ଖୋର୍ଦ୍ଧା: ଆଜି ଏସଟିଏଫ କୁ ମିଳିଛି ବଡ଼ ସଫଳତା। ଖୋର୍ଦ୍ଧାରୁ ଏକ କୋଟିରୁ ଉର୍ଦ୍ଧ୍ଵ ଟଙ୍କାର ବ୍ରାଉନ ସୁଗାର ଜବତ କରିଛି ଏସଟିଏଫ।
ସୂଚନା ମୁତାବକ ଭୁବନେଶ୍ୱର ଏସଟିଏଫର ଟିମ କୌଣସି ବିଶେଷ ସୂତ୍ରରୁ ଖବର ପାଇ ଖୋର୍ଦ୍ଧା ବରୁଣେଇ ରୋଡ଼ରେ ଚଢ଼ାଉ କରିଥିଲା। ଚଢ଼ାଉରେ ଚାରି ଜଣ ବ୍ରାଉନ ସୁଗାର ବେପାରି ଗିରଫ ହେବା ସହ ସେମାନଙ୍କ ନିକଟରୁ ୧ କିଲୋ ୩୦ ଗ୍ରାମ ବ୍ରାଉନ ସୁଗାର ଏବଂ ଅନ୍ୟାନ୍ୟ ଆପତ୍ତିଜନକ ସାମଗ୍ରୀ ଜବତ କରିଛି ଏସଟିଏଫ।
ଗିରଫ ଅଭିଯୁକ୍ତ ମାନେ ହେଲେ ଖୋର୍ଦ୍ଧା ଟାଉନ ଥାନା ଅଞ୍ଚଳର ରାକେଶ କୁମାର ବାରିକ, ବିରଞ୍ଚିନାରାୟଣ ସାହୁ, ଜଗବନ୍ଧୁ ବିଶ୍ୱାଳ ଏବଂ ସନ୍ତୋଷ ରାଉତରାୟ।
ସମସ୍ତ ଅଭିଯୁକ୍ତଙ୍କ ବିରୋଧରେ ୨୧ (ଗ)/୨୯ ଏନଡ଼ିପିଏସ ଅଧିନିୟମ ଅନୁଯାୟୀ ଏସଟିଏଫ କେଶ ନମ୍ବର ୧୬/୨୨ ରେ ମାମଲା ରୁଜୁ କରି କୋର୍ଟଚାଲାଣ କରିଛି।
ସୂଚନା ଥାଉକି ୨୦୨୦ ମସିହାଠାରୁ ଏସଟିଏଫ ନିଶା ଦ୍ରବ୍ୟ ସମ୍ବନ୍ଧୀୟ ସ୍ୱତନ୍ତ୍ର ଚଢ଼ାଉ ଅଭିଯାନ ଜାରି ରଖିଛି। ଏବଂ ଅଦ୍ୟାବଧି ୫୫ କିଲୋ ବ୍ରାଉନ ସୁଗାର, ୨୦୨ ଗ୍ରାମ କୋକିନ, ୧୧୧ କୁଇଣ୍ଟାଲରୁ ଉର୍ଦ୍ଧ୍ଵ ଗଞ୍ଜେଇ ଏବଂ ୭୫୦ ଗ୍ରାମ ଅଫିମ ସମେତ ୧୫୬ ରୁ ଉର୍ଦ୍ଧ୍ଵ ନିଶା ବେପାରୀଙ୍କୁ ଗିରଫ କରିଛି।