ଭୁବନେଶ୍ୱର, ଆଜାଦି କା ଅମୃତ ମହୋତ୍ସବ ପାଳନ ନିମନ୍ତେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ବିଭିନ୍ନ ବିଭାଗର ପ୍ରତିନିଧିମାନଙ୍କୁ ନେଇ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ବିଭାଗୀୟ ଶାସନ ସଚିବ ଶ୍ରୀ ସୁରେଶ ଚନ୍ଦ୍ର ଦଳାଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ରାଜ୍ୟବ୍ୟାପୀ କରାଯିବାକୁ ସ୍ଥିରୀକୃତ କାର୍ଯ୍ୟକ୍ରମ ସଂପର୍କରେ ଆଲୋଚନା କରାଯାଇଥିଲା ।
ଓଡ଼ିଶା ସଂଗୀତ ନାଟକ ଏକାଡେମୀ ତରଫରୁ ଭୁବନେଶ୍ୱର, ବାଲେଶ୍ୱର, ବ୍ରହ୍ମପୁର, ଭବାନୀପାଟଣା, ସମ୍ବଲପୁର ଓ କୋରାପୁଟଠାରେ ଦେଶାତ୍ମବୋଧକ ଶୀର୍ଷକ ଥାଇ ଶିଶୁ ନାଟକ, ଲୋକନୃତ୍ୟ, ଲୋକସଂଗୀତ, ଦେଶାତ୍ମବୋଧକ ନୃତ୍ୟ-ସଂଗୀତ, ଶାସ୍ତ୍ରୀୟ ନୃତ୍ୟ-ସଂଗୀତ ଆଦି ପରବେଷଣ କରାଯିବ ।
ତା’ଛଡ଼ା ସ୍ମରଣୀୟ ଘଟଣାକ୍ରମକୁ ପୁନଃସୃଜନ କରିବାକୁ ନିଷ୍ପତ୍ତି ଗ୍ରହଣ କରାଯାଇଛି । ସେଥିରେ ଲବଣ ସତ୍ୟାଗ୍ରହ, ଦାଣ୍ଡିଯାତ୍ରା ଭଳି କାର୍ଯ୍ୟକ୍ରମ ସାମିଲ କରାଯାଇଛି । ବର୍ଷବ୍ୟାପୀ ହେବାକୁ ଥିବା ଏହି କାର୍ଯ୍ୟକ୍ରମରେ ବିଭିନ୍ନ ଦେଶାତ୍ମବୋଧକ ବିଷୟବସ୍ତୁକୁ ନେଇ ପଥପ୍ରାନ୍ତ ନାଟକ ପରିବେଷଣ କରାଯିବା ସାଙ୍ଗକୁ ଲଳିତ କଳା ଏକାଡେମୀ ତରଫରୁ ଶିଳ୍ପୀଶିବିର, ଚିତ୍ରାଙ୍କନ ପ୍ରତିଯୋଗିତା, ବାଲୁକା କଳା ପ୍ରଭୃତି ସବୁବର୍ଗର ଲୋକଙ୍କୁ ନେଇ ଆୟୋଜନ ନିମନ୍ତେ ଯୋଜନା ପ୍ରସ୍ତୁତ କରାଯାଇଥିବା ବୈଠକରେ ପ୍ରକାଶ କରାଯାଇଥିଲା ।
ଏହି ସମସ୍ତ କାର୍ଯ୍ୟକ୍ରମରେ ଯେପରି ବହୁସଂଖ୍ୟାରେ ବିଦ୍ୟାଳୟ ଓ ମହାବିଦ୍ୟାଳୟର ଛାତ୍ରଛାତ୍ରୀଙ୍କୁ ସାମିଲ କରାଯାଇପାରିବ ସେ ନେଇ ସଂପୃକ୍ତ ବିଭାଗ ସହ ଯୋଗାଯୋଗ କରିବାକୁ ସ୍ଥିର କରାଯାଇଥିଲା । ତା’ଛଡ଼ା ଜନସାଧାରଣ କିପରି କାର୍ଯ୍ୟକ୍ରମ ସଂପର୍କରେ ଅବଗତ ହେବା ସହିତ ବହୁ ସଂଖ୍ୟାରେ ନିଜକୁ ସାମିଲ କରିପାରିବେ ସେ ଦିଗରେ କେତେକ ସୁଚିନ୍ତିତ ପଦକ୍ଷେପ ନେବାକୁ କୁହାଯାଇଥିଲା ।
ଆଜାଦି କା ଅମୃତ ମହୋତ୍ସବ ଯେପରି ଅତି ଗାମ୍ଭୀର୍ଯ୍ୟର ସହ ପାଳନ କରାଯାଇପାରିବ ଏବଂ ଏଥିରେ ଦେଶମାତୃକା ପାଇଁ ପ୍ରାଣବଳୀ ଦେଇଥିବା ଅନାଲୋଚିତ ମହାନାୟକମାନଙ୍କୁ ଲୋକଲୋଚନକୁ ଅଣାଯାଇପାରିବ ଏବଂ ସ୍ୱାଧୀନତା ସଂଗ୍ରାମୀମାନଙ୍କୁ ସମ୍ମାନିତ କରାଯିବ ସେ ସଂପର୍କରେ ଅଧିକ ଦୃଷ୍ଟିଦେବାକୁ ସଚିବ ପ୍ରକାଶ କରିଥିଲେ ।
ବିଭାଗୀୟ ନିର୍ଦ୍ଦେଶକ ଶ୍ରୀ ରଞ୍ଜନ କୁମାର ଦାସ ଏହା କେବଳ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର କାର୍ଯ୍ୟ ନୁହେଁ, ଏଥିରେ ସମସ୍ତ ବିଭାଗ ସାମିଲ ନହେଲେ କାର୍ଯ୍ୟକ୍ରମ ସଫଳ ହୋଇପାରିବ ନାହିଁ ବୋଲି କହିବା ସହ ସମସ୍ତ ବିଭାଗର ସହଯୋଗ କାମନା କରିଥିଲେ । ଏହି ବୈଠକରେ ଓଡ଼ିଆ ସାହିତ୍ୟ ଏକାଡେମୀର ସଭାପତି ଡ. ହୃଷିକେଶ ମଲ୍ଲିକ, ଓଡ଼ିଶା ସଂଗୀତ ନାଟକ ଏକାଡେମୀର ସଭାପତି ଡ. ଅରୁଣା ମହାନ୍ତି, ଯୁଗ୍ମ ନିର୍ଦ୍ଦେଶକ ଶ୍ରୀ ସୁବୋଧ କୁମାର ଆଚାର୍ଯ୍ୟ, ସଂଜୟ ମିଶ୍ର, ଏକାଡେମୀର ସଚିବ ଶ୍ରୀ ପ୍ରବୋଧ କୁମାର ରାଉତ, ପ୍ରବୋଧ କୁମାର ରଥ, ପଞ୍ଚାନନ ସାମଲ ପ୍ରମୁଖ ଯୋଗ ଦେଇଥିଲେ ।