ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଶୁକ୍ରବାର ଦିନ ନୂଆଦିଲ୍ଲୀ ଠାରେ ପ୍ରାଥମିକ କୃଷି ଋଣ ସମିତି (ପିଏସିଏସ୍) ଦ୍ୱାରା ସାଧାରଣ ସେବା କେନ୍ଦ୍ର (ସିଏସ୍ସି) ସେବା ଆରମ୍ଭ ହେବା ନେଇ ଏକ ଜାତୀୟ ମେଗା କନକ୍ଲେଭକୁ ଉଦ୍ଘାଟନ କରିଛନ୍ତି । ଏହି ଅବସରରେ କେନ୍ଦ୍ର ଯୋଗାଯୋଗ, ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ବିଦ୍ୟା ଏବଂ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ, କେନ୍ଦ୍ର ସମବାୟ ରାଷ୍ଟ୍ର ମନ୍ତ୍ରୀ ବି ଏଲ୍ ବର୍ମା, ସଚିବ, ସମବାୟ ମନ୍ତ୍ରଣାଳୟ, ଜ୍ଞାନେଶ କୁମାର, ସଚିବ, ବୈଦ୍ୟୁତିକ ଏବଂ ସୂଚନା ପ୍ରଯୁକ୍ତି ବିଦ୍ୟା ମନ୍ତ୍ରଣାଳୟ, ଅଳ୍କେଶ କୁମାର ଶର୍ମା ଏବଂ ସିଏସସି-ଏସପିଭିର ପରିଚାଳନା ନିର୍ଦ୍ଦେଶକ ସଞ୍ଜୟ ରାକେଶ ଅନ୍ୟ ମାନ୍ୟଗଣ୍ୟ ବ୍ୟକ୍ତି ମାନଙ୍କ ସହିତ ଉପସ୍ଥିତ ଥିଲେ ।
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ତାଙ୍କ ଅଭିଭାଷଣରେ କହିଛନ୍ତି ଯେ ପିଏସିଏସ୍ ଏବଂ ସିଏସ୍ସିର ଏକତ୍ରିକରଣ ସହିତ ସମବାୟ ସମିତିକୁ ମଜଭୁତ କରିବା ଏବଂ ଡିଜିଟାଲ ଇଣ୍ଡିଆକୁ ପ୍ରୋତ୍ସାହିତ କରିବା ଭଳି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଦୁଇଟି ସଂକଳ୍ପ ଆଜି ପୂରଣ ହେଉଛି । ଡିଜିଟାଲ ଇଣ୍ଡିଆ ମିଶନ ଅଧୀନରେ ସିଏସ୍ସି ମାଧ୍ୟମରେ ଶାସନରୁ ଦୁର୍ନୀତି ଦୂର କରିବା ଏବଂ ଗରିବ ଲୋକଙ୍କ ଦୁଆର ମୁହଁକୁ ସୁବିଧା ଗୁଡିକୁ ନେବା ତଥା ସମବାୟ ମନ୍ତ୍ରଣାଳୟ ଗଠନ କରି ପିଏସିଏସ ଠାରୁ ଆପେକ୍ସ ପର୍ଯ୍ୟନ୍ତ ସମଗ୍ର ସମବାୟ ବ୍ୟବସ୍ଥାକୁ ଶକ୍ତିଶାଳୀ କରିବା ଦ୍ୱାରା ଗ୍ରାମୀଣ ଅର୍ଥନୀତିକୁ ମଜଭୁତ କରିବା ପାଇଁ ପ୍ରଧାନମନ୍ତ୍ରୀ ମୋଦୀ ନେଇଥିବା ସଂକଳ୍ପ ଆଜି ସମନ୍ୱିତ ହୋଇଛି ।
ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଏକ ମହାନ ଦର୍ଶନ ସହ ସମବାୟ ମନ୍ତ୍ରଣାଳୟର ମାର୍ଗଦର୍ଶନ କରାଇଛନ୍ତି । ସେ କହିଛନ୍ତି ଯେ ସମବାୟ ଆନ୍ଦୋଳନକୁ ମଜଭୁତ କରିବାକୁ ହେଲେ ଏହାର କ୍ଷୁଦ୍ରତମ ୟୁନିଟ୍ ପିଏସିଏସ୍କୁ ସୁଦୃଢ଼ କରିବାକୁ ପଡିବ । ଶ୍ରୀ ଶାହ କହିଛନ୍ତି ଯେ, ଯେ ପର୍ଯ୍ୟନ୍ତ ପିଏସିଏସ୍ ଶକ୍ତିଶାଳୀ ହୋଇ ନାହିଁ, ସେ ପର୍ଯ୍ୟନ୍ତ ସମବାୟ ଆନ୍ଦୋଳନକୁ ମଜଭୁତ କରାଯାଇ ପାରିବ ନାହିଁ । ତେଣୁ ସରକାର ସେମାନଙ୍କୁ ସ୍ୱଚ୍ଛ କରିବା, ସେମାନଙ୍କର ଉତ୍ତରଦାୟିତ୍ୱ ସୁନିଶ୍ଚିତ କରିବା ଏବଂ ଆଧୁନିକୀକରଣ କରିବା ପାଇଁ ପିଏସିଏସ୍କୁ କମ୍ପ୍ୟୁଟରୀକରଣ କରିବାକୁ ନିଷ୍ପତ୍ତି ନେଇଛନ୍ତି ଯାହା ଦ୍ୱାରା ସରକାରଙ୍କ ଡିଜିଟାଲୀକୃତ ଯୋଜନାଗୁଡିକ ପିଏସିଏସ୍ ସହିତ ଏକୀଭୂତ ହୋଇ ପାରିବ । ଶ୍ରୀ ଶାହ କହିଛନ୍ତି ଯେ ସମବାୟ ମନ୍ତ୍ରଣାଳୟ ଗଠନ ହେବାର ୨୦ ଦିନ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପିଏସିଏସ୍ର କମ୍ପ୍ୟୁଟରୀକରଣ ପାଇଁ ୨୫୦୦ କୋଟି ଟଙ୍କା ପ୍ରଦାନ କରିଛନ୍ତି, ଯେଉଁଥିପାଇଁ ୬୫,୦୦୦ ପିଏସିଏସ୍ କମ୍ପ୍ୟୁଟରୀକରଣ କରାଯାଉଛି ।
କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି ଯେ ‘ସର୍ବନିମ୍ନ ସରକାର, କିନ୍ତୁ ବିନା ଦୁର୍ନୀତିରେ ଅନ୍ତିମ ମାଇଲ୍ ପର୍ଯ୍ୟନ୍ତ ବିତରଣ ସହିତ ସର୍ବାଧିକ ଶାସନ’ ସୂତ୍ର କାର୍ଯ୍ୟକାରୀ କରିବା ପାଇଁ ସିଏସ୍ସି ଠାରୁ କୌଣସି ବଡ଼ ମାଧ୍ୟମ ଥାଇ ନପାରେ । ସେ ସୂଚନା ଦେଇଛନ୍ତି ଯେ ଭାରତ ସରକାର ଏବଂ ରାଜ୍ୟ ସରକାରମାନଙ୍କର ୩୦୦ ରୁ ଅଧିକ କ୍ଷୁଦ୍ର ହିତାଧିକାରୀ ଯୋଜନା ସିଏସ୍ସି ସହିତ ଏକୀଭୂତ ହୋଇଛି । ସେ କହିଛନ୍ତି ଯେ ଗ୍ରାମର ଗରିବ, ଭୂମିହୀନ କୃଷି ଶ୍ରମିକ ଏବଂ ଦଳିତ ଏବଂ ଆଦିବାସୀ ସମ୍ପ୍ରଦାୟକୁ ସିଏସ୍ସି ସେବା ଯୋଗାଇବା ପାଇଁ ପିଏସିଏସ୍ ଠାରୁ ଭଲ ମାଧ୍ୟମ ଥାଇ ନପାରେ । ଆଜି ପିଏସିଏସ୍ ଏବଂ ସିଏସ୍ସି ମିଳିତ ହେବାକୁ ଯାଉଛନ୍ତି, ଏହା କେବଳ ଗରିବଙ୍କ ସୁବିଧା ବୃଦ୍ଧି କରିବ ନାହିଁ, ବରଂ ଗ୍ରାମୀଣ ଅର୍ଥନୀତି ମଧ୍ୟ ନୂତନ ଶକ୍ତି ଏବଂ ଦୃଢ଼ତା ପାଇବ । ଏହା ସହିତ ଆମେ ଦେଶର ବିକାଶ ପାଇଁ ସର୍ବାଧିକ ସାମର୍ଥ୍ୟକୁ ମଧ୍ୟ ବ୍ୟବହାର କରିବା କ୍ଷେତ୍ରରେ ସମର୍ଥ ହେବା ।
