କଲିକତା: ମାର୍ଚ୍ଚ ୨୧ ତାରିଖରେ କିଛି ଅଜ୍ଞାତ ବ୍ୟକ୍ତି ଦଶଟି ଘରେ ନିଆଁ ଲଗାଇ ଆଠ ଜଣଙ୍କୁ ହତ୍ୟା କରିଥିଲେ। ଏହି ଘଟଣାର ସଜ୍ଞାନକୁ ନେଇ କଲିକତା ହାଇକୋର୍ଟ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିଲେ। ବର୍ତ୍ତମାନ ଏହି ମାମଲାର ତଦନ୍ତରେ ନିୟୋଜିତ ସିବିଆଇ ୨୧ ଜଣଙ୍କୁ ଅଭିଯୁକ୍ତ କରିଛି।
ଉଲ୍ଲେଖନୀୟ କଥା ହେଉଛି, ୩୦ ଜଣିଆ ସିବିଆଇ ଟିମ୍ ପଶ୍ଚିମବଙ୍ଗର ବୀରଭୂମ ଜିଲ୍ଲାର ରାମପୁରହାଟରେ ପହଞ୍ଚି ସେଠାରେ ହିଂସା ଘଟଣାର ତଦନ୍ତ ଆରମ୍ଭ କରିଥିଲା। ଗତ ସପ୍ତାହରେ ଘଟିଥିବା ହିଂସାରେ ଦଶଟି ଘରେ ନିଆଁ ଲାଗିଯାଇଥିଲା। ଯେଉଁଥିରେ ମହିଳା ଏବଂ ଶିଶୁଙ୍କ ସମେତ ମୋଟ ୮ ଜଣଙ୍କର ମୃତ୍ୟୁ ଘଟିଥିଲା।
ଅଧିକାରୀଙ୍କ ଅନୁଯାୟୀ, ଡିଜି ଅଖିଲେଶ ସିଂଙ୍କ ନେତୃତ୍ୱରେ ଏକ ସିବିଆଇ ଟିମ୍ ପୁରବପାଡା ଅଞ୍ଚଳ ପରିଦର୍ଶନ କରିଥିଲେ, ଯେଉଁଠାରେ ସ୍ଥାନୀୟ ଟିଏମସି ନେତା ଭଦୁ ଶେଖଙ୍କ ହତ୍ୟା ପରେ ଏହି ଭୟଙ୍କର ହତ୍ୟାକାଣ୍ଡ ଘଟିଥିଲା।
ସୂଚନାନୁସାରେ, ସିବିଆଇ ଟିମ୍ ଶନିବାର ଦିନ ବୋଗତୁଇରେ ପାଞ୍ଚ ଘଣ୍ଟା ରହିଥିଲା। ସେଠାରେ ପ୍ରଥମେ ସୋନୁ ଶେଖଙ୍କ ଘରକୁ ଯାଇଥିଲା, ଯେଉଁଠାରୁ ଗୁରୁତର ଭାବେ ପୋଡି ହୋଇ ୭ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା। ସିବିଆଇ ଟିମ୍ ସୋନୁ ଶେଖଙ୍କ ଘର ଏବଂ ସେଠାରେ ମୃତ ବ୍ୟକ୍ତିଙ୍କ ମୃତଦେହ ଯାଞ୍ଚ କରିବା ପରେ ସେମାନେ ପଡୋଶୀ ଫଟିକ୍ ଶେଖ ଏବଂ ମିହିଲାଲ ଶେଖଙ୍କ ସମେତ ଅନ୍ୟ ଲୋକଙ୍କ ଘରକୁ ଯାଇଥିଲେ।
