ରେଢ଼ାଖୋଲ (କନ୍ଦର୍ପ ବେହେରା): ସରକାର କନ୍ୟା ସନ୍ତାନ ଜନ୍ମ ପାଇଁ ସରକାରୀ ଆର୍ଥିକ ସହଯୋଗ ପ୍ରଦାନ ଓ ବିବାହ ପାଇଁ ଆର୍ଥିକ ସହଯୋଗ ପ୍ରଦାନ କରିବାକୁ ଏବେ ଘୋଷଣା କରବା ସତ୍ତ୍ୱେ ସଚେତନତାର ଅଭାବ ଯୋଗୁଁ କନ୍ୟା ଭୃଣ ହତ୍ୟା କରାଯାଉଛି। ସରକାର ଏଥି ପାଇଁ ଗ୍ରାମାଞ୍ଚଳରେ ଅଙ୍ଗନବାଡି କର୍ମୀ ଓ ଆଶା କର୍ମୀମାନଙ୍କୁ ଦାୟିତ୍ୱ ଦେଇଛନ୍ତି। ଏତେ ଜନ ସଚେତନତା ସତ୍ତ୍ୱେ କନ୍ୟା ସନ୍ତାନ କୁ ମାରି ଫିଙ୍ଗି ଦିଆ ଯାଉଛି। ରେଢ଼ାଖୋଲ ସହରରେ ସେମିତି ଏକ ଲୋମ ଟାଙ୍ଗୁରା ଘଟଣା ଘଟିଛି।
ପ୍ରକାଶ ଯେ, ସମ୍ବଲପୁର ଜିଲ୍ଲା ରେଢ଼ାଖୋଲ ସହର ମଧ୍ୟ ଦେଇ ଯାଇଥିବା କେରାଣ୍ଡି ଜୋରର ଖନ୍ଦାପୋଲ ତଳୁ ଏକ ନବଜାତ ଶିଶୁ କନ୍ୟାର ମୃତ ଦେହ ଉଦ୍ଧାର କରିଛି ଦମକଳ ବାହିନୀ। ଗତକାଲି ରାତିରେ କେହି ମୃତ ଶିଶୁ କନ୍ୟାକୁ ପାଣିରେ ଫିଙ୍ଗି ଦେଇଥିବା ଅନୁମାନ କରାଯାଉଛି। କିଏ କାହିଁକି କେଉଁ ପରିସ୍ଥିତିରେ କନ୍ୟା ସନ୍ତାନ ଟିକୁ କେରାଣ୍ଡି ଜୋର ଭିତରକୁ ଫିଙ୍ଗିଲା ତଦନ୍ତ ସାପେକ୍ଷ। ଖବର ପାଇ ପୋଲିସ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି।