ନୂଆଦିଲ୍ଲୀ: ବିରୋଧୀ ଦଳର ‘ଇଣ୍ଡିଆନ୍ ନ୍ୟାସନାଲ ଡେଭଲପମେଣ୍ଟାଲ୍ ଇନକ୍ଲୁସିଭ୍ ଆଲାଇନ୍ସ’ (INDIA) ର ମେଣ୍ଟ ନିଷ୍ପତ୍ତି ନେଇଛି ଯେ, ସେମାନେ ଦେଶର ୧୪ ଟି ଟେଲିଭିଜନ ଆଙ୍କର୍ କାର୍ଯ୍ୟକ୍ରମରେ ସେମାନଙ୍କ ପ୍ରତିନିଧୀଙ୍କୁ ପଠାଇବେ ନାହିଁ। ଭାରତୀୟ ଜନତା ପାର୍ଟି (ବିଜେପି) ଏହି ପଦକ୍ଷେପକୁ ନିନ୍ଦା କରିଛି। ଦଳର ମୁଖ୍ୟ ମୁଖପାତ୍ର ତଥା ସାଂସଦ ଅନିଲ ବଲୁନି ଏକ ବିବୃତ୍ତିରେ କହିଛନ୍ତି ଯେ, ବିରୋଧୀ ଦଳମାନେ ସେମାନଙ୍କ ଦମନକାରୀ, ଏକଛତ୍ରବାଦୀ ତଥା ନକାରାତ୍ମକ ମାନସିକତା ପ୍ରଦର୍ଶନ କରିଛନ୍ତି।
ଶ୍ରୀ ବଲୁନି କହିଛନ୍ତି ଯେ, ବିଜେପି ଏପରି ବିକୃତ ମାନସିକତାକୁ ଦୃଢ ବିରୋଧ କରୁଛି ଯାହା ଅଭିବ୍ୟକ୍ତିର ସ୍ୱାଧୀନତାକୁ ଅଙ୍କୁଶ ଲଗାଏ। ସେ କହିଛନ୍ତି ଯେ, “ଜରୁରୀକାଳୀନ ସମୟରେ ଗଣମାଧ୍ୟମକୁ ଚୁପ କରାଯାଇଥିଲା ଏବଂ ଏହି ‘ଅହଂକାରୀ’ମେଣ୍ଟରେ ସାମିଲ ଦଳଗୁଡ଼ିକ ସମାନ ଅରାଜକତା ଏବଂ ଜରୁରୀକାଳୀନ ମାନସିକତା ସହିତ କାର୍ଯ୍ୟ କରୁଛନ୍ତି।
ଅନିଲ ବଲୁନି ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଲେଖିଛନ୍ତି ଯେ, ସାମ୍ବାଦିକମାନଙ୍କୁ ବର୍ଜନ ତଥା ଧମକ ଦେବା ପାଇଁ ଅହଂକାରୀ ମେଣ୍ଟର ନିଷ୍ପତ୍ତି ଅତ୍ୟନ୍ତ ନିନ୍ଦନୀୟ। ଏହା କେବଳ ସେମାନଙ୍କର ଅତ୍ୟାଚାରୀ ଏବଂ ଏକଛତ୍ରବାଦୀ ଚିନ୍ତାଧାରାକୁ ପ୍ରତିଫଳିତ କରିଥାଏ। ‘ଇଣ୍ଡିଆ’ ମେଣ୍ଟର ଏହି ନିକୃଷ୍ଠ ମାନସିକତାକୁ ବିଜେପି ଦୃଢ ନିନ୍ଦା କରିଛି।
ଅନିଲ ଅଭିଯୋଗ କରିଛନ୍ତି ଯେ, ଗଣମାଧ୍ୟମ ପାଇଁ ଏଭଳି ‘ଖୋଲା ଧମକ’ ଲୋକଙ୍କ ସ୍ୱରକୁ ଦମନ କରିବା ସହ ସମାନ।
ନ୍ୟୁଜ୍ ବ୍ରୋଡକାଷ୍ଟର୍ସ ଏବଂ ଡିଜିଟାଲ୍ ଆସୋସିଏସନ୍ (ଏନବିଡିଏ) କହିଛି ଯେ ବହିଷ୍କାରର ଏହି ନିଷ୍ପତ୍ତି ଏକ ବିପଜ୍ଜନକ ଉଦାହରଣ ହେବ ଏବଂ ଏହା ଗଣତନ୍ତ୍ରର ମୂଲ୍ୟବୋଧ ବିରୁଦ୍ଧ ଅଟେ।