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ସିଏସ୍ସି ରେ ୧୭,୧୭୬ ପିଏସିଏସ୍ ପଞ୍ଜିକୃତ ହୋଇଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଦୁଇ ମାସର ସ୍ୱଳ୍ପ ସମୟ ମଧ୍ୟରେ ୧୭,୦୦୦ ରୁ ଅଧିକ ପିଏସିଏସ୍ ପରିସର ଭିତରକୁ ଆସିବା ହେଉଛି ଏକ ବଡ଼ ସଫଳତା । ଏହି ଉଲ୍ଲେଖନୀୟ ସଫଳତା ପାଇଁ ଶ୍ରୀ ଶାହ ସମବାୟ ମନ୍ତ୍ରଣାଳୟର ସଚିବ ଏବଂ ମନ୍ତ୍ରଣାଳୟର ସମଗ୍ର ଦଳଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ ୧୭,୧୭୬ ପିଏସିଏସ୍ ମଧ୍ୟରୁ ପ୍ରାୟ ୬,୬୭୦ କାର୍ଯ୍ୟ କରିାବ ଆରମ୍ଭ କରିଛନ୍ତି ଏବଂ ଅବଶିଷ୍ଟ ପିଏସିଏସ୍ ମଧ୍ୟ ଆସନ୍ତା ୧୫ ଦିନ ମଧ୍ୟରେ କାର୍ଯ୍ୟ ଆରମ୍ଭ କରିବେ । ଏହା ପ୍ରାୟ ୧୪,୦୦୦ ଗ୍ରାମୀଣ ଯୁବକଙ୍କୁ ନିଯୁକ୍ତି ଯୋଗାଇବ ଏବଂ ଏହି ଯୁବକମାନେ ଗ୍ରାମାଞ୍ଚଳର ଅର୍ଥନୀତି ଏବଂ ଗ୍ରାମ ଗୁଡିକରେ ସୁବିଧା ଗୁଡ଼ିକୁ ମଜଭୁତ କରିବା ପାଇଁ କାର୍ଯ୍ୟ କରିବେ । ସେ କହିଛନ୍ତି ଯେ ଆମ ଦେଶର ଜନସଂଖ୍ୟାର ୬୦-୬୫% ଗ୍ରାମରେ ବସବାସ କରନ୍ତି ଆଉ ସେଥିପାଇଁ ଆମକୁ “ସହକାର ସେ ସମ୍ରିଦ୍ଧି’ ମନ୍ତ୍ର ସହିତ ଗ୍ରାମୀଣ ଅର୍ଥନୀତିକୁ ତ୍ୱରାନ୍ୱିତ ଏବଂ ବିବିଧତାଭରା କରିବା ନିମନ୍ତେ ଉଦ୍ୟମ କରିବାକୁ ହେବ ।
ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ ୯ ବର୍ଷ ମଧ୍ୟରେ ଭାରତ ସରକାର ବିନା ମୂଲ୍ୟରେ ପାଂଚ ଲକ୍ଷ ଟଙ୍କା ପର୍ଯ୍ୟନ୍ତ ରାସନ, ଗୃହ, ବିଦ୍ୟୁତ୍, ଜଳ, ରନ୍ଧନ ଗ୍ୟାସ, ଶୌଚାଳୟ ଏବଂ ସ୍ୱାସ୍ଥ୍ୟ ସୁବିଧା ୬୦ କୋଟି ଲୋକଙ୍କୁ ଯୋଗାଇ ଦେଇଛନ୍ତି । ବର୍ତ୍ତମାନ ଏହି ସବୁ ସୁବିଧା ପାଇଁ ପଞ୍ଜିକରଣ ତଥା ଗ୍ରାମାଞ୍ଚଳର ଲୋକଙ୍କ ସମସ୍ୟାକୁ ସରକାରଙ୍କ ନିକଟକୁ ନେବା ପାଇଁ ୧୭,୦୦୦ ରୁ ଅଧିକ ପିଏସିଏସ୍ ମଧ୍ୟ ମାଧ୍ୟମ ହେବ । ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେବଳ ଜନ-ଧନ ଜମା ଖାତା, ଆଧାର କାର୍ଡ ଏବଂ ମୋବାଇଲ ଯୋଗାଇ ଦେଇ ନାହାନ୍ତି, ବରଂ ଡିଜିଟାଲ ଇଣ୍ଡିଆ ମିଶନ ଅଧୀନରେ ଗ୍ରାମ ତଥା ଗ୍ରାମ ପଞ୍ଚାୟତରେ ଅପ୍ଟିକାଲ ଫାଇବର ନେଟୱର୍କ ସ୍ଥାପନ କରିବା ଭଳି ମଧ୍ୟ ଏକ ବଡ଼ କାର୍ଯ୍ୟ କରିଛନ୍ତି ।
