ନୂଆଦିଲ୍ଲୀ: ଖାଲିସ୍ତାନୀ ଆତଙ୍କବାଦୀ ଅର୍ଶ ଡଲ୍ଲାର ଦୁଇ ଘନିଷ୍ଠ ସହଯୋଗୀଙ୍କୁ ଦିଲ୍ଲୀ ପୋଲିସ ଗିରଫ କରିଛି। ପୋଲିସର ସୂଚନାନୁସାରେ, ପଞ୍ଜାବରେ କିଛି ବଡ ଘଟଣା କରିବାକୁ ଅର୍ଶ ଡଲ୍ଲାର ନିକଟବର୍ତ୍ତୀ ଲୋକମାନେ ଯୋଜନା କରିଥିଲେ। ଏହାପୂର୍ବରୁ ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ ଏନକାଉଣ୍ଟର ପରେ ଉଭୟଙ୍କୁ ଗିରଫ କରିଛି। ଗିରଫ ଦୁଇ ଅଭିଯୁକ୍ତଙ୍କ ନିକଟରୁ ଦିଲ୍ଲୀ ପୋଲିସ ମଧ୍ୟ ଅସ୍ତ୍ରଶସ୍ତ୍ର ଏବଂ ହ୍ୟାଣ୍ଡ ଗ୍ରେନେଡ ଜବତ କରିଛି।
ପୋଲିସ ଟିମ୍ ସୂଚନା ପାଇଥିଲା ଯେ, ଏହି ଦୁଇ ବଦମାସ ବିଳମ୍ବିତ ରାତିରେ ପ୍ରଗତି ମଇଦାନ ନିକଟ ଟନେଲ ଦେଇ ଯାଉଛନ୍ତି। ଏହି ସୂଚନା ଉପରେ କାର୍ଯ୍ୟ କରି ସ୍ପେଶାଲ୍ ସେଲ୍ ଟିମ୍ ପ୍ରଗତି ମଇଦାନର ଟନେଲ ଚାରିପାଖରେ ଘେରି ରହିଥିଲେ। ଏହି ଦୁଇ ଅଭିଯୁକ୍ତ ପ୍ରଗତି ମଇଦାନ ନିକଟରେ ପହଞ୍ଚିବା ମାତ୍ରେ ପୋଲିସ ସେମାନଙ୍କୁ ରହିବାକୁ କହିଥିଲା। କିନ୍ତୁ ପୋଲିସ ଆଗରେ ଦେଖି ସେମାନେ ଦୌଡି ପଳାଇବାକୁ ଲାଗିଲେ। ଏହା ପରେ ପୋଲିସ ସେମାନଙ୍କ ଉପରକୁ ଗୁଳି ଚଳାଇଥିଲା। ଏହା ପରେ ପୋଲିସ ଉଭୟଙ୍କୁ ଗିରଫ କରିଥିଲା। ପୋଲିସ ଏହି ଦୁଇ ବଦମାସଙ୍କୁ ପଚରାଉଚରା କରୁଛି। ପୋଲିସର ସୂଚନାନୁସାରେ, ଏହି ଦୁଇ ଅପରାଧୀ ଅର୍ଶ ଡଲ୍ଲାର ସହ ଯୋଗାଯୋଗରେ ଥିବା ପ୍ରାଥମିକ ଅନୁସନ୍ଧାନରୁ ଜଣାପଡିଛି।
ଅର୍ଶ ଡଲ୍ଲା କିଏ?:
ଖାଲିସ୍ତାନୀ ଆତଙ୍କବାଦୀ ଅର୍ଶ ଡଲ୍ଲା ବର୍ତ୍ତମାନ ଚର୍ଚ୍ଚାରେ ଅଛନ୍ତି। ଦିଲ୍ଲୀ ପୋଲିସର ସୂଚନାନୁସାରେ ଏହା ଲଶ୍କର-ଏ-ତୋଇବା ଏବଂ ଆଇଏସଆଇ ସହିତ ମଧ୍ୟ ଜଡିତ। ଡଲ୍ଲାର ସମ୍ପୂର୍ଣ୍ଣ ନାମ ହେଉଛି ଅର୍ଶଦୀପ ସିଂ। ପଞ୍ଜାବର ମୋଗା ଜିଲ୍ଲାର ଡଲ୍ଲା ଗାଁରେ ଅର୍ଶ ଡଲ୍ଲାର ଜନ୍ମଗ୍ରହଣ କରିଥିଲେ। ସେ ଦୀର୍ଘ ଦିନ ଧରି କାନାଡାରେ ରହି ନିଜର ଗ୍ୟାଙ୍ଗ ଚଳାଉଥିଲେ। କିଛି ସମୟ ପୂର୍ବରୁ ଡଲ୍ଲା ବିରୋଧରେ ଏନଆଇଏ ଏକ ରେଡ କର୍ଣ୍ଣର ନୋଟିସ ଜାରି କରିଛି। ସେ ମଧ୍ୟ ପଣଅଜାରେ ଅନେକ ଅପରାଧିକ ଘଟଣାରେ ସମ୍ପୃକ୍ତ ଥିବା ଅଭିଯୋଗ ହୋଇଛି।
ସୂଚନାଯୋଗ୍ୟ ଯେ ଭାରତ ସରକାର ଚଳିତ ବର୍ଷ ୨୮ ଜଣ ପ୍ରତିବନ୍ଧିତ ଅପରାଧୀ (ଗ୍ୟାଙ୍ଗଷ୍ଟର) ଙ୍କ ତାଲିକା ପ୍ରସ୍ତୁତ କରିଛନ୍ତି। ଯେଉଁମାନେ ୧୪ ଟି ଦେଶରୁ ସେମାନଙ୍କର କାର୍ଯ୍ୟକଳାପ କରୁଛନ୍ତି। ସେଥିମଧ୍ୟରୁ ନଅ ଜଣ କାନାଡାରେ ଏବଂ ପାଞ୍ଚ ଜଣ ଆମେରିକାରେ ଲୁଚି ରହିଛନ୍ତି। କେନ୍ଦ୍ର ସରକାର ପ୍ରକାଶ କରିଥିବା ତାଲିକାରେ ଅର୍ଶ ଡଲ୍ଲାଙ୍କ ନାମ ମଧ୍ୟ ରହିଥିଲା।
