ନୂଆଦିଲ୍ଲୀ: ସବୁକିଛି ଠିକ୍ ଠାକ୍ ରହିଲେ ଆସନ୍ତା ବର୍ଷ ମାର୍ଚ୍ଚ ମାସରୁ ଟୋଲ ପ୍ଲାଜାରେ ଅନେକ ପରିବର୍ତ୍ତନ ଦେଖିବାକୁ ମିଳିବ। ଟୋଲ ଦେବାରେ ଆପଣ ଲମ୍ବା ଲାଇନରୁ ମୁକ୍ତି ପାଇପାରିବେ।
ରାଜପଥ ଟୋଲ ପ୍ଲାଜାର ବର୍ତ୍ତମାନର ବ୍ୟବସ୍ଥାକୁ ବଦଳାଇବା ପାଇଁ ସରକାର ଆସନ୍ତା ବର୍ଷ ମାର୍ଚ୍ଚ ସୁଦ୍ଧା ଜିପିଏସ୍ ଆଧାରିତ ଟୋଲ ସଂଗ୍ରହ ବ୍ୟବସ୍ଥା ସମେତ ନୂତନ ଜ୍ଞାନକୌଶଳ ପ୍ରଚଳନ କରିବେ ବୋଲି ସଡ଼କ ପରିବହନ ଓ ରାଜପଥ ମନ୍ତ୍ରୀ ନୀତିନ ଗଡ଼କରୀ କହିଛନ୍ତି। ରାଜପଥରେ ଟ୍ରାଫିକ୍ ହ୍ରାସ କରିବା ଏବଂ ରାଜପଥରେ ଯାତ୍ରା କରୁଥିବା ସଠିକ୍ ଦୂରତା ପାଇଁ ଗାଡ଼ି ଚାଳକଙ୍କଠାରୁ ଶୁଳ୍କ ଆଦାୟ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି।
ଅଟୋମେଟିକ ଟୋଲ ଆଦାୟ ହେବ
ଦେଶରେ ଟୋଲ ପ୍ଲାଜା ବ୍ୟବସ୍ଥାରେ ପରିବର୍ତ୍ତନ ଆଣିବା ପାଇଁ ସରକାର ଜିପିଏସ୍ ଆଧାରିତ ଟୋଲ ସିଷ୍ଟମ୍ ସମେତ ନୂଆ ଟେକ୍ନୋଲୋଜି ଆଣିବାକୁ ବିଚାର କରୁଛନ୍ତି ବୋଲି ଗଡ଼କରୀ କହିଛନ୍ତି। ଆସନ୍ତା ବର୍ଷ ମାର୍ଚ୍ଚ ସୁଦ୍ଧା ଆମେ ସାରା ଦେଶରେ ନୂଆ ଜିପିଏସ୍ ଉପଗ୍ରହ ଆଧାରିତ ଟୋଲ୍ ସଂଗ୍ରହ ଆରମ୍ଭ କରିବୁ। ଗଡ଼କରୀ କହିଛନ୍ତି ଯେ ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ ମଧ୍ୟ ଯାନବାହନ ନ ଅଟକାଇ ସ୍ୱୟଂଚାଳିତ ଟୋଲ ସଂଗ୍ରହକୁ ସକ୍ଷମ କରିବା ପାଇଁ ସ୍ୱୟଂଚାଳିତ ନମ୍ବର ପ୍ଲେଟ୍ ପରିଚୟ ବ୍ୟବସ୍ଥାର ଦୁଇଟି ପାଇଲଟ୍ ପ୍ରକଳ୍ପ ହାତକୁ ନେଇଛି।
ମିନିଟ ପାଇଁ ଅପେକ୍ଷା ଶେଷ ହେବ
୨୦୧୮-୧୯ ବର୍ଷରେ ଟୋଲ ପ୍ଲାଜାରେ ଗାଡ଼ିଗୁଡ଼ିକୁ ହାରାହାରି ୮ ମିନିଟ୍ ଅପେକ୍ଷା କରିବାକୁ ପଡ଼ିଥିଲା । ୨୦୨୦-୨୧ ଓ ୨୦୨୧-୨୨ରେ ଫାଷ୍ଟଟ୍ୟାଗ୍ ବ୍ୟବସ୍ଥା କାର୍ଯ୍ୟକାରୀ ହେବାପରେ ଏଥର ମାତ୍ର ୪୭ ସେକେଣ୍ଡକୁ ହ୍ରାସ ପାଇଛି । ବିଶେଷ କରି ସହର ନିକଟବର୍ତ୍ତୀ ଜନବହୁଳ ସହରଗୁଡ଼ିକରେ ଟୋଲ ପ୍ଲାଜାରେ ଅପେକ୍ଷା ସମୟ ଯଥେଷ୍ଟ ଉନ୍ନତ ହୋଇଥିବାବେଳେ ଭିଡ଼ ସମୟରେ ଏହା ବୃଦ୍ଧି ପାଇଥାଏ ।
ଅନ୍ୟପକ୍ଷରେ ଗଡ଼କରୀ କହିଛନ୍ତି ଯେ ସାଧାରଣ ନିର୍ବାଚନ ପାଇଁ ଆଦର୍ଶ ଆଚରଣ ବିଧି ଲାଗୁ ହେବା ପୂର୍ବରୁ ସରକାର ୧୦ କିଲୋମିଟରରୁ କମ୍ ଲମ୍ବର ରାଜପଥ ପ୍ରକଳ୍ପ ପାଇଁ ‘ବିଲ୍ଡ-ଅପରେଟ ଆଣ୍ଡ ହ୍ୟାଣ୍ଡଓଭର’ (ବିଓଟି) ମଡେଲରେ ୧.୫ରୁ ୨ ଲକ୍ଷ କୋଟି ଟଙ୍କାର ସଡ଼କ ପ୍ରକଳ୍ପ ପାଇଁ ଟେଣ୍ଡର ଆହ୍ୱାନ କରିବେ । ୨୦୨୪ ଏପ୍ରିଲ-ମେ ମାସରେ ସାଧାରଣ ନିର୍ବାଚନ ହେବାର ସମ୍ଭାବନା ରହିଛି ।
ଜିପିଏସ୍ ଟୋଲ ସଂଗ୍ରହ କ’ଣ ?
ଏହି ନୂଆ ଜ୍ଞାନକୌଶଳ ଜରିଆରେ ଜିପିଏସ୍ ଜରିଆରେ ଗାଡ଼ିର ଦୂରତା ଆଧାରରେ ଟୋଲ ଟ୍ୟାକ୍ସ ଆଦାୟ କରାଯାଉଛି। ସ୍ୱୟଂଚାଳିତ ନମ୍ବର ପ୍ଲେଟ୍ ଚିହ୍ନଟ ବ୍ୟବସ୍ଥା (ଅଟୋମେଟିକ୍ ପ୍ଲେଟ୍ ରିଡର୍ କ୍ୟାମେରା ମାଧ୍ୟମରେ)ଦ୍ୱାରା ଏସବୁ ସମ୍ଭବ ହେବ। ଏହା କାର୍ଯ୍ୟକାରୀ ହେବା ପରେ ଟୋଲ୍ ପ୍ଲାଜାରେ ଗାଡ଼ିକୁ ନ ଅଟକାଇ ଟୋଲ୍ ଆଦାୟ କରାଯିବ। ଏଭଳି ସ୍ଥିତିରେ ଗାଡ଼ିରେ ଥିବା ଫାଷ୍ଟଟ୍ୟାଗରୁ ସିଧାସଳଖ ଟଙ୍କା କଟାଯିବ।