ଭୁବନେଶ୍ୱର, ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ସାମୁଦ୍ରିକ ବାଣିଜ୍ୟ ଅଭିବୃଦ୍ଧି ନିମନ୍ତେ ଜଳପଥ ପରିବହନକୁ ସଂପ୍ରସାରିତ କରିବା ଉପରେ ଗୁରୁତ୍ୱାରୋପ କରିଛନ୍ତି । କେନ୍ଦ୍ର ସରକାର ୫ ନଂ ଜାତୀୟ ଜଳପଥ ନେଇ କାର୍ଯ୍ୟ କଲେ ଓଡ଼ିଶାରେ ପରିବହନ ଓ ବନ୍ଦର ବିକାଶ କ୍ଷେତ୍ରରେ ଅଧିକ ଉନ୍ନତି ପରିଲକ୍ଷିତ ହେବା ସହ ତତ୍ଜନିତ ଆର୍ଥିକ ବୋଝ ହ୍ରାସ ପାଇବ ବୋଲି ମନ୍ତ୍ରୀ ବେହେରା ଉଲ୍ଲେଖ କରିଛନ୍ତି । ପ୍ରତିଦ୍ୱନ୍ଦିତାମୂଳକ ବଜାରରେ ଜଳମାର୍ଗ ପରିବହନ ଶିଳ୍ପ ଅଭିବୃଦ୍ଧି ତଥା ବାଣିଜ୍ୟରେ ଅଧିକ ସହାୟକ ହେବ ବୋଲି ସେ କହିଛନ୍ତି ।
କେନ୍ଦ୍ର ଜାହାଜ ଚଳାଚଳ ରାଷ୍ଟ୍ରମନ୍ତ୍ରୀ ମନ୍ସୁଖ ମାଣ୍ଡବ୍ୟଙ୍କ ଅଧ୍ୟକ୍ଷତାରେ ଜାହାଜ ପରିବହନ ଓ ଜଳମାର୍ଗ ମନ୍ତ୍ରାଳୟ ଅଧୀନସ୍ଥ ଉପକୂଳବର୍ତ୍ତୀ ରାଜ୍ୟ ଉନ୍ନୟନ ପରିଷଦର ଅଷ୍ଟାଦଶ ବୈଠକରେ ଅଂଶଗ୍ରହଣ କରି ମନ୍ତ୍ରୀ ବେହେରା ଓଡ଼ିଶାରେ ବନ୍ଦର ସଂଯୋଗୀକରଣ ନେଇ ହୋଇଥିବା କାର୍ଯ୍ୟକ୍ରମଗୁଡ଼ିକ ଉପରେ ସୂଚନା ଦେଇଥିଲେ । ଭାରତୀୟ ବନ୍ଦର ବିଲ୍ ୨୦୨୧ ସଂପର୍କରେ ରାଜ୍ୟସ୍ତରରେ ବ୍ୟାପକ ଆଲୋଚନା ଓ ବିଚାରବିମର୍ଶ ହେବା ପରେ ଯାଇ ଓଡ଼ିଶା ତା’ର ମତାମତ ଜଣାଇବ ବୋଲି ମନ୍ତ୍ରୀ କହିଛନ୍ତି ।
ଇତି ମଧ୍ୟରେ ଗତ ଫେବୃଆରୀ ମାସରେ ବିଧାନସଭାରେ ପାରିତ ହୋଇଥିବା ରାଜ୍ୟ ସାମୁଦି୍ରକ ବିଲ୍ରେ ଥିବା ପ୍ରାବଧାନଗୁଡ଼ିକୁ ମଧ୍ୟ ଭାରତୀୟ ବନ୍ଦର ବିଲ୍ରେ ଅନ୍ତର୍ଭୁକ୍ତ କରିବା ନିମନ୍ତେ ମନ୍ତ୍ରୀ କେନ୍ଦ୍ରୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି ।
ଓଡ଼ିଶାର ବନ୍ଦରଗୁଡ଼ିକ ପାଇଁ ରେଳପଥ ଓ ସଡ଼କ ସଂଯୋଗୀକରଣ ଉପରେ ମନ୍ତ୍ରୀ ଶ୍ରୀ ବେହେରା ବିସ୍ତୃତ ବିବରଣୀ ପ୍ରଦାନ କରିଥିଲେ । ପାରାଦୀପ ବନ୍ଦରକୁ ହରିଦାସପୁର ରେଳ ଷ୍ଟେସନ୍ରୁ ଏକ ନୂଆ ରେଳପଥ ସଂଯୁକ୍ତ ହେବା ଫଳରେ ବନ୍ଦରର ପଣ୍ୟ ପରିବହନ କ୍ଷମତା ବାର୍ଷିକ ପ୍ରାୟ ୨୦ ନିୟୁତ ଟନ୍ ବୃଦ୍ଧି ପାଇଛି । ଇତି ମଧ୍ୟରେ ଓଡ଼ିଶା ସରକାର ୨୦୦୪ ରାଜ୍ୟ ବନ୍ଦର ନୀତି ଅନୁସାରେ ଘରୋଇ ସହଭାଗିତା କ୍ରମେ ଧାମରା ଓ ଗୋପାଳପୁର ବନ୍ଦର କାର୍ଯ୍ୟାରମ୍ଭ କରିଛନ୍ତି । ଏହା ବ୍ୟତୀତ ସୁବର୍ଣ୍ଣରେଖା, ଅସ୍ତରଙ୍ଗ ଓ ମହାନଦୀ ରିଭରାଇନ୍ ପରି ତିନୋଟି କ୍ଷୁଦ୍ର ବନ୍ଦରର ବିକାଶ କାର୍ଯ୍ୟ ଚାଲିଛି ।