ଏଥି ସହିତ, ସେଣ୍ଟ୍ରାଲ ଫରେନସିକ୍ ସାଇନ୍ସ ଲାବୋରେଟୋରୀ (CSFL) ର କର୍ମଚାରୀଙ୍କ ସହ ଭିଡିଓଗ୍ରାଫି ବ୍ୟତୀତ ସିବିଆଇ ଟିମ୍ ଏହି ଅଞ୍ଚଳର ୩-ଡି ସ୍କାନିଂ କରି ସେହି ସ୍ଥାନରୁ ନମୁନା ସଂଗ୍ରହ କରିଥିଲା। ଅନ୍ୟ ଜଣେ ଅଧିକାରୀ କହିଛନ୍ତି ଯେ, ଏହି ସବୁ ଘରଗୁଡିକରେ ନିଆଁ ବାହାର ଲୋକଙ୍କ ଦ୍ଵାରା ଲଗାଇଛି ନା ଘଟଣା ପଛରେ ଅନ୍ୟ କିଛି କାରଣ ଅଛି, ତାହା ମଧ୍ୟ ଅନୁସନ୍ଧାନ କରାଯାଇଛି।
ଅଧିକାରୀଙ୍କ ଅନୁଯାୟୀ, ଘଟଣାର ପ୍ରତ୍ୟକ୍ଷଦର୍ଶୀଙ୍କୁ ପଚରାଉଚରା କରିବା ପାଇଁ ଯୋଜନା ରହିଛି ଏବଂ ଏହି ଅଞ୍ଚଳର ସମସ୍ତ ବାସିନ୍ଦାଙ୍କ ବିସ୍ତୃତ ତାଲିକା ପ୍ରସ୍ତୁତ କରାଯାଉଛି। ପ୍ରତ୍ୟକ୍ଷଦର୍ଶୀ ତଥା ଅନ୍ୟ ଗ୍ରାମବାସୀଙ୍କ ସହ କଥା ହେବା ଆବଶ୍ୟକ ବୋଲି ଅଧିକାରୀ କହିଛନ୍ତି। ଆମେ ସ୍ଥାନୀୟ ଲୋକଙ୍କ ଏକ ତାଲିକା ପ୍ରସ୍ତୁତ କରୁଛୁ।
ସିବିଆଇ ଟିମ୍ ତଦନ୍ତ ପାଇଁ ବୀରଭୂମରେ ରହିବେ। ଅଧିକାରୀଙ୍କ କହିବାନୁସାରେ, ସିବିଆଇର ଅନ୍ୟ ଏକ ଟିମ୍ ରାମପୁରହାଟ ପୋଲିସ ଷ୍ଟେସନକୁ ଯାଇ ମାମଲାର ଡାଏରୀ ଏବଂ ଅନ୍ୟାନ୍ୟ ସଂପୃକ୍ତ ଦଲିଲଗୁଡ଼ିକୁ ଅନୁଧ୍ୟାନ କରିଥିଲେ।
ସିବିଆଇର ଅଧିକାରୀମାନେ ଶନିବାର ଆଇଜି (ବର୍ଦ୍ଧମାନ ପରିସର) ବି.ଏଲ୍ ମୀନା ଏବଂ ବୀରଭୂମ ଜିଲ୍ଲା ଅଧୀକ୍ଷକ ନଗେନ୍ଦ୍ର ତ୍ରିପାଠୀଙ୍କ ସହ ମଧ୍ୟ ଏକ ବୈଠକ କରିଛନ୍ତି। କଲିକତା ହାଇକୋର୍ଟ ଶୁକ୍ରବାର ଦିନ ବୀରଭୂମ ହିଂସା ଘଟଣାର ତଦନ୍ତକୁ ସିବିଆଇକୁ ହସ୍ତାନ୍ତର କରିଛନ୍ତି ଏବଂ ଅନୁସନ୍ଧାନରେ ଅଗ୍ରଗତି ସମ୍ପର୍କରେ ରିପୋର୍ଟ ଦାଖଲ କରିବାର ଶେଷ ତାରିଖ ଭାବରେ ଏପ୍ରିଲ ୭ ତାରିଖକୁ ସ୍ଥିର କରିଛନ୍ତି।