ଭୁବନେଶ୍ବର, କୋଭିଡ ସଂକ୍ରମଣର ବୃଦ୍ଧି ଯୋଗୁଁ ବିଭିନ୍ନ ରାଜ୍ୟରେ ରୋଗୀ ମାନଙ୍କ ଜୀବନ ବଞ୍ଚାଇବା ପାଇଁ ସଠିକ ଓ କମ ସମୟ ମଧ୍ୟରେ ଅକ୍ସିଜେନ ପରିବହନ କରି ଗନ୍ତବ୍ୟ ସ୍ଥଳରେ ପହଞ୍ଚାଇବାକୁ ଏକ ଆହ୍ୱାନ ଭାବେ ଗ୍ରହଣ କରି ପୂର୍ବ ତଟ ରେଳପଥ ଏହାର ପରିସୀମା ମଧ୍ୟରେ ଥିବା ବିଭିନ୍ନ ଷ୍ଟିଲ୍ ପ୍ଲାଣ୍ଟରୁ ପ୍ରାୟ ୧୧୩୪ ଟନ୍ ରୁ ଉର୍ଦ୍ଧ ତରଳ ମେଡିକାଲ୍ ଅମ୍ଳଜାନ (LMO )କୁ ମହାରାଷ୍ଟ୍ର, ତେଲେଙ୍ଗାନା, ହରିୟାଣା ଏବଂ ଦିଲ୍ଲୀ ପରି ବିଭିନ୍ନ ରାଜ୍ୟକୁ ପରିବହନ କରିଛି ଯାହାଦ୍ୱାରା ରୋଗୀମାନଙ୍କର ଜୀବନ ବଂଚାଇବାରେ ସହାୟକ ହୋଇପାରୁଛି ।
ଅନୁଗୁଳ ଅଞ୍ଚଳରୁ ମୋଟ ୮୯୫.୮୬ ଟନ୍, ଯାଜପୁର କଳିଙ୍ଗ ନଗର ଅଞ୍ଚଳରୁ ୧୩୩.୨ ଟନ୍ ଏବଂ ବିଶାଖାପାଟନମ୍ ଅଞ୍ଚଳରୁ ୧୦୪.୪୩ ଟନ୍ ତରଳ ମେଡିକାଲ୍ ଅମ୍ଳଜାନ ବିଭିନ୍ନ ରାଜ୍ୟକୁ ପରିବହନ ହୋଇସାରିଛି।
ଏହି ଅମ୍ଳଜାନ ପରିବହନ କରିବାପାଇଁ ଅନୁଗୁଳ ସ୍ଥିତ ଟାଟା ଭୂଷଣ ଷ୍ଟିଲ ପ୍ଲାଣ୍ଟ ଲିମିଟେଡ଼ ଓ ଜିନ୍ଦଲ ଷ୍ଟିଲ ପ୍ଲାଣ୍ଟ ଆଣ୍ଡ ପାୱାର ଲିମିଟେଡ଼ ଅଧିକ ଅମ୍ଳଜାନ ପରିବହନ ପାଇଁ ଗୁରୁଦାୟିତ୍ୱ ଗ୍ରହଣ କରିଛନ୍ତି । ଅନୁଗୁଳ ଠାରୁ ୦୩ ଅକ୍ସିଜେନ ଏକ୍ସପ୍ରେସ ଟ୍ରେନ ଦ୍ୱାରା ୧୪ ଟି ଟ୍ୟାଙ୍କରରେ ୧୮୮.୦୭ ଟନ୍ ତରଳ ମେଡିକାଲ୍ ଅମ୍ଳଜାନ ତେଲେଙ୍ଗାନାକୁ, ୦୪ ଅକ୍ସିଜେନ ଏକ୍ସପ୍ରେସ ଟ୍ରେନ ଦ୍ୱାରା ୧୬ ଟି ଟ୍ୟାଙ୍କରରେ ନାଗପୁରକୁ ୨୪୩.୮୮ ଟନ୍ ଏବଂ ୧୦ ଟି ଅକ୍ସିଜେନ ଏକ୍ସପ୍ରେସ ଟ୍ରେନ ଦ୍ୱାରା ୨୮ ଟି ଟ୍ୟାଙ୍କରରେ ୪୬୩.୯୧ ଟନ୍ ତରଳ ମେଡିକାଲ୍ ଅମ୍ଳଜାନ ଦିଲ୍ଲୀ ଓ ହରିୟାଣା ଅଞ୍ଚଳକୁ ଗତ ୧୦ ଦିନ ମଧ୍ୟରେ ପରିବହନ କରାଯାଇଅଛି।
ଏହା ବ୍ୟତୀତ ୧୩୩.୨ ଟନ୍ ତରଳ ମେଡିକାଲ୍ ଅମ୍ଳଜାନ ଟାଟା ଷ୍ଟିଲ ପ୍ଲାଣ୍ଟ କଳିଙ୍ଗ ନଗରରୁ ଦିଲ୍ଲୀ ଅଞ୍ଚଳକୁ ଗୋଟିଏ ଅକ୍ସିଜେନ ଏକ୍ସପ୍ରେସ ଦ୍ୱାରା ୦୭ ଟି କ୍ରୟୋଜନିକ ଟ୍ୟାଙ୍କରରେ ପରିବହନ କରାଯାଇଅଛି। ସେହିଭଳି, ଗତ ଏପ୍ରିଲ୍ ୨୦୨୧ ଶେଷ ସପ୍ତାହରେ ବିଶାଖାପାଟନମ୍ ସ୍ଥିତ ରାଷ୍ଟ୍ରୀୟ ଇସ୍ପାତ ନିଗମ ଲିମିଟେଡ଼ରୁ ନାଗପୁର ଏବଂ ନାସିକ୍ ରୋଡ୍ଆକୁ ଗୋଟିଏ ଅକ୍ସିଜେନ ଏକ୍ସପ୍ରେସ ଦ୍ୱାରା ୦୭ ଟି ଟ୍ୟାଙ୍କରରେ ୧୦୪.୪୩ ଟନ୍ ତରଳ ମେଡିକାଲ୍ ଅମ୍ଳଜାନ ପରିବହନ କରାଯାଇଅଛି।
