ଭୁବନେଶ୍ବର,ବର୍ତ୍ତମାନ ସାଇବର ଠକମାନଙ୍କ ନୂଆ ତରିକା। ବିଭିନ୍ନ ପ୍ରକାରର କୌଶଳ ଫେଲ ମାରିବା ପରେ ବର୍ତ୍ତମାନ ରେଳ ବିଭାଗ ନାମରେ ବର୍ତ୍ତମାନ ଠକିବା ଆରମ୍ଭ କରିଛନ୍ତି। ଏହି ଠକମାନେ ଫୋନ କଲ କରି ରେଳବାଇ ରିଫଣ୍ଡ ପାଉଣା ଫେରସ୍ତ ପାଇଁ କହୁଛନ୍ତି।
ସେମାନେ ସାଧାରଣତଃ ଯେଉଁମାନେ ରେଳ ଯାତ୍ରୀ ସେମାନଙ୍କୁ ଟାର୍ଗେଟ କରିଛନ୍ତି। ତାଙ୍କ ବଳକା ଟଙ୍କା ଫେରସ୍ତ ହେବ ବୋଲି କହି ଯାତ୍ରୀଙ୍କ ଡେବିଟ୍ କିମ୍ବା କ୍ରେଡିଟ୍ କାର୍ଡର ସବିଶେଷ ବିବରଣୀ ମାଗୁଛନ୍ତି। ଯଦି ଆପଣ ସମସ୍ତ ତଥ୍ୟ ଦେଇଦେଲେ ତେବେ କଥା ସରିଲା। ହାକରମାନେ ଆପଣଙ୍କ ଆକାଉଣ୍ଟରୁ ଟଙ୍କା ଉଠାଇ ନେବେ।
ଏହିପରି ଘଟଣା ଆସିବା ପରେ ରେଳବାଇ ତରଫରୁ ଏକ ସ୍ପଷ୍ଟିକରଣ ତଥା ଯାତ୍ରୀଙ୍କୁ ପରାମର୍ଶ ଦେଇଛି। ବିଭାଗ କହିଛି ଯେ,ଏହାର ଗ୍ରାହକ କିମ୍ବା ରେଳ ବ୍ୟବହାରକାରୀଙ୍କୁ ସେମାନଙ୍କର ଡେବିଟ୍ କ୍ରେଡିଟ୍ କାର୍ଡର ବିବରଣୀ କାହାକୁ ପ୍ରକାଶ ନ କରିବାକୁ ଅନୁରୋଧ କରିଛି।
ଭାରତୀୟ ରେଳବାଇ, ଆଇଆରସିଟିସି କିମ୍ବା ରେଳ କର୍ମଚାରୀମାନେ କୌଣସି ସ୍ଥାନରେ ଯେପରିକି ଆରକ୍ଷଣ କେନ୍ଦ୍ର, ବୁକିଂ କାଉଣ୍ଟର, ୱେଟିଂ ହଲ, ଷ୍ଟେସନ ଇତ୍ୟାଦି ଠାରେ ଯାତ୍ରୀମାନଙ୍କୁ କୌଣସି ବ୍ୟକ୍ତିଗତ ବ୍ୟାଙ୍କିଙ୍ଗ ସୂଚନା ମାଗନ୍ତି ନାହିଁ। ଯେପରିକି ଡେବିଟ୍, କ୍ରେଡିଟ୍ କାର୍ଡ ନମ୍ବର, ଓଟିପି, ଏଟିଏମ୍ ପିନ୍, ସିଭିଭି ନମ୍ବର, ପ୍ୟାନ କାର୍ଡ ନମ୍ବର ଏବଂ ଜନ୍ମ ତାରିଖ ଇତ୍ୟାଦି।
ପୂର୍ବତଟ ରେଳପଥ ଏହାର ମୂଲ୍ୟବାନ ଗ୍ରାହକ, ରେଳ ବ୍ୟବହାରକାରୀ ଏବଂ ଯାତ୍ରୀମାନଙ୍କୁ ସେମାନଙ୍କର ବ୍ୟାଙ୍କିଙ୍ଗ ସୂଚନା କିମ୍ବା ଗୁପ୍ତ ନମ୍ବର କାହାକୁ ନ ଜଣାଇବାକୁ ପରାମର୍ଶ ଦେଇଛି। ଯଦି ଏପରି ଠକେଇର କେହି ଶୀକାର ହେଲେ ତେବେ ସେମାନେ ରେଳ ଭିଜିଲାନ୍ସକୁ ସୂଚନା ଦେବାକୁ ପରାମର୍ଶ ଦେଇଛି।