୨୦୨୦-୨୧ ଆର୍ଥିକ ବର୍ଷରେ ୫୦ ନିୟୁତ ମେଟି୍ରକ୍ ଟନ୍ ପଣ୍ୟ ପରିବହନ କ୍ଷମତାବିଶିଷ୍ଟ ଧାମରା ବନ୍ଦର ଓ ୨୦ ନିୟୁତ ମେଟି୍ରକ୍ ଟନ୍ କ୍ଷମତା ବିଶିଷ୍ଟ ଗୋପାଳପୁର ବନ୍ଦର ଯଥାକ୍ରମେ ୩୨.୩୮ ନିୟୁତ ଟନ ଏବଂ ୧୦.୬୫ ନିୟୁତ ମେଟି୍ରକ୍ ଟନ୍ ପଣ୍ୟ ପରିବହନ କରିଛନ୍ତି । ଉଭୟ ବନ୍ଦରର ସଂପ୍ରସାରଣ କାର୍ଯ୍ୟ ଚାଲିଛି ଓ ଏହି ଦୁଇଟି ବନ୍ଦର ସଂପୂର୍ଣ୍ଣ କ୍ଷମତାପନ୍ନ ହେବା ପାଇଁ ସଡ଼କ ଓ ରେଳ ସଂଯୋଗୀକରଣ ଅପରିହାର୍ଯ୍ୟ ।
ଧାମରା ବନ୍ଦର ପାଇଁ ଥିବା ରାସ୍ତାକୁ ରାଜ୍ୟ ସରକାର ଦୁଇ ଥାକିଆ କରିଛନ୍ତି । କିନ୍ତୁ ଭଦ୍ରକଠାରୁ ଏଠାକୁ ଚାରିଥାକିଆ ସଂଯୋଗୀକରଣର ସମ୍ଭାବନା ରହିଥିବାବେଳେ ଏହାର ପରିଚାଳନା ଦାୟିତ୍ୱରେ ଥିବା ଆଦାନୀ ଗ୍ରୁପ୍ ଓ ଜାତୀୟ ରାଜପଥ କର୍ତ୍ତୃପକ୍ଷ ଏହା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଆବଶ୍ୟକତା ରହିଛି ବୋଲି ମନ୍ତ୍ରୀ ବେହେରା କହିଛନ୍ତି।
ସେହିପରି ୧୬ ନଂ ଜାତୀୟ ରାଜପଥରୁ ଗୋପାଳପୁର ବନ୍ଦରକୁ ୪.୫ କିମି ଦୈର୍ଘ୍ୟବିଶିଷ୍ଟ ରାସ୍ତା କାମ ତୁରନ୍ତ ସଂପୂର୍ଣ୍ଣ କରିବା ପାଇଁ ଜାତୀୟ ରାଜପଥ କର୍ତ୍ତୃପକ୍ଷଙ୍କୁ ରାଜ୍ୟ ସରକାର ସମ୍ମତି ଜଣାଇ ସାରିଛନ୍ତି । ବନ୍ଦରକୁ ଯାଇଥିବା ରାସ୍ତାଟି ଅତ୍ୟନ୍ତ ସଂକୀର୍ଣ୍ଣ ହୋଇଥିବା ଓ ଜନବସତି କାରଣରୁ ବନ୍ଦରକୁ ପରିବହନ ପାଇଁ ଯାନ ଚଳାଚଳରେ ସମସ୍ୟା ଉପୁଜୁଥିବାରୁ ରାଜପଥ କର୍ତ୍ତୃପକ୍ଷ ବର୍ଷକ ମଧ୍ୟରେ ସେ କାର୍ଯ୍ୟ ସାରିବା ପାଇଁ ମନ୍ତ୍ରୀ ଅନୁରୋଧ ଜଣାଇଛନ୍ତି।
ଓଡ଼ିଶା ଏବଂ ଛତିଶଗଡ଼ର ଆଭ୍ୟନ୍ତରଣ ଅଞ୍ଚଳରୁ ଗୋପାଳପୁରକୁ ସଂଯୋଗ କରିବା ପାଇଁ ରହିଥିବା ଗୁଣୁପୁର-ଥେରୁବାଲି ରେଳପଥକୁ ବ୍ରଡଗଜ କରିବା ନିମନ୍ତେ ରେଳବାଇ ବୋର୍ଡ ନିକଟରେ ସବୁଜ ସଂକେତ ଦେଇଛନ୍ତି । ବୋର୍ଡ ଓ ଓଡ଼ିଶା ସରକାର ମିଳିତ ଭାବେ ଏହି ପ୍ରକଳ୍ପର ଯୋଜନା କରୁଛନ୍ତି ।
ଏହି ୱେବିନାର୍କୁ କେନ୍ଦ୍ର ରାଷ୍ଟ ମନ୍ତ୍ରୀ ମାଣ୍ଡବ୍ୟ ଉଦ୍ଘାଟନ କରିଥିବାବେଳେ ମନ୍ତ୍ରାଳୟର ସଚିବ, ଅତିରିକ୍ତ ସଚିବ, ବିଭିନ୍ନ ସମୁଦ୍ରକୂଳ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ସଂପୃକ୍ତ ମନ୍ତ୍ରୀ ଓ ଅନ୍ୟାନ୍ୟ ମନ୍ତ୍ରାଳୟର ପଦାଧିକାରୀମାନେ ଉପସ୍ଥିତ ଥିଲେ ।