ସମୀକ୍ଷା ବ୍ୟୁରୋ-
ବିଜେପିକୁ ଯେତେବେଳେ ମୁଖ୍ୟତଃ ଉତ୍ତର ଭାରତର ଏକ ଦଳ ବୋଲି କୁହାଯାଉଥିଲା ଓ ଦଳର ସଂଗଠନ ବିଶେଷକରି ହିନ୍ଦୀ ଭାଷାଭାଷୀ ଅଞ୍ଚଳରେ ସୀମିତ ରହିଥିଲା, ସେହି ସମୟରେ କର୍ଣ୍ଣାଟକ ବିଜେପି ପାଇଁ ଦକ୍ଷିଣ ଭାରତରେ ପ୍ରବେଶ ପଥ ଉନ୍ମୋଚନ କରିବାର ସୁଯୋଗ ସୃଷ୍ଟି କରିଥିଲା।୧୯୯୬ ମସିହାରେ ଅନୁଷ୍ଠିତ ଏକାଦଶ ଲୋକସଭା ନିର୍ବାଚନରେ ଅକସ୍ମାତ ବିଜେପି କର୍ଣ୍ଣାଟକରେ ୭ ଟି ଓ ୧୯୯୮ ନିର୍ବାଚନରେ ୧୩ଟି ଆସନ ଲାଭ କରିଥିଲା। ବିଜେପିର ଏହି ଅଭୁତପୂର୍ବ ସଫଳତା ପଛରେ ଯେଉଁ ତରୁଣ ନେତାଙ୍କର ବଡ଼ ହାତ ଥିଲା, ସେ ଥିଲେ ଅନନ୍ତ କୁମାର। ଆଜି ସକାଳେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ତଥା ବିଜେପିର ଏହି ଟାଣୁଆ ନେତା ଅନନ୍ତ କୁମାର (୨୨ ଜୁଲାଇ ୧୯୫୯- ୧୨ ନଭେମ୍ବର ୨୦୧୮) ମୃତ୍ୟୁ ବରଣ କରିଛନ୍ତି। ୧୯୯୬ ରୁ ନିରବଚ୍ଛିନ୍ନ ଭାବରେ ଲୋକସଭାକୁ ନିର୍ବାଚିତ ହୋଇ ଆସୁଥିବା ଅନନ୍ତ କୁମାର ଉଭୟ ବାଜପାୟୀ ଓ ମୋଦୀ ସରକାରରେ ମନ୍ତ୍ରୀ ରହିଥିଲେ। ୧୯୯୮ ରେ ସେ ବାଜପାୟୀ ସରକାରରେ ସର୍ବ କନିଷ୍ଠ ମନ୍ତ୍ରୀ ଭାବରେ ବେସାମରିକ ବିମାନ ଚଳାଚଳ ଓ ସଂସ୍କୃତି ବିଭାଗର ମନ୍ତ୍ରୀ ଦାୟିତ୍ଵ ତୁଲାଇଥିଲେ।
ବିଜେପିର ଆଭ୍ୟନ୍ତରୀଣ ସଂଗଠନ ସୁଧାରିବାରେ ଅନନ୍ତ କୁମାରଙ୍କର ପ୍ରମୁଖ ଭୂମିକା ରହିଥିଲା। ରାମକୃଷ୍ଣ ହେଗଡ଼େ, ଏସ.ଆର.ବୋମ୍ମାଇ, ଏଚ.ଡି.ଦେବେଗୌଡ଼ାଙ୍କ ପ୍ରଭାବ ଥିବା କର୍ଣ୍ଣାଟକରେ ୨୦୦୪ ବିଧାନସଭା ନିର୍ବାଚନରେ ରେ ଅନନ୍ତ କୁମାରଙ୍କ ନେତୃତ୍ବରେ ବିଜେପି ଏକକ ସଂଖ୍ୟା ଗରିଷ୍ଠତା ହାସଲ କରିଥିଲା। ଯଦିଓ ସେବର୍ଷ ବିଜେପି ସରକାର ଗଢିବାରେ ଅସମର୍ଥ ହୋଇଥିଲା, ତାର ତିନି ବର୍ଷ ପରେ କର୍ଣ୍ଣାଟକରେ ପ୍ରଥମ ବିଜେପି ସରକାର ଗଠିତ ହୋଇଥିଲା। ବିଜେପି ପାଇଁ ଦକ୍ଷିଣ ଭାରତର ଦୁଆର ଖୋଲା କରିବାରେ ଅନନ୍ତ କୁମାରଙ୍କ ଭୂମିକା ସ୍ମରଣୀୟ ହୋଇ ରହିବ।
ସେ ଏକାଦିକ୍ରମେ ୬ ଥର ଲୋକସଭାକୁ ନିର୍ବାଚିତ ହୋଇଥିଲେ। ବର୍ତ୍ତମାନ ସମୟରେ ମୋଦୀ ସରକାରରେ ଅଭିଜ୍ଞ ପ୍ରତିଭାଙ୍କର ଅଭାବ ଅନୁଭୂତ ହେଉଥିବା ବେଳେ ମାତ୍ର ୫୯ ବର୍ଷ ବୟସରେ ଅନନ୍ତ କୁମାରଙ୍କ ପରଲୋକ ବିଜେପି ପାଇଁ ଯଥେଷ୍ଟ ଶୂନ୍ୟସ୍ଥାନ ସୃଷ୍ଟି କରିଛି। ସଂସଦୀୟ ବ୍ୟାପାର ଭଳି ଅତ୍ୟନ୍ତ ସମ୍ବେଦନଶୀଳ ବିଭାଗ ସମ୍ଭାଳିବା ଭଳି ଅନନ୍ତ କୁମାରଙ୍କ ବିକଳ୍ପ ଖୋଜି ପାଇବା ଏତେ ସହଜ ହେବନାହିଁ।