ଭୁବନେଶ୍ବର: ଆଜି ମନ୍ତ୍ରୀ ନବ ଦାସଙ୍କ ପାର୍ଥୀବ ଶରୀର ଭୁବନେଶ୍ବରରୁ ବିଦାୟ ନେଇଛି। ଏକ ସ୍ବତନ୍ତ୍ର ବିମାନରେ ତାଙ୍କର ମରଶରୀରକୁ ଝାରସୁଗୁଡା ଅଭିମୁଖେ ନିଆଯାଇଛି। ସେଠାରେ ତାଙ୍କର ଅନ୍ତିମ ସଂସ୍କାର କରାଯିବ। ଏହି ବିମାନରେ ତାଙ୍କର ପରିବାରର ଲୋକେ ମଧ୍ୟ ଗସ୍ତ କରିଛନ୍ତି। ତାଙ୍କ ଜନ୍ମମାଟି ଝାରସୁଗୁଡାରେ ତାଙ୍କର ଶେଷ ଦର୍ଶନ ପାଇଁ ରଖାଯିବା ସହିତ ଶୋଭାଯାତ୍ରାର ମଧ୍ୟ ଆୟୋଜନ କରାଯାଇଛି।
ଆଜି ସକାଳୁ ତାଙ୍କର ସରକାରୀ ବାସଭବନରେ ଶେଷ ଦର୍ଶନ କରିବା ପାଇଁ ଲୋକଙ୍କର ଭିଡ ହୋଇଥିଲା। ବିଧାୟକ, ମନ୍ତ୍ରୀ ସହିତ ବହୁ ନେତା ତାଙ୍କର ଶେଷ ଦର୍ଶନ କରିଥିଲେ। ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ତାଙ୍କ ବାସଭବନରେ ଶେଷ ଦର୍ଶନ କରିଥିଲେ। ସେ ନବ ଦାସଙ୍କ ଘର ଭିତରକୁ ଯାଇ ତାଙ୍କ ପୁଅ ଏବଂ ପରିବାରର ଲୋକଙ୍କ ସହିତ କଥା ହୋଇଥିଲେ। ସେହିପରି 5ଟି ସଚିବ ଭିକେ ପାଣ୍ଡିଆନ ମଧ୍ୟ ଶେଷ ଦର୍ଶନ କରିଛନ୍ତି।
ସେହିପରି ରାଜ୍ୟପାଳ ପ୍ରଫେସର ଗଣେଷୀଲାଲ ମଧ୍ୟ ନବ ଦାସଙ୍କୁ ଶେଷ ଦର୍ଶନ କରି ଶ୍ରଦ୍ଧାଞ୍ଜଳୀ ପ୍ରଦାନ କରିଛନ୍ତି। ବାସଭବନରେ ତାଙ୍କ ପାର୍ଥିବ ଶରୀରକୁ ଗାର୍ଡ ଅଫ ଅନର ପ୍ରଦାନ କରାଯାଇଥିଲା। ଏଥିରେ ନିଜେ ସିପି ଏବଂ ଡିସିପି ଉପସ୍ଥିତ ଥିଲେ। ଏହାପରେ ସ୍ବତନ୍ତ୍ର ଗାଡିରେ ତାଙ୍କର ପାର୍ଥୀବ ଶରୀର ବିଜେଡି କାର୍ଯ୍ୟାଳୟକୁ ଅଣାଯାଇଥିଲା। ସେଠାରେ ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ସହିତ ବହୁ ନେତା ଓ ମନ୍ତ୍ରୀ ଶେଷ ଦର୍ଶନ କରିଥିଲେ। ପ୍ରଣବ ଏକ ଦଳୀୟ ପତାକା ତାଙ୍କ ମରଶରୀରେ ଘୋଡାଇ ଦେଇଥିଲେ।
ଏହାପରେ ତାଙ୍କୁ ଝାରସୁଗୁଡା ନେବା ପାଇଁ ବିମାନ ବନ୍ଦରକୁ ନିଆଯାଇଥିଲା। ସେଠାରେ ଏକ ସ୍ବତନ୍ତ୍ର ବିମାନ ଝାରସୁଗୁଡା ନେବା ପାଇଁ ବ୍ୟବସ୍ଥା କରାଯାଇଥିଲା। ବିମାନ ବନ୍ଦରରେ ସେହିପରି ବିଧାୟକ ପ୍ରଣବ ପ୍ରକାଶ ଦାସ, ପ୍ରଣବ ବଳବନ୍ତରାୟ, ପ୍ରଶାନ୍ତ ନନ୍ଦ ପ୍ରମୁଖ ମରଶରୀର ନେବା ପାଇଁ ବନ୍ଦୋବସ୍ତ କରିଥିଲେ।
ଗତକାଲି ରାତିରେ ତାଙ୍କର ପାର୍ଥୀବ ଶରୀର ଆପୋଲ ହସପିଟାଲରୁ ବିଧାନସଭା ପରିସରକୁ ନିଆଯାଇଥିଲା। ସେଠାରେ ବାଚସ୍ପତି ବିକ୍ରମ କେଶରୀ ଆରୁଖଙ୍କ ସହିତ ବହୁ ନେତା ବିଧାୟକ ଓ ମନ୍ତ୍ରୀ ତାଙ୍କୁ ଶେଷ ଦର୍ଶନ କରିଥିଲେ। ଏହାପରେ ତାଙ୍କର ସରକାରୀ ବାସ ଭବନରେ ରାତିସାରା ଶେଷ ଦର୍ଶନ ପାଇଁ ରଖାଯାଇଥିଲା।