ଭୁବନେଶ୍ବର: ଜାତୀୟ ତଥା ଅନ୍ତର୍ଜାତୀୟ ସ୍ତରର ପ୍ରଖ୍ୟାତ ତବଲା ବାଦକ ପଣ୍ଡିତ ଉମେଶ କରଙ୍କ ପରଲୋକ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୭୨ବର୍ଷ ହୋଇଥିଲା। ସେ ଓଡିଶାର ତବଲା କ୍ଷେତ୍ରରେ ଜଣେ ପ୍ରଖ୍ୟାତ ଗୁରୁ ଭାବେ ପରିଚିତ। ସେ ସ୍ବାସ୍ଥ୍ୟଗତ କାରଣ ପାଇଁ ଏକ ହସପିଟାଲରେ ଚିକିତ୍ସିତ ହେଉଥିବା ବେଳେ ପରଲୋକ ହୋଇଯାଇଛି।
ପଣ୍ଡିତ ଉମେଶ କର ଉତ୍କଳ ସଂଗୀତ ମହାବିଦ୍ୟାଳୟର ତବଲା ବିଭାଗର ମୁଖ୍ୟ ପରବର୍ତ୍ତି ସମୟରେ ସେଠାରେ ଅଧ୍ୟକ୍ଷ ହୋଇପାରିଥିଲେ। ସେ ସେହି ପଦରୁ ୨୦୧୦ ମସିହାରେ ଅବସର ଗ୍ରହଣ ଥିଲେ। ଓଡିଶାକୁ ଯେଉଁ ପ୍ରଖ୍ୟାତ ଶିଳ୍ପୀମାନେ କାର୍ଯ୍ୟକ୍ରମ ପରିବେଷଣ ପାଇଁ ଆସନ୍ତି ସେମାନେ ପ୍ରଥମେ ଉମେଶ କରଙ୍କୁ ତବଲା ପାଇଁ ମନୋନିତ କରନ୍ତି।
ସେ ଦେଶ ତଥା ବିଦେଶରେ ବହୁ ସ୍ଥାନରେ ତବଲା ବାଦନ କରି ନିଜର ଦକ୍ଷତା ପ୍ରତିପାଦନ କରାଇଛନ୍ତି। ସେ ନିଜେ ତବଲା ବାଦନ ସହିତ ଓଡିଶାରେ ଶହଶହ ତବଲା ବାଦ୍ୟକାରଙ୍କୁ ସୃଷ୍ଟି କରିବାରେ ମଧ୍ୟ ସକ୍ଷମ ହୋଇପାରିଛନ୍ତି। ତାଙ୍କର ଛାତ୍ରଛାତ୍ରୀମାନେ ବର୍ତ୍ତମାନ ତବଲା ବାଦନରେ ବେଶ୍ ନାଁ ମଧ୍ୟ କରିବାରେ ଲାଗିଛନ୍ତି।
ଉମେଶ କରଙ୍କ ଜନ୍ମସ୍ଥାନ ହେଉଛି ପୁରୀ। ସେ ଏକ କଲାକାର ପରିବାରରେ ଜନ୍ମ ଗ୍ରହଣ କରିଥିଲେ। ତାଙ୍କର ବାପା ବାଦ୍ୟବିନୋଦ କ୍ଷେତ୍ରମହୋନ କର ଉଭୟ ତବଲା ଏବଂ ମର୍ଦ୍ଦଳ ବାଦକ ଭାବେ ଖ୍ୟାତ ଥିଲେ। ସେହିପରି ମାଆ ପଦ୍ମାବତୀ କର ଥିଲେ ସୀତାର ବାଦିକା। ଏପରିକି ଓଡିଶାର ପ୍ରଖ୍ୟାତ ସଂଗୀତକଜ୍ଞ ପ୍ରଫୁଲ କର ହେଉଛନ୍ତି ତାଙ୍କର ସଂପର୍କୀୟ ଭାଇ।
ଉମେଶ ପ୍ରଥମେ ସେ ନିଜର ପିତାଙ୍କଠାରୁ ତବଲା ବାଦନ ଶିକ୍ଷାଲାଭ କରିଥିଲେ। ଏହାପରେ ସେ କୋଲକାତା ଯାଇ ବିଶ୍ବପ୍ରସିଦ୍ଧ ତବଲା ବାଦକ ପଣ୍ଡିତ ଜ୍ଞାନପ୍ରକାଶ ଘୋଷଙ୍କଠାରୁ ଶିକ୍ଷାଲାଭ କରିଥିଲେ। ଶିକ୍ଷାଲାଭ ପରେ ସେ ଭୁବନେଶ୍ବରସ୍ଥିତ ଉତ୍କଳ ସଂଗୀତ ମହାବିଦ୍ୟାଳୟରେ ଅଧ୍ୟାପକ ଭାବେ ଯୋଗ ଦେଇଥିଲେ। ପଣ୍ଡିତ କର ଓଡ଼ିଶାର ପ୍ରଥମ ତବଲାବାଦକ ଭାବେ ଆକାଶବାଣୀ ଟପ୍ ଗ୍ରେଡ୍ କଳାକାର ମାନ୍ୟତା ଲାଭ କରିଥିଲେ।
ତାଙ୍କର ବିୟୋଗରେ ଓଡିଶାର କଳା ଜଗତରେ ଶୋକର ଛାୟା ଖେଳିଯାଇଛି। ତାଙ୍କର ବିୟୋଗ ଓଡିଶା ବାଦ୍ୟଯନ୍ତ୍ର କଳା କ୍ଷେତ୍ରରେ ଏକ ଅପୂରଣୀୟ କ୍ଷତି ଘଟିଲା।