ପ୍ରଥମ ପର୍ୟ୍ୟାୟରେ ଦିଲ୍ଲୀ ଅଞ୍ଚଳରେ ଅମ୍ଳଜାନ ସଙ୍କଟ ଦୂର କରିବା ପାଇଁ ଏବଂ ଅନୁଗୁଳରେ ଅମ୍ଳଜାନ ବୋଝେଇ ପାଇଁ ନୂଆଦିଲ୍ଲୀରୁ ଭୁବନେଶ୍ୱରକୁ ବିମାନ ଯୋଗେ ଖାଲିଥିବା ବହୁ କ୍ରୟୋଜନିକ ଟ୍ୟାଙ୍କର ଆସିଥିଲା ଯାହାକୁ ପୂର୍ବତଟ ରେଳପଥ ପକ୍ଷରୁ ତ୍ୱରିତ ପଦକ୍ଷେପ ନିଆଯାଇ ଅମ୍ଳଜାନ ବୋଝେଇ ପରେ କମ ସମୟ ମଧ୍ୟରେ ଦିଲ୍ଲୀରେ ପହଞ୍ଚା ଯାଇଥିଲା । ତରଳ ଅମ୍ଳଜାନ ଏକ କ୍ରାୟୋଜେନିକ୍ କାର୍ଗୋ ଭାବରେ ସର୍ବାଧିକ ଯତ୍ନ ନିଆଯାଇଛି ଯେଉଁଥିରେ ସର୍ବାଧିକ ବେଗକୁ ତ୍ୱରାନ୍ୱିତ ଏବଂ ହ୍ରାସ କରାଯାଇପାରିବ ।
ବିଭିନ୍ନ ରାଜ୍ୟରୁ ଖାଲି ଲିକ୍ୱିଡ୍ ମେଡିକାଲ୍ ଅମ୍ଳଜାନ ଟ୍ୟାଙ୍କର୍ ପୂର୍ବତଟ ରେଳପଥ ପରିସୀମା ମଧ୍ୟରୁ ବିଭିନ୍ନ ଷ୍ଟିଲ ପ୍ଲାଣ୍ଟ ଗୁଡ଼ିକରୁ LMO ପରିବହନ କରିବାପାଇଁ ଆସୁଛି । ପୂର୍ବତଟ ରେଳପଥ ପରିସୀମା ମଧ୍ୟରୁ ଅକ୍ସିଜେନ ଏକ୍ସପ୍ରେସ ସ୍ପେଶାଲ ଟ୍ରେନର ସୁରକ୍ଷିତ ଚଳାଚଳ ଏବଂ ଏହି ଟ୍ରେନଗୁଡ଼ିକୁ ଶୀଘ୍ର ଗନ୍ତବ୍ୟ ସ୍ଥାନ ଗୁଡିକରେ ପହଞ୍ଚାଇବା ପାଇଁ ସମସ୍ତ ସତର୍କତା ଅବଲମ୍ବନ କରାଯିବ ସହିତ ଏହି ଅଞ୍ଚଳକୁ ଗ୍ରୀନ କରିଡର ଘୋଷଣା କରାଯାଇଅଛି ।
ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟା ଭୂଷଣ ରୋଗୀଙ୍କ ଜୀବନ ରକ୍ଷା ପାଇଁ ସଙ୍କଟ ସମୟରେ ଅମ୍ଳଜାନ ଯୋଗାଣକୁ ଏକ ଆହ୍ୱାନ ଭାବରେ ଗ୍ରହଣ କରି ତ୍ୱରିତ ସେବା ପ୍ରଦାନ ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଟ୍ରେନ ରେକ ଉପରେ ଖାଲି ଟ୍ୟାଙ୍କର ଗୁଡିକୁ ଓହ୍ଲାଇବା ଏବଂ ଅମ୍ଳଜାନ ଭରା ଟ୍ୟାଙ୍କର ଗୁଡିକୁ ଟ୍ରେନ ରେକ ଉପରେ ସଠିକ ଭାବେ ରଖିବା ପ୍ରତି ସେ ଗୁରୁତ୍ୱାରୋପ କରିଛନ୍ତି । ଆବଶ୍ୟକ କରୁଥିବା ସମସ୍ତ ରାଜ୍ୟକୁ ଅମ୍ଳଜାନ ପରିବହନ ସେବା ଯୋଗାଇବା ପାଇଁ ପୂର୍ବତଟ ରେଳପଥ ସମ୍ପୂର୍ଣ୍ଣ ପ୍ରସ୍ତୁତିରେ ଅଛି ।
