ ଉପରେ ଉଭୟ କେନ୍ଦ୍ର ସରକାର ଏବଂ ରାଜ୍ୟ ସରକାରକୁ ଅଦାଲତ ନୋଟିସ ଜାରି କରିଥିଲେ। ଯାହା ଏହାର ଶୁଣାଣି ଆସନ୍ତାକାଲି ହେବ ବୋଲି କୁହାଯାଉଛି।