ଭୁବନେଶ୍ବର, ଅଗଷ୍ଟ 31 ତାରିଖରେ ଶେଷ ହେଉଛି ରାଜ୍ୟ ସରକାର ଜାରୀ କରିଥିବା କରୋନା ଗାଇଡ ଲାଇନ। ଏହାପରେ ସେପ୍ଟେମ୍ବର ମାସର ନୂଆ ଗାଇଡ ଲାଇନ ଆସିବ। ଏହି ଗାଇଡ ଲାଇନରେ କଣ ରହିବ, କଣ ନାହିଁ, ସେ ନେଇ ବିଭିନ୍ନ ମହଲରେ ଆଶଙ୍କା ସୃଷ୍ଟି ହୋଇଛି। କାରଣ ହେଲା ସେପ୍ଟେମ୍ବର ମାସରୁ ଆରମ୍ଭ ହେଉଛି ପାର୍ବଣ ଋତୁ। ଗଣେଷ ପୂଜା, ବିଶ୍ବକର୍ମା ପୂଜା ସହିତ ନୂଆଖାଇ ପର୍ବ ରହିଛି। ସେଥିପାଇଁ ଏହି କଟକଣା କଣ ହେବ କିପରି ପରିଚାଳନା କରାଯିବ ସେ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ।
ଚଳିତ ଅଗଷ୍ଟ କଟକଣାରେ ରାଜ୍ୟ ସରକାର ଅନେକ କିଛି ଛାଡ କରିଛନ୍ତି। ରାତ୍ରୀ ଆଠଟା ପର୍ଯ୍ୟନ୍ତ ଦୋକାନ ବଜାର ଖୋଲିବାକୁ ଅନୁମତି ଦିଆଯାଇଛି। ହେଲେ କଟକ, ଭୁବନେଶ୍ବର, ପୁରୀରେ ବର୍ତ୍ତମାନ ସୁଦ୍ଧା ସପ୍ତାହନ୍ତ କର୍ଫୁ ଜାରୀ ରହିଛି। ଫଳରେ ସପ୍ତାହର ଶେଷ ଦିନରେ ଅଧିକା କିଛି ରୋଜଗାର କରିବାକୁ ଆଶା ରଖିଥିବା ବ୍ୟବସାୟୀମାନେ ହତାଶ ହୋଇଛନ୍ତି। ସେହିପରି ସାଂସ୍କୃତିକ କାର୍ଯ୍ୟକ୍ରମକୁ କଟକଣା କରାଯାଇଥିବାରୁ ଘରୋଇ ସଂସ୍ଥାଗୁଡିକ କୌଣସି କାର୍ଯ୍ୟକ୍ରମ କରୁ ନାହାଁନ୍ତି। ଏହାଦ୍ବାରା କଳାକାରମାନେ ମଧ୍ୟ ହତାଶ ହୋଇ ଘରେ ବସି ରହିଛନ୍ତି।
ତେବେ ରାଜ୍ୟ ସରକାରଙ୍କୁ ଯେଉଁ ଚିନ୍ତା ବଢାଇଛି ତାହା ହେଲା ରାଜନୈତିକ ସଭା ଓ ଶୋଭାଯାତ୍ରା। ଗୋଟିଏ ପଟେ ସରକାର ବାହାଘର ପ୍ରଭୃତି ଘରୋଇ ଉତ୍ସବ ଏବଂ ଭୋଜିଭାତକୁ କଟକଣା କରିଥିବା ବେଳେ ରାଜନୈତିକ ରାଲିକୁ ନିୟନ୍ତ୍ରଣ କରିପାରୁ ନାହାଁନ୍ତି। ନିକଟରେ ସବୁ ଦଳର ନେତାମାନେ ଯେପରି ଶୋଭାଯାତ୍ରା ତଥା ସଭା କରି ଲୋକଙ୍କୁ ଏକାଠି କରୁଛନ୍ତି ତାହା ମୁଣ୍ଡବଥାର କାରଣ ପାଲଟିଛି। ଯଦି ସରକାର ତାହାକୁ ନିୟନ୍ତ୍ରଣ ନ କରିପାରୁଛନ୍ତି ତେବେ ବିବାହ ଏବଂ ଜନ୍ମ ଉତ୍ସବ ପରି ଘରୋଇ କାର୍ଯ୍ୟକ୍ରମକୁ ମଧ୍ୟ ଅନୁମତି ପ୍ରଦାନ କରାଯାଉ ବୋଲି ଦାବୀ ହେଉଛି।
ବର୍ତ୍ତମାନ କରୋନା ସ୍ଥିତି ଅନୁଧ୍ୟାନ କଲେ ଜଣାପଡୁଛି ଯେ, ଆକ୍ରାନ୍ତଙ୍କ ସଂଖ୍ୟା ଯଥେଷ୍ଠ ହ୍ରାସ ପାଇଥିଲେ ମଧ୍ୟ ସ୍ଥିତି ନିୟନ୍ତ୍ରଣରେ ନାହିଁ। ଯଦି ସରକାର ସବୁ କିଛି ଖୋଲମଖୁଲା କରିଦେବେ ତେବେ ଏହା ପୁଣି ବିଗାଡି ଦେବାର ସମ୍ଭାବନା ରହିଛି। କେରଳରେ ଯେପରି ଓନାମ ପର୍ବ ପାଇଁ ସେଠାରେ ସ୍ଥିତି ବିଗିଡି ଗଲା, ଓଡିଶାରେ ମଧ୍ୟ ସେପରି ସ୍ଥିତି ନ ହେବ ତାହା କହି ହେବ ନାହିଁ। ସେପ୍ଟେମ୍ବରରେ ପଡୁଥିବା ଗଣେଷ ପୂଜା, ନୂଆଖାଇ ଏବଂ ବିଶ୍ବକର୍ମା ପୂଜା ରାଜ୍ୟରେ ବେଶ୍ ଧୂମାଧାମରେ ପାଳନ ହୁଏ। ତେଣୁ ଏପରି ପରିସ୍ଥିତିରେ ଖୋଲା ଛାଡି ଦିଆଯିବ ନା କଟକଣାକୁ ଆଉ ମାସେ ବୃଦ୍ଧି କରାଯିବ ସେ ନେଇ ଚାଲିଛି ଆଲୋଚନା।
ଅନ୍ୟପଟେ କେନ୍ଦ୍ର ସରକାର ଜାରୀ କରିଥିବା କଟକଣାକୁ ପୁଣି ଥରେ ସେପ୍ଟେମ୍ବର 30 ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି। ହେଲେ ରାଜ୍ୟ ସରକାର ସେମାନଙ୍କ ସୁବିଧା ଅନୁସାରେ କଟକଣା ଜାରୀ କରିବେ ବୋଲି ପୂର୍ବପରି କେନ୍ଦ୍ର ତରଫରୁ କୁହାଯାଇଛି। ସେହି ଅନୁସାରେ ରାଜ୍ୟ ସରକାର ପୁଣି ଥରେ ଏହି କଟକଣାକୁ ମାସେ ବୃଦ୍ଧି କରିବେ ବୋଲି ଜଣାପଡିଛି।