କୋଲକାତା, ଦେଶର ଶାସନ ଲୋକଙ୍କ ପାଖରେ ପହଁଚିବା ପାଇଁ ଯଦି ମୋଦୀ ସରକାର ପ୍ରକୃତରେ ଚାହୁଁଛନ୍ତି ତେବେ ଦେଶରେ 4ଟି ରାଜଧାନୀ କରନ୍ତୁ। ଏହିପରି ଏକ ଆହ୍ବାନ ଦେଇଛନ୍ତି ପଶ୍ଚିମ ବଂଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଆଜି ନେତାଜୀ ସୁଭାଷ ଚନ୍ଦ୍ର ବୋଷଙ୍କ 125 ତମ ଜୟନ୍ତୀ ଅବସରରେ ଆୟୋଜିତ ଏକ ସାଧାରଣ ସଭାରେ ମମତା ଏହା କହିଛନ୍ତି।
ସେ କହିଛନ୍ତି ଯେ ତାମିଲନାଡୁ ଲୋକ ରାଜଧାନୀରେ କାମ ଥିଲେ ସେମାନଙ୍କୁ ଆସିବାକୁ ଦୁଇତିନି ଦିନ ଲାଗୁଛି। ଅନେକ ଲୋକଙ୍କ ପାଇଁ ରାଜଧାନୀ ନୂଆଦିଲ୍ଲୀ ଆସିବା କାଠିକର ପାଠ। ସେଥିପାଇଁ କେନ୍ଦ୍ର ସରକାର ଭାରତରେ 4ଟି ରାଜଧାନୀ କରନ୍ତୁ। ଏହି ଚାରୋଟି ରାଜଧାନୀ ପୂର୍ବ, ପଶ୍ଚିମ, ଉତ୍ତର ଏବଂ ଦକ୍ଷିଣ ରାଜ୍ୟ ସମୁହକୁ ନେଇ କରାଯାଉ। ପୂର୍ବ ରାଜ୍ୟଗୁଡିକ ନେଇ ଯେଉଁ ରାଜଧାନୀ ହେବ ତାହା କୋଲକତାରେ କରାଯାଉ ବୋଲି ମମତା କହିଛନ୍ତି।
ନେତାଜୀ ଦେଶରେ ଶାସନ ବିକେନ୍ଦ୍ରୀକରଣର ସ୍ବପ୍ନ ଦେଖୁଥିଲେ ବୋଲି ମମତା କହିଛନ୍ତି। ହେଲେ ବର୍ତମାନ କେନ୍ଦ୍ର ସରକାର ୱାନ ନେସନ ୱାନ ଲିଡର ଥିଓରୀରେ ଚାଲୁଛନ୍ତି। କେନ୍ଦ୍ରରେ ସରକାର ଦୁଇଥର ହେଲେଣି। ହେଲେ କେବେ ବି ସୁଭାଷ ବୋଷଙ୍କ ଜନ୍ମଦିନ ପାଳନ କରିଥିଲେ କି ବୋଲି ମମତା ପ୍ରଶ୍ନ କରିଛନ୍ତି। ଏଥର ନିର୍ବାଚନ ଥିବାରୁ କେନ୍ଦ୍ର ସରକାର ବେଶ ତତ୍ପର ବୋଲି ମମତା କହିଛନ୍ତି।
ଏଥିସହିତ ସୁଭାଷ ବୋଷଙ୍କ ଜନ୍ମଦିନକୁ ପରକ୍ରାମ ଦିବସ ଘୋଷଣାକୁ ମଧ୍ୟ ତୀବ୍ର ସମାଲୋଚନା କରିଥିଲେ। ସେ କହିଥିଲେ ଯେ, ପରାକ୍ରମ ଦିବସ କଣ ? ବିଶ୍ବକବି ରବିନ୍ଦ୍ରନାଥ ଠାକୁର ନେତାଜୀଙ୍କୁ କହିଥିଲେ ଦେଶନାୟକ। ତେଣୁ କେନ୍ଦ୍ର ସରକାର ପରାକ୍ରମ ଦିବସ ପରିବର୍ତ୍ତେ ଏହାକୁ ଦେଶନାୟକ ଦିବସ ଭାବେ ଘୋଷଣା କରନ୍ତୁ। ପରାକ୍ରମ ହେଉଛି ଏକ ଗୁଜରାଟୀ ଭାଷା। ଏହାକୁ କେନ୍ଦ୍ର ତୁରନ୍ତ ପ୍ରତ୍ୟାହାର କରନ୍ତୁ ବୋଲି କହିଥିଲେ।
