ଭୁବନେଶ୍ୱର, ଅତି ପ୍ରବଳ ବାତ୍ୟା ‘ୟସ୍’ ଯୋଗୁ ରାଜ୍ୟରେ ହୋଇଥିବା କ୍ଷୟକ୍ଷତିର କ୍ଷେତ୍ର ସ୍ତରୀୟ ଅନୁଧ୍ୟାନ ନିମନ୍ତେ ଆସିଥିବା ଆନ୍ତଃ-ମନ୍ତ୍ରଣାଳୟ କେନ୍ଦ୍ରୀୟ ଟିମ୍ ଆଜି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ସମେତ ରାଜ୍ୟର ବରିଷ୍ଠ ପ୍ରଶାସନିକ ଅଧିକାରୀମାନଙ୍କ ସହ ଆଲୋଚନା କରିଛନ୍ତି ।
ଏହି ୭ ଜଣିଆ କେନ୍ଦ୍ରୀୟ ଟିମ୍ର ନେତୃତ୍ୱ ନେଉଥିବା ଗୃହ ବିଭାଗ ଯୁଗ୍ମ ଶାସନ ସଚିବ ସୁନିଲ୍ କୁମାର ବର୍ନଓ୍ୱାଲ୍ କହିଥିଲେ ଯେ ରାଜ୍ୟରେ ବାତ୍ୟା ପରିଚାଳନା ବାସ୍ତବିକ ପ୍ରସଂଶନୀୟ। ରାଜ୍ୟରୁ ପଂଚାୟତ ଏବଂ ଗ୍ରାମ ସ୍ତର ପର୍ୟ୍ୟନ୍ତ ସମସ୍ତେ ଏକ ଟିମ୍ ଭାବେ କାମ କରିଛନ୍ତି । ସେ ନିଜେ ଜିଲ୍ଲାପାଳ, ସରପଂଚ, ଓ୍ୱାର୍ଡମେମ୍ବର ଏବଂ ବାତ୍ୟା ଆଶ୍ରୟସ୍ଥଳ ପରିଚାଳନା କମିଟି ସଦସ୍ୟମାନଙ୍କ ସହ ଆଲୋଚନା କରିଛନ୍ତି । ସେମାନେ ସମସ୍ତେ ବାତ୍ୟା ବିଷୟରେ ଆଗୁଆ ସୂଚନା ପାଇଥିଲେ ଏବଂ ନିର୍ଦ୍ଧାରିତ କାର୍ୟ୍ୟପନ୍ଥା ଅନୁସାରେ ସମସ୍ତ ପ୍ରାକ୍ ପ୍ରସ୍ତୁତି କରିଥିଲେ। ବାତ୍ୟା ପରିଚାଳନା, ଲୋକଙ୍କ ସୁରକ୍ଷା, ଉଦ୍ଧାର ଏବଂ ରିଲିଫ୍ କାର୍ୟ୍ୟକୁ ନିଜର କାମ ଭାବେ ବିଚାରକରି ସମସ୍ତେ କାମ କରିଥିଲେ ।
ବରନ୍ଓ୍ୱାଲ୍ ଆହୁରି ମଧ୍ୟ କହିଥିଲେ ଯେ ଓଡ଼ିଶାର ଉପକୂଳବର୍ତ୍ତୀ ଜିଲ୍ଲାମାନଙ୍କରେ ବିପର୍ୟ୍ୟୟ ସହନଶୀଳ ରାସ୍ତା,ବିଦ୍ୟୁତ ବ୍ୟବସ୍ଥା ଆଦିର ଜରୁରୀ ଆବଶ୍ୟକତା ରହିଛି । ରାଜ୍ୟର ଉପଯୁକ୍ତ ବିପର୍ୟ୍ୟୟ ପରିଚାଳନା ବ୍ୟବସ୍ଥା ହେତୁ ବ୍ୟକ୍ତିଗତ ଧନଜୀବନ କ୍ଷୟ ଏବଂ ଲୋକମାନଙ୍କ ଦୁର୍ଦ୍ଦଶା ସର୍ବନିମ୍ନ ହୋଇପାରିଛି । ହେଲେ ଏବେବି ସର୍ବସାଧାରଣ ସଂପତ୍ତି ପ୍ରଭୁତଭାବେ କ୍ଷତିଗ୍ରସ୍ତ ହେଉଛି। ବାତ୍ୟା ସହନଶୀଳ ଭିତ୍ତିଭୂମି ସ୍ୱାରା ସର୍ବସାଧାରଣ ସଂପତ୍ତି କ୍ଷୟକୁ କମ୍ କରାଯାଇପାରିବ।
କେନ୍ଦ୍ର ସରକାରଙ୍କ ଗୃହ, କୃଷି, ଅର୍ଥ, ସଡ଼କ ଓ ପରିବହନ, ଗ୍ରାମ ଉନ୍ନୟନ, ଶକ୍ତି, ମତ୍ସ୍ୟ ସଂପଦ ଆଦି ମନ୍ତ୍ରଣାଳୟର ୭ ଜଣ ବରିଷ୍ଠ ଅଧିକାରୀ ଏହି ଟିମ୍ର ସଦସ୍ୟଭାବେ ଓଡ଼ିଶା ଆସିଥିଲେ। ଏମାନେ ଦୁଇଭାଗରେ ବିଭକ୍ତ ହୋଇ ବାତ୍ୟା କ୍ଷତିଗ୍ରସ୍ତ ଭଦ୍ରକ, ବାଲେଶ୍ୱର, ମୟୁରଭଞ୍ଜ, କେନ୍ଦ୍ରାପଡା, ଜଗତସିଂହପୁର ଆଦି ଜିଲ୍ଲା ବୁଲି କ୍ଷୟକ୍ଷତିର ଆକଳନ କରିଥିଲେ।
ଅର୍ଥ ବିଭାଗ ପ୍ରମୁଖ ଶାସନ ସଚିବ ଅଶୋକ କୁମାର ମୀନା, ଶକ୍ତି ବିଭାଗ ପ୍ରମୁଖ ଶାସନ ସଚିବ ନିକୁଞ୍ଜବିହାରୀ ଧଳ, ଜଳ ସଂପଦ ବିଭାଗ ପ୍ରମୁଖ ଶାସନ ସଚିବ ଅନୁ ଗର୍ଗ, ପଂଚୟତି ରାଜ ଓ ପାନୀୟ ଜଳ ଯୋଗାଣ ପ୍ରମୁଖ ଶାସନ ସଚିବ ଦେଓରଂଜନ କୁମାର ସିଂ, ଗୃହ ଓ ନଗର ଉନ୍ନୟନ ପ୍ରମୁଖ ଶାସନ ସଚିବ ଜି.ମାଥିଭାଥାନନ୍ ଙ୍କ ସମେତ ସଂପୃକ୍ତ ବିଭାଗର ଶାସନ ସଚିବ ଓ ପ୍ରମୁଖ ଶାସନ ସଚିବମାନେ ବୈଠକର ଆଲୋଚନାରେ ଅଂଶଗ୍ରହଣ କରିଥିଲେ।