Gujarat Urban Election21: ଫେବୃଆରୀ 21 ରେ ଗୁଜୁରାଟର ଛଅଟି ମହାନଗର ନିଗମରେ ନିର୍ବାଚନ ଅନୁଷ୍ଠିତ ହେବ। ସେଗୁଡିକ ହେଲା ଅହମ୍ମଦାବାଦ, ସୁରଟ, ବଦୋଦରା, ରାଜକୋଟ, ଜାମନଗର ଏବଂ ଭବନଗର ମହାନଗର ନିଗମ। ସେହିପରି ଫେବୃଆରୀ 28 ରେ, 31 ଟି ଜିଲ୍ଲା ପଞ୍ଚାୟତ, 81 ଟି ପୌରସଂସ୍ଥା ଏବଂ 231 ଟି ତହସିଲ ପଞ୍ଚାୟତରେ ନିର୍ବାଚନ ହେବ। ତେବେ ଏହା ଏକ ସ୍ଥାନୀୟ ନିର୍ବାଚନ ହୋଇଥିଲେ ମଧ୍ୟ ଦେଶ ସାରା ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି।
ପ୍ରଥମ ଥର ପାଇଁ ବିଜେପି ଏହି ପୌର ନିର୍ବାଚନରେ ମୁସଲିମ ପ୍ରାର୍ଥୀମାନଙ୍କୁ ମଇଦାନରେ ଛିଡା କରୁଛି। ଗୁଜୁରାଟରେ ବିଜେପି ଆରମ୍ଭରୁ ହିନ୍ଦୁତ୍ୱ ଏଜେଣ୍ଡାରେ ରହି ମୁସଲମାନଙ୍କୁ ପ୍ରାର୍ଥୀ କରୁ ନ ଥିଲା। ଲୋକସଭା ନିର୍ବାଚନ ହେଉ କିମ୍ବା ବିଧାନସଭା ନିର୍ବାଚନ, ଗତ ତିନି ଦଶନ୍ଧି ମଧ୍ୟରେ ବିଜେପି କୌଣସି ମୁସଲମାନଙ୍କୁ ପ୍ରାର୍ଥୀ କରି ନାହିଁ।
ହେଲେ ଚଳିତ ପୌର ନିର୍ବାଚନରେ ବିଜେପି 31 ଜଣ ମୁସଲିମ ପ୍ରାର୍ଥୀଙ୍କ ନାମ ଘୋଷଣା କରିଛି। ଏମାନେ ଭାରୁଚ ଜିଲ୍ଲାର ପୌର ଏବଂ ପଞ୍ଚାୟତ ନିର୍ବାଚନରେ ପ୍ରାର୍ଥୀ ହୋଇଛନ୍ତି। ଏହି ସ୍ଥାନରେ ନିର୍ବାଚନ ଆସନ୍ତା 28 ତାରିଖରେ ଅନୁଷ୍ଠିତ ହେବ। ପ୍ରଥମ ଥର ପାଇଁ ବିଜେପି ଏତେ ସଂଖ୍ୟକ ମୁସଲିମ ପ୍ରାର୍ଥୀ ଛିଡା କରାଇବା ପ୍ରଥମ ଘଟଣା। ଏହି ଜିଲ୍ଲାରେ ମୁସଲିମ ଭୋଟର ଏକ ନିର୍ଣ୍ଣାୟକ ଭୂମିକା ଗ୍ରହଣ କରୁଛନ୍ତି। ସେଥିପାଇଁ ଏହି ସଂପ୍ରଦାୟ ଭୋଟରକୁ ଆକୃଷ୍ଟ କରିବା ପାଇଁ ବିଜେପି ଏହି କାର୍ଡ ଖେଳିଛି।
ତେବେ ଗତ ଅହମ୍ମଦାବାଦ ମହାନଗର ନିର୍ବାଚନରେ ବିଜେପି ରାଜ୍ୟର ପୂର୍ବତନ ପୋଲିସ ମହାନିର୍ଦ୍ଦେଶକ ଏସ୍ ଏସ୍ ଖଣ୍ଡୱାଲାଙ୍କୁ ଜୁହାପୁରାରେ ଟିକେଟ ଦେଇଥିଲା। ସେ ମୁସଲମାନ ହୋଇଥିଲେ ମଧ୍ୟ ବିଜେପି ଟିକେଟରେ ନିର୍ବାଚନରେ ହାରି ଯାଇଥିଲେ। ସେତେବେଳେ ତାଙ୍କୁ ବିଜେପି ଦଳରୁ ଛିଡା ହେବାକୁ ସ୍ଥାନୀୟ ମୁସଲିମ ଭୋଟର ପସନ୍ଦ କରି ନ ଥିଲେ।
ତେବେ ଏଥର ଏତେ ସଂଖ୍ୟକ ମୁସଲିମ ପ୍ରାର୍ଥୀ ନିର୍ବାଚନ ମଇଦାନରେ ଛିଡା କରିବା ଭୋଟରମାନେ କେଉଁ ଦୃଷ୍ଟିରେ ଦେଖିବେ ଜଣାପଡି ନାହିଁ। ତେବେ ବିଜେପିର ଏପରି ନିଷ୍ପତିକୁ ନଜର ରଖି ସାଂସଦ ଅସଦୁଦ୍ଦିନ ଓୱାଇସିଙ୍କ ଦଳ AIMIM ଗୁଜୁରାଟ ପୌର ନିର୍ବାଚନରେ ପ୍ରାର୍ଥୀ ଦେବ ବୋଲି ଚର୍ଚ୍ଚା ଚାଲିଛି। ଅନ୍ୟପଟେ ବିଜେପି ମୁସଲିମ ପ୍ରାର୍ଥୀ ଛିଡା କରିବା ପରେ କଂଗ୍ରେସର ମୁସଲିମ ଭୋଟ୍ ବ୍ୟାଙ୍କ ଭାଙ୍ଗିଯିବା ଭୟରେ ରାଜ୍ୟ କଂଗ୍ରେସ ଚିନ୍ତାରେ ଅଛି।