ଏହି ନିଷ୍ପତ୍ତି ଆଲିଆନ୍ସ ‘ଇଣ୍ଡିଆ’ର ମିଡିଆ ସମ୍ପର୍କିତ କମିଟିର ବୈଠକରେ ନିଆଯାଇଛି। ବିରୋଧୀ ଦଳର ଗଣମାଧ୍ୟମ କମିଟି ଏକ ବିବୃତ୍ତିରେ କହିଛି ଯେ, ‘ଇଣ୍ଡିଆ’ ସମନ୍ୱୟ କମିଟି ୧୩ ସେପ୍ଟେମ୍ବର ୨୦୨୩ ରେ ହୋଇଥିବା ବୈଠକରେ ନିଷ୍ପତ୍ତି ଅନୁଯାୟୀ ବିରୋଧୀ ମେଣ୍ଟର ସହଯୋଗୀ ଦଳ ସେମାନଙ୍କ ପ୍ରତିନିଧୀଙ୍କୁ ସୋ ଏବଂ କାର୍ଯ୍ୟକ୍ରମକୁ ପଠାଇବେ ନାହିଁ। ଏହି ବିବୃତ୍ତିରେ ୧୪ ଟି ଆଙ୍କରଙ୍କ ତାଲିକା ବିରୋଧୀ ଦଳ ପ୍ରକାଶ କରିଛି।
କଂଗ୍ରେସର ଗଣମାଧ୍ୟମ ବିଭାଗର ମୁଖ୍ୟ ତଥା ବିରୋଧୀ ଦଳର ମିଡିଆ କମିଟିର ସଦସ୍ୟ ପୱନ ଖେଡା କହିଛନ୍ତି ଯେ, “ପ୍ରତ୍ୟେକ ଦିନ ଅପରାହ୍ନ ୫ ଟାରୁ କିଛି ଚ୍ୟାନେଲରେ ଘୃଣାର ଦୋକାନ ସ୍ଥାପନ କରାଯାଇଥାଏ। ଆମେ ଘୃଣାର ବଜାରର ଗ୍ରାହକ ହେବୁ ନାହିଁ। ଆମର ଲକ୍ଷ୍ୟ ହେଉଛି ‘ଘୃଣା ମୁକ୍ତ ଭାରତ’।
ଶ୍ରୀ ଖେଡା ଏହା ମଧ୍ୟ କହିଛନ୍ତି ଯେ, “ବଡ ହୃଦୟ ସହିତ ନିଷ୍ପତ୍ତି ନିଆଯାଇଛି ଯେ ଆମେ କିଛି ଆଙ୍କର ଶୋ ଏବଂ କାର୍ଯ୍ୟକ୍ରମରେ ଅଂଶଗ୍ରହଣ କରିବୁ ନାହିଁ। ଆମେ ଆମର ନେତାଙ୍କ ବିରୁଦ୍ଧରେ ଅଯଥା ମନ୍ତବ୍ୟ ଏବଂ ମିଥ୍ୟା ଖବର ବିରୁଦ୍ଧରେ ଲଢୁଛୁ ଏବଂ ସଂଗ୍ରାମ ଜାରି ରଖିବୁ, କିନ୍ତୁ ସମାଜରେ ଘୃଣା ବ୍ୟାପିବାକୁ ଦେବୁ ନାହିଁ। ଘୃଣା ଲୋପ ପାଇବ, ପ୍ରେମ ଜିତିବ।
ବିଜେପି ନେତା ତଥା କେନ୍ଦ୍ର ମନ୍ତ୍ରୀ ହରଦୀପ ସିଂ ପୁରୀ ବିରୋଧୀ ଦଳର ଏହି ପଦକ୍ଷେପକୁ ଜରୁରୀକାଳୀନ ପରିସ୍ଥିତି ସହ ତୁଳନା କରିଛନ୍ତି। ସେ X ରେ ପୋଷ୍ଟ କରି କହିଛନ୍ତି ଯେ, ଭାରତରେ ନାଗରିକ ସ୍ଵାଧୀନତାକୁ ବନ୍ଦ କରିବାର ଏକମାତ୍ର ଉଦାହରଣ ଯାହାକୁ ଆମେ ୧୯୭୫ ମସିହାରେ ଜରୁରୀକାଳୀନ ସମୟରେ ଦେଖିଥିଲୁ। ସନାତନ ଧର୍ମ, ସାମ୍ବାଦିକଙ୍କ ବିରୋଧରେ ଏଫଆଇଆର ଏବଂ ଗଣମାଧ୍ୟମର ବହିସ୍କାର କରିବା ଜରୁରୀକାଳିନର ସେହି ଅନ୍ଧକାର ଦିନର ରାଜନୀତି ପ୍ରତିଫଳିତ ହୋଇଛି। ‘INDI Alliance’ ର ଏହା ପ୍ରକୃତ ଚେହେରା।