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ଗତ ୯ ବର୍ଷ ମଧ୍ୟରେ ଦେଶରେ ଇଣ୍ଟରନେଟ ବ୍ୟବହାରକାରୀଙ୍କ ସଂଖ୍ୟା ୨୫୦ ପ୍ରତିଶତ ବୃଦ୍ଧି ପାଇଛି ଏବଂ ପ୍ରତି ଜିବି ଡାଟାର ମୂଲ୍ୟ ୯୬ ପ୍ରତିଶତ ହ୍ରାସ ପାଇଛି, ଯାହା ଗରିବ ଏବଂ ବଞ୍ଚିତ ଲୋକ ମାନଙ୍କୁ ଏହି ସୁବିଧା ବ୍ୟବହାର କରିବାରେ ସକ୍ଷମ କରାଇଛି । ସେ କହିଛନ୍ତି ଯେ ପିଏସିଏସ୍କୁ କମ୍ପ୍ୟୁଟରୀକରଣ କରି ସରକାର ପିଏସିଏସ୍ର ବହୁମୁଖୀକରଣ କାର୍ଯ୍ୟ କରିଛନ୍ତି ଏବଂ ସେମାନଙ୍କୁ ଏଫପିଓ (କୃଷକ ଉତ୍ପାଦକ ସଂଗଠନ) ଭାବରେ କାର୍ଯ୍ୟ କରିବାକୁ ମଧ୍ୟ କ୍ଷମତା ଦେଇଛନ୍ତି । ଏଥି ସହିତ ବିହନ ଉତ୍ପାଦନ, ଜୈବ ଚାଷର ବିପଣନ ଏବଂ କୃଷକ ଉତ୍ପାଦ ରପ୍ତାନି ପାଇଁ ତିନୋଟି ବହୁମୁଖୀ ରାଜ୍ୟ ସମବାୟ ସମିତି ଗଠନ କରାଯାଇଛି । ବିଶ୍ୱର ସର୍ବବୃହତ ଖାଦ୍ୟ ଶସ୍ୟ ସଂରକ୍ଷଣ ଯୋଜନା ମଧ୍ୟ ଆରମ୍ଭ ହୋଇଛି । ଶ୍ରୀ ଶାହ କହିଛନ୍ତି ଯେ ଆସନ୍ତା ୫ ବର୍ଷ ମଧ୍ୟରେ ଛୋଟ ପିଏସିଏସ୍ ଦେଶର ୩୦% ଖାଦ୍ୟ ଶସ୍ୟକୁ ସଂରକ୍ଷଣ ଯୋଗାଇବ ।
ଅମିତ ଶାହ କହିଛନ୍ତି ଯେ ବର୍ତ୍ତମାନ ପିଏସିଏସ୍ ଏଲପିଜି, ଡିଜେଲ ଏବଂ ପେଟ୍ରୋଲର ବିତରଣ କାର୍ଯ୍ୟ ଆରମ୍ଭ କରି ପାରିବ । ସେମାନେ ମଧ୍ୟ ସୁଲଭ ମୂଲ୍ୟ ଦୋକାନ, ଜନ ଔଷଧି କେନ୍ଦ୍ର, ପ୍ରଧାନ ମନ୍ତ୍ରୀ କିଷାନ ସମୃଦ୍ଧି କେନ୍ଦ୍ର ଏବଂ ସାର ଦୋକାନ ଖୋଲି ପାରିବେ । ସେ କହିଛନ୍ତି ଯେ, ଏହି କାର୍ଯ୍ୟ ମାଧ୍ୟମରେ ପିଏସିଏସ୍ ଗ୍ରାମ ଗୁଡିକର ଅର୍ଥନୈତିକ କାର୍ଯ୍ୟକଳାପର କେନ୍ଦ୍ର ବିନ୍ଦୁ ହେବ । ଶ୍ରୀ ଶାହ କହିଛନ୍ତି ଯେ ଯଦି ପିଏସିଏସ୍ ସମୃଦ୍ଧ ହୁଏ, ତେବେ କୃଷକମାନେ ସମୃଦ୍ଧ ହେବେ, କାରଣ ଏହାର ଲାଭ ସିଧାସଳଖ ଚାଷୀଙ୍କ ବ୍ୟାଙ୍କ ଖାତାରେ ଜମା ହୋଇଥାଏ । ସେ କହିଛନ୍ତି ଯେ ସରକାର ସମବାୟ କ୍ଷେତ୍ରରେ ଅନେକ ଆଇନଗତ ଏବଂ ପ୍ରଶାସନିକ ସଂସ୍କାର