ନୂଆଦିଲ୍ଲୀ: ୨୦୨୪ ରେ ହେବାକୁ ଥିବା ସାଧାରଣ ନିର୍ବାଚନ ସମ୍ପର୍କରେ ସମସ୍ତ ବିରୋଧୀ ଦଳ ଜୁଲାଇ ୧୮ ତାରିଖରେ ପୁଣି ଥରେ ଏକାଠି ହେବାକୁ ଯାଉଛନ୍ତି। ସୋନିଆ ଏବଂ ରାହୁଲ ଗାନ୍ଧୀ ମଧ୍ୟ ଏହି ବୈଠକରେ ଯୋଗଦେବାର ସମ୍ଭାବନା ରହିଛି। ଏହା ବିରୋଧୀ ଦଳର ଦ୍ୱିତୀୟ ବୈଠକ ହେବ; ଏହାପୂର୍ବରୁ ପାଟନାରେ ସମସ୍ତ ବିରୋଧୀ ଦଳ ଗତ ମାସରେ ଏକ ବୈଠକ କରିଛନ୍ତି। ସୂଚନାନୁସାରେ, ଜୁଲାଇ ୧୮ ତାରିଖରେ ହେବାକୁ ଥିବା ବୈଠକ ପୂର୍ବରୁ ସୋନିଆ ଗାନ୍ଧୀ ସମସ୍ତ ବିରୋଧୀ ଦଳଙ୍କୁ ରାତ୍ରୀ ଭୋଜନ ପାଇଁ ନିମନ୍ତ୍ରଣ କରିଛନ୍ତି। ଆମ୍ ଆଦମୀ ପାର୍ଟିକୁ ମଧ୍ୟ ନିମନ୍ତ୍ରଣ କରାଯାଇଛି।
ସମସ୍ତ ବିରୋଧୀ ଦଳଙ୍କୁ ରାତ୍ରୀ ଭୋଜନ ପାଇଁ ସୋନିଆ ଗାନ୍ଧୀଙ୍କ ନିମନ୍ତ୍ରଣ ବିରୋଧୀ ଦଳଗୁଡ଼ିକୁ ଏକଜୁଟ କରିବା ଏବଂ ବିରୋଧୀ ଏକତାକୁ ଆହୁରି ମଜବୁତ କରିବା ପାଇଁ ଏକ ପ୍ରୟାସ ବୋଲି କୁହାଯାଉଛି। ପ୍ରକାଶ ଯେ, ବିହାରର ରାଜଧାନୀ ପାଟନାରେ ଆୟୋଜିତ ବିରୋଧୀ ଦଳର ପ୍ରଥମ ବୈଠକରେ ୧୫ ଟି ଦଳ ଅଂଶଗ୍ରହଣ କରିଥିଲେ।
ସୂଚନାନୁସାରେ, ବିରୋଧୀ ଦଳର ଦ୍ୱିତୀୟ ବୈଠକରେ ଆଠଟି ନୂଆ ଦଳ ମଧ୍ୟ ଭାଗ ନେଇପାରନ୍ତି। ଦ୍ୱିତୀୟ ବୈଠକରେ ଭାଗ ନେବାକୁ ଯାଉଥିବା ଦଳଗୁଡ଼ିକ ମଧ୍ୟରେ MDMK, KDMK, VCK, RSP, AIFB, IUML, କେରଳ କଂଗ୍ରେସ (ଜୋସେଫ) ଏବଂ କେରଳ କଂଗ୍ରେସ (ମଣି) ଅନ୍ତର୍ଭୁକ୍ତ। ବିଶେଷ କଥା ହେଉଛି ୨୦୧୪ ରେ KDMK ଏବଂ MDMK ବିଜେପି ସହ ମେଣ୍ଟ କରିଥିଲେ।
ଉଲ୍ଲେଖନୀୟ କଥା ହେଉଛି, ବିରୋଧୀ ଦଳକୁ ଏକାଠି କରିବା ଏବଂ ୨୦୨୪ ଲୋକସଭା ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିବା ଉଦ୍ଦେଶ୍ୟରେ ବିହାରର ରାଜଧାନୀ ପାଟନାରେ ବିରୋଧୀ ଦଳର ପ୍ରଥମ ବୈଠକ ଆୟୋଜିତ ହୋଇଥିଲା। ବିହାର ମୁଖ୍ୟମନ୍ତ୍ରୀ ତଥା ଜନତା ଦଳ ୟୁନାଇଟେଡ ନେତା ନୀତୀଶ କୁମାରଙ୍କ ଉଦ୍ୟମରେ ସଂଗଠିତ ୧୫ ଟି ବିରୋଧୀ ଦଳର ୩୨ ନେତା ଏହି ବୈଠକରେ ଭାଗ ନେଇଥିଲେ। ଏହି ବୈଠକରେ ଚାରି ଘଣ୍ଟା ଧରି ଆଲୋଚନା ଚାଲିଥିଲା।
ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା ନୀତୀଶ କୁମାର କହିଛନ୍ତି ଯେ ବ୍ୟାପକ ବିରୋଧୀ ଏକତା ଦିଗରେ ଏହା ହେଉଛି ପ୍ରଥମ ପଦକ୍ଷେପ। ୨୦୨୪ ପାଖେଇ ଆସିବା ବେଳକୁ ଅଧିକ ଦଳ ଏହି ମିଳିତ ମେଣ୍ଟରେ ଯୋଗଦେବେ।
ରାଷ୍ଟ୍ରିୟ ଜନତା ଦଳ (ଆରଜେଡି) ମୁଖ୍ୟ ଲାଲୁ ଯାଦବ କହିଛନ୍ତି ଯେ, ରାଜ୍ୟର ଏକକ ବୃହତ୍ତମ ଦଳ ନେତୃତ୍ୱ ନେବା ଉଚିତ, ଅନ୍ୟ ଦଳ ସମର୍ଥନ କରିବା ଉଚିତ। ବଡ ପାର୍ଟୀଗୁଡିକ ବଡ ହୃଦୟ ଦେଖାଇବା ଉଚିତ୍। ଆସନ ବାଣ୍ଟିବାରେ କଂଗ୍ରେସର ଏକ ଖୋଲା ଏବଂ ନମନୀୟ ଆଭିମୁଖ୍ୟ ରହିବା ଉଚିତ୍।
ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାର କହିଛନ୍ତି ଯେ କେବଳ ନିର୍ବାଚନ ନୁହେଁ, ଗଣତନ୍ତ୍ରର ସୁରକ୍ଷା ପାଇଁ ଆମେ ମିଳିତ ଭାବେ କାର୍ଯ୍ୟ କରିବା ଉଚିତ।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମସି) ମୁଖ୍ୟ ମମତା ବାନାର୍ଜୀ କହିଛନ୍ତି ଯେ ବିଜେପି ବିରୋଧରେ କେବଳ ଗୋଟିଏ ମିଳିତ ବିରୋଧୀ ପ୍ରାର୍ଥୀ ରହିବା ଉଚିତ। ଏହା ଭାରତର ଜନତା ଏବଂ ମୋଦୀଙ୍କ ମଧ୍ୟରେ ଲଢେଇ।