ନୂଆଦିଲ୍ଲୀ: ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ଆଜି ତେଲଙ୍ଗାନା ଏବଂ ଆନ୍ଧ୍ରପ୍ରଦେଶର ୪୦ ଟି ସ୍ଥାନରେ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ (ପିଏଫ୍ଆଇ) ବିରୋଧରେ ଚଢାଉ କରିଛି। ଏହି ସୂଚନା ପ୍ରଦାନ କରି ଜଣେ ଅଧିକାରୀ କହିଛନ୍ତି ଯେ, ଆତଙ୍କବାଦୀ କାର୍ଯ୍ୟକଳାପ ତଥା ଧର୍ମ ଆଧାରରେ ବିଭିନ୍ନ ଗୋଷ୍ଠୀ ମଧ୍ୟରେ ଶତ୍ରୁତା ସୃଷ୍ଟି କରିବା ପାଇଁ ପ୍ରଶିକ୍ଷଣ ଶିବିର ଆୟୋଜନ କରାଯିବା ସହ ପିଏଫଆଇ ବିରୋଧରେ ଏହି ଚଢାଉ କରାଯାଇଛି।
ଏନଆଇଏ ମୁଖପାତ୍ର କହିଛନ୍ତି ଯେ, ତେଲେଙ୍ଗାନାର ୩୮ ଟି ସ୍ଥାନ ଏବଂ ଆନ୍ଧ୍ରପ୍ରଦେଶର ୨ ଟି ସ୍ଥାନରେ ହୋଇଥିବା ଚଢାଉ ସମୟରେ ଚାରି ଜଣଙ୍କୁ ପଚରାଉଚରା ପାଇଁ ହେପାଜତକୁ ନେଇଛି। ଏହି ଅଧିକାରୀ କହିଛନ୍ତି ଯେ, ଅପରେସନ୍ ସମୟରେ ଡିଜିଟାଲ୍ ଉପକରଣ, ଡକ୍ୟୁମେଣ୍ଟ୍, ଦୁଇଟି ଖଣ୍ଡା ଏବଂ ୮.୩୧ ଲକ୍ଷରୁ ଅଧିକ ନଗଦ ଟଙ୍କା ଜବତ କରାଯାଇଛି।
ଏହି ମାମଲା ପ୍ରଥମେ ତେଲେଙ୍ଗାନାର ନିଜାମାବାଦ ପୋଲିସ ଷ୍ଟେସନରେ ଜୁଲାଇ ୪ ତାରିଖରେ ପଞ୍ଜୀକୃତ ହୋଇଥିଲା ଏବଂ ରାଜ୍ୟ ପୋଲିସର ତଦନ୍ତ ବେଳେ ଚାରି ଅଭିଯୁକ୍ତ-ଅବଦୁଲ କାଦର, ଶେଖ ସାହାଦୁଲ୍ଲା, ମୋହଦ ଇମ୍ରାନ ଏବଂ ମହମ୍ମଦ ଅବଦୁଲ ମୋବିନଙ୍କୁ ଗିରଫ କରାଯାଇଥିଲା।