ଆଣିଛନ୍ତି ଏବଂ ବହୁମୁଖୀ ଢଙ୍ଗରେ ଅର୍ଥନୈତିକ କାର୍ଯ୍ୟକଳାପକୁ ପ୍ରୋତ୍ସାହିତ କରିଛନ୍ତି । ଶ୍ରୀ ଶାହ କହିଛନ୍ତି ଯେ, ମୋଦୀ ସରକାରଙ୍କ ସମବାୟ ଯୋଜନା ଏବଂ ନିରନ୍ତର ସଂସ୍କାର ତୃଣମୂଳ ସ୍ତରରେ ପହଞ୍ଚିଛି, ତେଣୁ ସମବାୟ ଆନ୍ଦୋଳନକୁ ମଜଭୁତ ହେବାକୁ କେହି ଅଟକାଇ ପାରିବେ ନାହିଁ । ପିଏସିଏସକୁ ମଜଭୁତ କରିବା ପାଇଁ ଏବଂ ‘ପିଏସିଏସ୍କୁ ମଜଭୁତ କରି ଗ୍ରାମର ସମୃଦ୍ଧି\’ ମନ୍ତ୍ର ଗ୍ରହଣ କରି ଏହାକୁ ଆଗକୁ ନେବାକୁ ଶ୍ରୀ ଶାହ ଲୋକମାନଙ୍କୁ ନିବେଦନ କରିଥିଲେ ।
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସମବାୟ ମନ୍ତ୍ରଣାଳୟ ନିକଟରେ ଏକ ନୂତନ ପଦକ୍ଷେପ ନେଇଛି ଏବଂ ସାହାରା ଗୋଷ୍ଠୀର ସମବାୟ ସମିତିରେ ଜମାକାରୀଙ୍କ ଟଙ୍କା ଫେରସ୍ତ ପ୍ରକ୍ରିୟା ଆରମ୍ଭ କରିଛି । ସେ କହିଛନ୍ତି ଯେ ସମବାୟ ମନ୍ତ୍ରଣାଳୟ ସୁପ୍ରିମକୋର୍ଟରେ ଏକ ପିଟିସନ ଦାଖଲ କରିଛି । ଏହି ଆବେଦନ ଉପରେ ସୁପ୍ରିମକୋର୍ଟ ୫୦୦୦ କୋଟି ଟଙ୍କା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ସାହାରା ଗୋଷ୍ଠୀର ସମବାୟ ସମିତିର ପ୍ରକୃତ ଜମାକାରୀଙ୍କୁ ଆଇନଗତ ଦେୟ ପ୍ରଦାନ ପାଇଁ “ସାହାରା-ସେବି ଫେରସ୍ତ ଆକାଉଣ୍ଟ’ରୁ କୋଅପରେଟିଭ ସୋସାଇଟି (ସିଆର୍ସିଏସ୍) ର କେନ୍ଦ୍ରୀୟ ରେଜିଷ୍ଟ୍ରାରଙ୍କ ଆକାଉଣ୍ଟକୁ ୫୦୦୦ କୋଟି ଟଙ୍କା ହସ୍ତାନ୍ତର କରାଯାଇଛି । ସେ କହିଛନ୍ତି ଯେ ଏହି ନିର୍ଦ୍ଦେଶକୁ ଅନୁସରଣ କରି ଜୁଲାଇ ୧୮, ୨୦୨୩ ରେ ‘ସିଆର୍ସିଏସ୍ – ସାହାରା ଫେରସ୍ତ\’ ପୋର୍ଟାଲ ଆରମ୍ଭ କରାଯାଇଥିଲା । ଅମିତ ଶାହ ସୂଚନା ଦେଇଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ଏହି ପୋର୍ଟାଲରେ ୫ ଲକ୍ଷ ଲୋକ ପଞ୍ଜିକୃତ ହୋଇଛନ୍ତି ଏବଂ ପ୍ରକୃତ ଜମାକାରୀଙ୍କୁ ଟଙ୍କା ଫେରସ୍ତ ପ୍ରକ୍ରିୟା ଆରମ୍ଭ ହୋଇଛି । ସେ କହିଛନ୍ତି ଯେ ଏହା ଏକ ଉତ୍ତମ ଉଦାହରଣ ଯେ ଯଦି ସରକାର ସକ୍ରିୟ ଢଙ୍ଗରେ କାର୍ଯ୍ୟ କରନ୍ତି, ତେବେ ସର୍ବାଧିକ ଜଟିଳ ସମସ୍ୟାର ମଧ୍ୟ ସମାଧାନ ହୋଇ ପାରିବ ।